വികസനം കൊതിച്ച് നിളയോരം

തിരൂർ

തിരൂർ, തവനൂർ മണ്ഡലങ്ങളിലെ തിരുന്നാവായ, തൃപ്രങ്ങോട്, തലക്കാട് പഞ്ചായത്തുകൾ ഉൾപ്പെട്ടതാണ് തിരുന്നാവായ ജില്ലാ പഞ്ചായത്ത് ഡിവിഷൻ. തിരൂര്‍ ബ്ലോക്ക് പഞ്ചായത്തിലെ ആലത്തിയൂർ, പൂഴിക്കുന്ന്, തെക്കൻ കുറ്റൂർ, പുല്ലൂർ, പട്ടർനടക്കാവ്, വൈരങ്കോട്, തിരുന്നാവായ എന്നിവ ഇ‍ൗ ഡിവിഷനിലാണ്‌ ഉൾപ്പെടുന്നത്‌. തെക്കൻ കാശിയെന്നറിയപ്പെടുന്ന ഭാരതപ്പുഴയോരത്തെ തിരുന്നാവായയും നവാമുകുന്ദ്ര ക്ഷേത്രം, തൃപ്രങ്ങോട് ക്ഷേത്രം, ഹനുമാൻ കാവ് ക്ഷേത്രം, തിരുന്നാവായ താമരക്കായൽ കൊടക്കൽ സിഎസ്ഐ ചർച്ച് എന്നിവയും ഈ മണ്ണിന്റെ പ്രത്യേകതയാണ്. മാമാങ്ക ചരിത്രത്തിന്റെ അടയാളങ്ങളുണ്ടെങ്കിലും നിളയോരനാട് വികസനത്തിനായി കൊതിക്കുകയാണ്. യുഡിഎഫ് തുടർച്ചയായി വിജയിക്കുന്ന ഡിവിഷന്‍ വികസനപ്രവർത്തനങ്ങളിൽ പിറകിലാണ്. നിലവിലെ ജില്ലാ പഞ്ചായത്ത് അംഗത്തിനെതിരെ സ്വർണക്കടത്ത് കേസും അഴിമതി ആരോപണങ്ങളുമുണ്ട്. ഇതില്‍ നാട്ടുകാര്‍ക്കും പ്രതിഷേധമുണ്ട്. ബ്ലോക്ക് പഞ്ചായത്തിലെ തൃപ്രങ്ങോട്, തലക്കാട് ഡിവിഷനുകളിലെ എൽഡിഎഫ് ഭരണവും സംസ്ഥാന സർക്കാരിന്റെ വികസന, ക്ഷേമ പ്രവർത്തനങ്ങളുമാണ് എല്‍ഡിഎഫിന്റെ പ്രതീക്ഷ. എസ്എഫ്ഐ തവനൂർ ഏരിയാ പ്രസിഡന്റ് എം ജെ തേജനന്ദയാണ് സ്ഥാനാർഥി. ജില്ലാ പഞ്ചായത്തിലേക്കുള്ള പ്രായംകുറഞ്ഞ സ്ഥാനാര്‍ഥിയാണ്‌. മലയാള സർവകലാശാലയിൽനിന്ന് ബിരുദാനന്തര ബിരുദം നേടിയ ഇരുപത്തിരണ്ടുകാരി തൃപ്രങ്ങോട് പൂഴിക്കുന്ന് സ്വദേശിനിയാണ്. സിപിഐ എം പൂഴിക്കുന്ന് ബ്രാഞ്ചംഗവും ഡിവൈഎഫ്ഐ തവനൂർ ബ്ലോക്ക് കമ്മിറ്റിയംഗവുമാണ്. തലക്കാട് ബി പി അങ്ങാടി സ്വദേശിനി എന്‍ പി ഷരീഫയാണ് യുഡിഎഫ് സ്ഥാനാർഥി. തലക്കാട് പഞ്ചായത്ത് സ്ഥിരംസമിതി അധ്യക്ഷയാണ്. വളവന്നൂർ തുവ്വക്കാട് പോത്തനൂർ സ്വദേശി മഞ്ജുള കദളിയിലാണ് എൻഡിഎ സ്ഥാനാർഥി.