ഇനിയും കുതിക്കാൻ മാറഞ്ചേരി

പൊന്നാനി

ചരിത്രമുറങ്ങുന്ന വന്നേരിനാടിന്റെ ഭാഗമാണ് ജില്ലാ പഞ്ചായത്ത് ഡിവിഷനായ മാറഞ്ചേരി. മത്സ്യമേഖലയും കാർഷിക മേഖലയും ചേർന്ന പ്രദേശം. മാറഞ്ചേരി, വെളിയങ്കോട് പഞ്ചായത്തുകൾ മുഴുവനായും പെരുമ്പടപ്പിലെ അഞ്ച് വാർഡ് ഒഴികെയുള്ളവയും എടപ്പാൾ പഞ്ചായത്തിലെ കോലളമ്പ് ബ്ലോക്ക് ഡിവിഷനും ചേർന്നതാണ് മാറഞ്ചേരി ഡിവിഷൻ. 1995ലെ ആദ്യ ജില്ലാ പഞ്ചായത്ത് തെരഞ്ഞെടുപ്പിൽ ആലങ്കോട് ഡിവിഷനിലും തുടർന്ന് പെരുമ്പടപ്പ് ഡിവിഷനിലും പെട്ടതായിരുന്നു. 2010ലെ വാർഡ് വിഭജനത്തെ തുടർന്നാണ് മാറഞ്ചേരി ഡിവിഷൻ രൂപീകരണം. ഇടതുപക്ഷത്തിന് വളക്കൂറുള്ള മണ്ണാണെങ്കിലും ഇരുമുന്നണിയെയും മാറിമാറി പിന്തുണച്ച ചരിത്രം. കഴിഞ്ഞ അഞ്ച് തെരഞ്ഞെടുപ്പുകളിൽ മൂന്ന് തവണ എൽഡിഎഫും രണ്ട് തവണ യുഡിഎഫും വിജയിച്ചു. 2020ൽ സിപിഐയിലെ എ കെ സുബൈറാണ് വിജയിച്ചത്. നാടിന്റെ ഹൃദയമറിഞ്ഞ പ്രവർത്തനങ്ങൾ നടപ്പാക്കി. കാർഷിക മേഖലക്കും വിദ്യാഭ്യാസ മേഖലക്കും പ്രാധാന്യം നൽകി. കർഷകരുടെ കണ്ണീരൊപ്പാനായുള്ള വിസിബി നിർമാണം, വിദ്യാലയങ്ങളുടെ നവീകരണം തുടങ്ങിയവ കൃത്യമായി പൂർത്തിയാക്കി. റോഡ് വികസനത്തിനും സ്ത്രീ ശാക്തീകരണത്തിനും വിവിധ പദ്ധതികളും നടപ്പാക്കി. ഇ‍ൗ വികസന തുടർച്ചയ്ക്കാണ്‌ എൽഡിഎഫ്‌ വോട്ട്‌ തേടുന്നത്‌. സിപിഐ സംസ്ഥാന കൗൺസിൽ അംഗവും മഹിളാ സംഘം സംസ്ഥാന ജോ. സെക്രട്ടറിയുമായ ഷാജിറ മനാഫാ (54)ണ് എൽഡിഎഫ് സ്ഥാനാർഥി. നാലുതവണ വെളിയങ്കോട് പഞ്ചായത്തിലേക്ക് തെരഞ്ഞെടുക്കപ്പെട്ടു. 2000 – 2005ൽ വെളിയങ്കോട് പഞ്ചായത്ത് പ്രസിഡന്റായിരുന്നു. 2010ൽ വെളിയങ്കോട് ഡിവിഷനിൽനിന്നും ബ്ലോക്ക് പഞ്ചായത്തിലേക്കും തെരഞ്ഞെടുക്കപ്പെട്ടു. വെളിയങ്കോട് അയ്യോട്ടിച്ചിറ സ്വദേശിയാണ്. മാറഞ്ചേരി സ്വദേശി സുലൈഖ റസാഖാണ് യുഡിഎഫ് സ്ഥാനാർഥി. മാറഞ്ചേരി കരിങ്കല്ലത്താണി സ്വദേശി സുബിഷ രമേഷാണ് എൻഡിഎ സ്ഥാനാർഥി.