മാളവികയ്‌ക്ക്‌ ഇരട്ടിമധുരം

മലപ്പുറം

സിവിൽ സർവീസ്‌ പരീക്ഷ എഴുതാനുള്ള അവസാന അവസരമായിരുന്നു മാളവികയ്‌ക്ക്‌. ഭർത്താവ്‌ ഐപിഎസ്‌ ട്രെയിനിങ്ങിൽ. മകൻ പിറന്നതിന്റെ പതിനേഴാം ദിവസം സിവിൽ സർവീസ്‌ പ്രധാന പരീക്ഷ. പ്രതിസന്ധികളെ സധൈര്യം നേരിട്ടപ്പോൾ തിരുവല്ലക്കാരിക്ക്‌ 45–-ാം റാങ്ക്‌. ഭർത്താവ്‌ ഡോ. എം നന്ദഗോപന്റെ ഐപിഎസ്‌ ട്രെയിനിങ്ങിന്റെ ഭാഗമായി ഇവർ കുടുംബസമേതം മലപ്പുറത്താണ്‌. 2019ൽ മൂന്നാമത്തെ ശ്രമത്തിൽ 118–-ാം റാങ്ക്‌ നേടിയ മാളവിക നിലവിൽ കൊച്ചി ഇൻകം ടാക്‌സിൽ ഡെപ്യൂട്ടി കമീഷണറാണ്‌. 2020ലായിരുന്നു മാളവികയുടെയും നന്ദഗോപന്റെയും വിവാഹം. 2022 സിവിൽ സർവീസ്‌ പരീക്ഷ ഇരുവരും ഒരുമിച്ച്‌ എഴുതി. മാളവികയ്‌ക്ക്‌ 172, നന്ദഗോപന്‌ 233 എന്നിങ്ങനെയായിരുന്നു റാങ്ക്‌. മാളവിക ആദായനികുതി വകുപ്പിൽ തുടരാൻ തീരുമാനിച്ചു. കോട്ടയം ഗവ. മെഡിക്കൽ കോളേജിൽനിന്ന്‌ എംബിബിഎസ്‌ പൂർത്തിയാക്കിയ നന്ദഗോപൻ 2023 ഐപിഎസ്‌ ബാച്ചിൽ ട്രെയിനിങ്ങിന്‌ പ്രവേശിച്ചു. ഗർഭിണിയായിരിക്കെയാണ്‌ പരീക്ഷ എഴുതാൻ മാളവിക തീരുമാനിച്ചത്‌. അച്ഛൻ തിരുവല്ല മുത്തൂർ ഗോവിന്ദ നിവാസിൽ കെ ജി അജിത്‌ കുമാ (റിട്ട. എജിഎം, കേരള ഫിനാൻഷ്യൽ കോർപറേഷൻ)റും അമ്മ ഡോ. ഗീതാലക്ഷ്‌മി (ഗൈനക്കോളജിസ്‌റ്റ്‌, ചെങ്ങന്നൂർ ഗവ. ജില്ലാ ആശുപത്രി)യും അനിയത്തി ഡോ. മൈത്രേയിയും പൂർണ പിന്തുണയുമായി ഒപ്പംനിന്നു. 2024 സെപ്‌തംബർ മൂന്നിന്‌ മകൻ പിറന്നു. 20ന്‌ എഴുത്തുപരീക്ഷ തുടങ്ങി. അഞ്ച്‌ ദിവസം എഴുത്തുപരീക്ഷ. തുടർന്ന്‌ ഇന്റർവ്യൂ, മെഡിക്കൽ ടെസ്‌റ്റ്‌. എല്ലാം അതിവേഗം നടന്നു. ആദ്യ നൂറിൽ ഇടംപിടിക്കുമെന്ന്‌ കരുതിയില്ലെന്ന്‌ മാളവിക പറഞ്ഞു. ചെങ്ങന്നൂർ സ്വദേശി ആർ മോഹന കുമാറിന്റെ (റിട്ട. മാനേജർ, ഇന്ത്യൻ ഓവർസീസ്‌ ബാങ്ക്‌)യും ഡോ. പ്രതിഭയുടെ (സൈക്യാട്രിസ്‌റ്റ്‌, ചെങ്ങന്നൂർ ഗവ. ജില്ലാ ആശുപത്രി)യും മകനാണ്‌ നന്ദഗോപൻ.