സല്യൂട്ട്‌ 
ഫോറസ്‌റ്റ്‌ ടീം

മലപ്പുറം

കാളികാവ്‌ അടക്കാക്കുണ്ടിലെ നരഭോജി കടുവയെ പിടികൂടാൻ വനംവകുപ്പ്‌ നടത്തിയത്‌ ചരിത്രത്തിലെ എറ്റവും ദൈർഘ്യമേറിയ ദൗത്യം. തിരച്ചിൽ ആരംഭിച്ച്‌ 53–-ാം ദിവസമാണ്‌ കടുവ കൂട്ടിൽ കുടുങ്ങിയത്‌. 44 ദിവസം നീണ്ട വയനാട്ടിലെ ദൗത്യമാണ്‌ ഇതോടെ പഴങ്കഥയായത്‌. വനംവകുപ്പിനെ സംബന്ധിച്ചിടത്തോളം ഉറക്കമില്ലാത്ത രാവുകളാണ്‌ കടന്നുപോയത്‌. മെയ്‌ 15ന്‌ രാവിലെയാണ്‌ ടാപ്പിങ്‌ തൊഴിലാളിയായ ഗഫൂറലിയെ (41) കടുവ കൊലപ്പെടുത്തുന്നത്‌. അന്ന് തുടങ്ങിയ തിരച്ചിൽ ഒറ്റദിവസംപോലും നിർത്തിവച്ചില്ല. 50 പേരുടെ സ്ഥിര സംഘം. ഇതിനുപുറമേ നിലമ്പൂർ നോർത്ത്‌, സൗത്ത്‌ ഡിവിഷനുകളിൽ രണ്ട്‌ ടീമുകൾ മാറിമാറി സ്ഥിര സംഘത്തിനൊപ്പം ചേരും. അങ്ങനെ 70ല്‍ കുറയാത്ത സംഘമാണ്‌ മിക്കദിവസവും തിരച്ചിൽ നടത്തിയത്‌. ആഴ്‌ചയിൽ രണ്ട്‌ ദിവസം പ്രത്യേക തിരച്ചിലും നടത്തി. കാളികാവ്‌ ഫോറസ്‌റ്റ്‌ റേഞ്ചിലെ കരുവാരക്കുണ്ട്‌, ചക്കിക്കുഴി സ്‌റ്റേഷനുകൾ, കരുളായി റേഞ്ചിലെ നെടുങ്കയം, പടുക്ക സ്‌റ്റേഷനുകൾ, നിലമ്പൂർ സൗത്ത്‌ ആർആർടി, വയനാട്‌ ആർആർടി എന്നിവരും നിലമ്പൂർ നോർത്ത്‌ ആർടിടിയും നോർത്ത്‌ ഡിവിഷനിനുകീഴിലെ വിവിധ റേഞ്ചുകളിൽനിന്നുള്ള ഉദ്യോഗസ്ഥരും ദൗത്യസംഘത്തിന്റെ ഭാഗമായി. പല ദിവസങ്ങളിലും 160 പേർവരെ പങ്കെടുത്ത മെഗാ തിരച്ചിലും നടന്നു. പാലക്കാട്‌ വാളയാർ ഫോറസ്‌റ്റ്‌ ട്രെയിനിങ്‌ സ്‌കൂളിലെ 62 ബീറ്റ്‌ ഫോറസ്‌റ്റ്‌ ഓഫീസർമാരും മെഗാ തിരച്ചിലിൽ പങ്കാളിയായി.

ആറ്‌ കൂടുകൾ

സംസ്ഥാനത്ത്‌ എവിടെ വന്യമൃഗ തിരച്ചിൽ നടന്നാലും അതിൽ നിർണായക പങ്കുവഹിക്കാറുള്ളത്‌ വയനാട്ടിൽനിന്നുള്ള ആർആർടി സംഘമാണ്‌. കരുവാരക്കുണ്ടിലും പ്രധാനമായും ഉപയോഗിച്ചത്‌ വയനാട്‌ സംഘത്തിന്റെ ഉപകരണങ്ങളാണ്‌. ആറ്‌ കൂടുകളാണ്‌ കരുവാരക്കുണ്ട്‌, കാളികാവ്‌ പഞ്ചായത്തുകളിലായി സ്ഥാപിച്ചത്‌. വയനാട്‌ നിന്നുള്ള മൂന്ന്‌, പാലക്കാട്‌ ഒന്ന്‌, നിലമ്പൂർ രണ്ട്‌ എന്നിങ്ങനെയാണ്‌ ഉപയോഗിച്ച കൂടുകൾ. കൂടുകൾ സ്ഥാപിച്ച്‌ നാലും അഞ്ചും ദിവസംവരെ കടുവയുടെ സാന്നിധ്യം കണ്ടില്ലെങ്കിൽ കൂട്‌ അവിടെനിന്നും മാറ്റിസ്ഥാപിക്കുകയാണ്‌ ചെയ്‌തിരുന്നത്‌.

ദൗത്യം രാവിലെ 6 മുതൽ

ദിവസം രാവിലെ ആറിനുതന്നെ ദൗത്യസംഘം പ്രവർത്തനം തുടങ്ങി. വിവിധ ഇടങ്ങളിലായി സ്ഥാപിച്ച നൂറോളം കാമറകൾ പരിശോധിക്കുകയായിരുന്നു ആദ്യ ദൗത്യം. കാമറയിൽ കടുവയുടെ സാന്നിധ്യമുണ്ടെങ്കിൽ ആ പ്രദേശം കേന്ദ്രീകരിച്ചായിരിക്കും അന്നത്തെ തിരച്ചിൽ. നിലമ്പൂർ സൗത്ത്‌ ഡിഎഫ്‌ഒ ജി ധനിക്‌ലാലായിരുന്നു ദൗത്യസംഘം തലവൻ. കാളികാവ്‌ റേഞ്ച്‌ ഓഫീസർ പി രാജീവ്‌, കരുളായി റേഞ്ച്‌ ഓഫീസർ പി കെ മുജീബ്‌ റഹ്മാൻ, വയനാട്‌ ആർഎഫ്‌ഒ മുബഷീർ എന്നിവർ ദൗത്യത്തിന്‌ നേതൃത്വം നൽകി. വനംവകുപ്പിന്റെ വെറ്ററിനറി സർജൻമാരായ ഡോ. എസ്‌ ശ്യാം (നിലമ്പൂർ), ഡോ. അജേഷ്‌ മോഹൻദാസ്‌ (വയനാട്‌) മുഴുവൻ സമയവും സംഘത്തിലുണ്ടായിരുന്നു. മയക്കുവെടി വിദഗ്ധൻ ഡോ. അരുൺ സക്കറിയയും പല ദിവസങ്ങളിലും ദൗത്യസംഘത്തിനൊപ്പം ചേർന്നു.