കൂട്ടിൽ കുടുങ്ങാതെ കടുവ

സ്വന്തം ലേഖകന്‍

കരുവാരക്കുണ്ട്

പതിനൊന്നാം ദിവസവും ജനവാസ മേഖലയിലിറങ്ങിയ കടുവയെ പിടികൂടാൻ തിരച്ചിൽ നടത്തി. ഡ്രോണ്‍ കാമറകളും സെന്‍സറുകളും ഉപയോഗിച്ച് നിരീക്ഷണം ശക്തമാക്കി. കടുവ ഇടയ്‌ക്കിടെ സ്ഥലംമാറുന്നതിനാൽ വനപാലകർക്ക്‌ തിരച്ചിൽ വെല്ലുവിളിയാകുന്നു. ദ്രുതകര്‍മസേന വിവിധ സ്ഥലങ്ങളില്‍ കൂടുകള്‍ ഒരുക്കി കാത്തിരിക്കയാണ്. ആർത്തല, പോത്തൻകാട്, മദാരി, സുൽത്താന, കുണ്ടോട തുടങ്ങിയ എസ്റ്റേറ്റുകളിലായിരുന്നു കടുവയുടെ സാന്നിധ്യം റിപ്പോര്‍ട്ടുചെയ്തത്. ഈ പ്രദേശങ്ങളിലെ ടാപ്പിങ് നിര്‍ത്തിവച്ചതോടെ അനുബന്ധ തൊഴിലുകളും നിലച്ചു. ആയിരക്കണക്കിന് തൊഴിലാളികളും അവരുടെ കുടുംബങ്ങളും ഇതോടെ സാമ്പത്തിക പ്രതിസന്ധിയിലായി.