മാറ്റം തേടുന്ന വണ്ടൂർ

സ്വന്തം ലേഖകന്‍

വണ്ടൂർ

ബ്ലോക്ക് പഞ്ചായത്തിനുകീഴിലെ വെട്ടിക്കാട്ടിരി, പോരൂർ, ചെറുകോട്, വണ്ടൂർ, കാരാട്, വാണിയമ്പലം, നടുവത്ത് ഡിവിഷനുകള്‍ ചേർന്നതാണ് ജില്ലാ പഞ്ചായത്ത് വണ്ടൂർ ഡിവിഷൻ. ഇതില്‍ കാരാട് ഡിവിഷനില്‍ എല്‍ഡിഎഫ് പ്രതിനിധിയാണ്. നടുവത്ത് ഡിവിഷന്റെ ഭാഗമായ തിരുവാലി പഞ്ചായത്തിലും എല്‍ഡിഎഫ് ഭരണസമിതിയാണ്. ഭൂരിഭാഗം പ്രദേശവും യുഡിഎഫ് ഭരണത്തിനുകീഴിലാണെങ്കിലും ജില്ലാ പഞ്ചായത്തിന്റെ പദ്ധതികള്‍ എത്തിക്കുന്നതില്‍ വീഴ്ചയുണ്ടായി. പട്ടികജാതി നഗറിലെ ഭവനസുരക്ഷാ പദ്ധതിയില്‍ സർവത്ര അഴിമതിയെന്നാണ് ആക്ഷേപം. ജില്ലാ പഞ്ചായത്തിനുകീഴിലെ വണ്ടൂർ ഗവ. വിഎംസി ഹയർ സെക്കൻഡറി, വണ്ടൂർ ഗവ. ഗേൾസ് ഹയർ സെക്കൻഡറി, കാപ്പിൽ കാരാട് ഗവ. ഹൈസ്കൂൾ എന്നിവയ്ക്കായി ഒന്നുംചെയ്‌തില്ല. കാപ്പിൽ സ്വദേശിനി മിനികല പള്ളിയാളിയാണ് എൽഡിഎഫ് സ്ഥാനാർഥി. മമ്പാട് വനിതാ സഹകരണസംഘം സെക്രട്ടറിയായിരുന്നു. നിലവില്‍ ജനാധിപത്യ മഹിളാ അസോസിയേഷൻ വണ്ടൂർ ഏരിയാ വൈസ് പ്രസിഡന്റ്, സിപിഐ എം കാപ്പിൽ ബ്രാഞ്ച് അംഗം എന്നീ നിലകളില്‍ പ്രവര്‍ത്തിക്കുന്നു. അഭ്യന്തരകലഹമാണ് യു‍ഡിഎഫിനെ അലട്ടുന്നത്. ജില്ലാ പഞ്ചായത്ത് തേഞ്ഞിപ്പലം ഡിവിഷന്‍ അംഗമായ കെപിസിസി ജനറൽ സെക്രട്ടറി ആലിപ്പറ്റ ജമീലയാണ് യുഡിഎഫ് സ്ഥാനാർഥി. മഹിളാ കോൺഗ്രസ് ജില്ലാ ഭാരവാഹിയാണ്. കാളികാവ് സ്വദേശിനിയാണ്. ഏറനാട് മണ്ഡലത്തിലെ ചെങ്ങറ സ്വദേശിനി എൻ ജിഷ സജിത്താണ് എന്‍ഡിഎ സ്ഥാനാർഥി. ബിജെപി ഈസ്റ്റ് ജില്ലാ സെക്രട്ടറിയാണ്.