5899 കൺട്രോള്‍ 
 16,172 ബാലറ്റ് യൂണിറ്റുകൾ

മലപ്പുറം

തദ്ദേശ തെരഞ്ഞെടുപ്പിനായി ജില്ലയില്‍ വോട്ടിങ് യന്ത്രങ്ങള്‍ സജ്ജം. വോട്ടെടുപ്പിന്‌ 5899 കൺട്രോള്‍ യൂണിറ്റുകളും 16,172 ബാലറ്റ് യൂണിറ്റുകളും ഉപയോഗിക്കും. ആദ്യഘട്ട പരിശോധന കഴിഞ്ഞ് പ്രവര്‍ത്തനസജ്ജമായ ഇലക്ട്രോണിക് വോട്ടിങ് മെഷീനുകള്‍ ഡിസംബര്‍ മൂന്നുമുതല്‍ ജില്ലയിലെ വെയർഹൗസിൽനിന്ന് വിതരണ കേന്ദ്രങ്ങളിലേക്ക് കൊണ്ടുപോകും. നടപടികൾ ശനിയാഴ്ചമുതൽ ആരംഭിക്കും. കാന്‍ഡിഡേറ്റ് സെറ്റിങ് കഴിഞ്ഞതിനുശേഷം മെഷീനുകള്‍ വിതരണ കേന്ദ്രങ്ങളിലെ സ്ട്രോങ് റൂമില്‍ സൂക്ഷിക്കും. വോട്ടെടുപ്പിന്റെ തലേദിവസം പോളിങ് ഉദ്യോഗസ്ഥര്‍ക്ക് വിതരണംചെയ്യും. പൊതുതെരഞ്ഞെടുപ്പിന് മള്‍ട്ടി പോസ്റ്റ് ഇവിഎം ആണ് ഉപയോഗിക്കുക. പഞ്ചായത്തുകളില്‍ ഉപയോഗിക്കുന്ന ഇവിഎമ്മിന് ഒരു കണ്‍ട്രോള്‍ യൂണിറ്റും മൂന്ന്‌ ബാലറ്റ് യൂണിറ്റും ഉണ്ടായിരിക്കും. വോട്ടിങ് കംപാര്‍ട്ട്മെന്റില്‍ വച്ചിട്ടുള്ള മൂന്ന് ബാലറ്റ് യൂണിറ്റുകള്‍ പഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത് ക്രമത്തിലാണ് സജ്ജമാക്കുക. നഗരസഭകളില്‍ ഒന്നുവീതം കണ്‍ട്രോള്‍ യൂണിറ്റും ബാലറ്റ് യൂണിറ്റുമാണ് ഉപയോഗിക്കുക. ഇവിഎം മെഷീനുകള്‍ക്ക് സാങ്കേതിക ബുദ്ധിമുട്ടുകള്‍ അനുഭവപ്പെട്ടാല്‍ റിസര്‍വ് ഇവിഎം മെഷീനുകളും സജ്ജമാണ്. ​ ബാലറ്റ് 
യൂണിറ്റില്‍ 
15 സ്ഥാനാര്‍ഥികൾ

ഒരു ബാലറ്റ് യൂണിറ്റില്‍ 15വരെ സ്ഥാനാര്‍ഥികളെയാണ് ക്രമീകരിക്കുന്നത്. ഏതെങ്കിലും തലത്തില്‍ മത്സരിക്കുന്ന സ്ഥാനാര്‍ഥികളുടെ എണ്ണം 15-ല്‍ കൂടുതലുണ്ടെങ്കില്‍ രണ്ടാമത്തെ ബാലറ്റ് യൂണിറ്റ് സജ്ജമാക്കും. 16മുതലുള്ള സ്ഥാനാര്‍ഥികളുടെ വിവരം രണ്ടാമത്തെ ബാലറ്റ് യൂണിറ്റിലാണ് ക്രമീകരിക്കുക. വോട്ടിങ് മെഷീനുകളുടെ പ്രവര്‍ത്തനം നിരീക്ഷിക്കാൻ പ്രത്യേക ഇവിഎം സോഫ്‌റ്റ്‌വെയര്‍ സംവിധാനവും ഒരുക്കിയിട്ടുണ്ട്.