ജമാഅത്തെ നേതാക്കൾക്കൊപ്പം 
വേദികൾ പങ്കിട്ട്‌ യുഡിഎഫ്‌

മലപ്പുറം

ജമാഅത്തെ ഇസ്ലാമി ജില്ലയിൽ പ്രവർത്തിക്കുന്നത്‌ യുഡിഎഫിന്റെ ഘടകകക്ഷിയെപ്പോലെ. മതരാഷ്‌ട്രവാദികളായ ജമാഅത്തെ ഇസ്ലാമിയുമായി ബന്ധമില്ലെന്ന്‌ യുഡിഎഫ്‌ നേതാക്കൾ ആവർത്തിക്കുമ്പോഴാണ്‌ ഇ‍ൗ പരസ്യ സഖ്യം. പലയിടത്തും യുഡിഎഫ്‌ നേതാക്കളും ജമാഅത്തെ ഇസ്ലാമി നേതാക്കളും വേദി പങ്കിടുന്ന ചിത്രം ഇതിനകം പുറത്തുവന്നു. കഴിഞ്ഞ ദിവസം വെട്ടത്തൂർ പഞ്ചായത്ത് 19–-ാം വാർഡിൽ വെൽഫെയർ സ്ഥാനാർഥി കെ പി യൂസഫിന്റെ തെരഞ്ഞെടുപ്പ് കൺവൻഷൻ ലീഗ്‌ എംഎൽഎ നജീബ് കാന്തപുരമാണ്‌ ഉദ്ഘാടനംചെയ്തത്. വെൽഫെയർ പാർടി ജില്ലാ സെക്രട്ടറി അഷ്റഫ് അലി കട്ടുപ്പാറ ഉൾപ്പെടെ ജമാഅത്തെ ഇസ്ലാമി നേതാക്കൾക്കൊപ്പമാണ്‌ യുഡിഎഫ്‌ നേതാക്കൾ വേദി പങ്കിട്ടത്‌. മലപ്പുറം വലിയങ്ങാടിയിൽ യുഡിഎഫ്‌ തെരഞ്ഞെടുപ്പ്‌ കമ്മിറ്റി ഓഫീസിൽ ലീഗ്‌ പതാകയും വെൽഫെയർ പതാകയും ചേർത്തുകെട്ടിയത്‌ വിവാദമായിരുന്നു. വടക്കാങ്ങര എട്ടാം വാർഡിൽ യുഡിഎഫ് -– വെൽഫെയർ പാർടി തെരഞ്ഞെടുപ്പ് കമ്മിറ്റി ഓഫീസ് എന്നാണ്‌ ബോർഡിൽ നൽകിയിരിക്കുന്നത്‌.