"മിഷന്‍ 1000' മുന്നേറി ജില്ല ഇവിടെ സംരംഭ വിപ്ലവം

മലപ്പുറം ​

പുതിയ സംരംഭങ്ങള്‍ തുടങ്ങുന്നതിന് സര്‍ക്കാര്‍ സഹായം ലഭിക്കുന്നുണ്ടെന്ന് എല്ലാവര്‍ക്കുമറിയാം. എന്നാല്‍, നിലവിലുള്ള സംരംഭങ്ങള്‍ വിപുലീകരിക്കുന്നതിനോ? വ്യവസായ വകുപ്പ് നേതൃത്വത്തില്‍ 2023–24ൽ ആരംഭിച്ച "മിഷന്‍ 1000' പദ്ധതി ഇതിനുള്ളതാണ്. മാനദണ്ഡങ്ങളുടെ അടിസ്ഥാനത്തില്‍ തെരഞ്ഞെടുക്കുന്ന 1000 സംരംഭങ്ങളെ ശരാശരി 100 കോടി രൂപ വിറ്റുവരവുള്ളവയാക്കി മാറ്റുകയാണ് ലക്ഷ്യം. പദ്ധതിപ്രകാരം സംരംഭ വിപുലീകരണത്തിന് സംസ്ഥാനത്ത് ഏറ്റവും കൂടുതല്‍ പദ്ധതിരേഖകള്‍ അംഗീകരിച്ചത് ജില്ലയിലാണ്. നിലവില്‍ 57 സംരംഭകരോടാണ് പദ്ധതിരേഖ സമര്‍പ്പിക്കാന്‍ ആവശ്യപ്പെട്ടിട്ടുള്ളത്. ഇതില്‍ 34 പേര്‍ രേഖകള്‍ നൽകി സംസ്ഥാനതല സമിതിയുടെ അംഗീകാരം നേടി. അഞ്ച് യൂണിറ്റില്‍ വിപുലീകരണ പ്രവൃത്തി പൂര്‍ത്തിയായി. ഇവര്‍ക്ക് സാമ്പത്തിക സഹായം ഉടന്‍ ലഭിക്കും. പദ്ധതിയുടെ ഭാഗമാകാന്‍ ആദ്യം ഓൺലൈനായി അപേക്ഷിക്കണം. സംരംഭത്തിന്റെ വിറ്റുവരവ്, നിക്ഷേപം, തൊഴിലാളികളുടെ വർധന, ലാഭവർധന തുടങ്ങിയവ സംസ്ഥാന സമിതി വിലയിരുത്തും. തെരഞ്ഞെടുത്ത സംരംഭങ്ങള്‍ വിശദ പദ്ധതിരേഖ (ഡിപിആര്‍) സമര്‍പ്പിക്കണം. ഡിപിആര്‍ തയ്യാറാക്കുന്നതിന് സര്‍ക്കാര്‍ ഒരുലക്ഷം രൂപവരെയും പ്രവൃത്തികള്‍ക്ക് 2.5 കോടി രൂപവരെയും സാമ്പത്തിക സഹായം നൽകും. സ്ഥിരാസ്‌തികൾക്ക് 40 ശതമാനവും (പരമാവധി രണ്ടുകോടി രൂപവരെ) പ്രവർത്തന മൂലധന വായ്പക്ക് പലിശയുടെ 50 ശതമാനവുമാണ് (പരമാവധി 50 ലക്ഷം രൂപവരെ) ധനസഹായം.

3 വര്‍ഷം 
35,000 സംരംഭം

മലപ്പുറം

സംരംഭക വർഷത്തിന്റെ ഭാഗമായി കഴിഞ്ഞ മൂന്ന് വർഷത്തിനിടെ ജില്ലയിൽ ആരംഭിച്ചത് 35,000 പുതിയ സംരംഭം. ഇതുവഴി 2100 കോടിയിലധികം രൂപയുടെ നിക്ഷേപമുണ്ടായി. 76,000 തൊഴിലവസരവും ലഭ്യമാക്കി. ജില്ലയിൽ ഏഴ് സ്വകാര്യ വ്യവസായ പാർക്കിനാണ് അനുമതി ലഭിച്ചത്. നാല് അപേക്ഷ പരിഗണനയിലുണ്ട്. ഒരു എസ്റ്റേറ്റ് നിർമാണം പൂർത്തിയായി ഉദ്ഘാടനത്തിനൊരുങ്ങി. ക്യാമ്പസുകളിൽ സംരംഭകത്വം വളർത്തുന്നതിന്റെ ഭാഗമായി ആവിഷ്കരിച്ച ക്യാമ്പസ്‌ വ്യവസായ പാർക്ക്‌ പദ്ധതിയിൽ മൂന്ന് അപേക്ഷ ലഭിച്ചു. ഒരെണ്ണത്തിന് അനുമതി നല്‍കി.