സിപിഐ ജില്ലാ സമ്മേളനം ഇന്ന് തുടങ്ങും

മലപ്പുറം

സിപിഐ 25ാം പാര്‍ടി കോണ്‍ഗ്രസിന്റെ ഭാഗമായുള്ള ജില്ലാ സമ്മേളനം ഞായറാഴ്ച പരപ്പനങ്ങാടിയില്‍ തുടങ്ങും. പതാക, കൊടിമര, ബാനര്‍ ജാഥകള്‍ പകൽ മൂന്നിന് തിരൂരങ്ങാടി മുനിസിപ്പൽ സ്റ്റേഡിയത്തിൽ സംഗമിക്കും. വൈകിട്ട് നാലിന് റെഡ് വളന്റിയര്‍ മാര്‍ച്ച് ആരംഭിക്കും. എഐടിയുസി ജില്ലാ പ്രസിഡന്റ് എം എ റസാഖിന്റെ നേതൃത്വത്തിലുള്ള പതാകജാഥ പകല്‍ 11ന് വണ്ടൂരിലെ കെ പ്രഭാകരന്‍ സ്മൃതിമണ്ഡപത്തിൽനിന്ന് ആരംഭിക്കും. സിപിഐ ജില്ലാ അസി. സെക്രട്ടറി അഡ്വ. പി പി ബാലകൃഷ്ണൻ ഉദ്ഘാടനംചെയ്യും. കേരള മഹിളാസംഘം ജില്ലാ സെക്രട്ടറി സമീറ ഇളയേടത്തിന്റെ നേതൃത്വത്തിലുള്ള കൊടിമര ജാഥ ആളൂർ പ്രഭാകരന്റെ വസതിയിൽനിന്ന് ആരംഭിക്കും. സിപിഐ സംസ്ഥാന കൗൺസിൽ അംഗം അജിത് കൊളാടി ഉദ്ഘാടനംചെയ്യും. എഐവൈഎഫ് ജില്ലാ പ്രസിഡന്റ് ഇ വി അനീഷിന്റെ നേതൃത്വത്തിലുള്ള ബാനര്‍ ജാഥ മഞ്ചേരിയിലെ കെ ബാബുരാജ് സ്‌മൃതിമണ്ഡപത്തിൽ സിപിഐ ജില്ലാ ട്രഷറർ പി സുബ്രഹ്മണ്യൻ ഉദ്ഘാടനംചെയ്യും. അഞ്ചിന് കെ ബാബുരാജ് നഗറിൽ (പയനിങ്ങൽ ജങ്ഷൻ) സ്വാഗതസംഘം ചെയർമാൻ നിയാസ് പുളിക്കലകത്ത് പതാക ഉയർത്തും. പൊതുസമ്മേളനം ദേശീയ കൗൺസിൽ അംഗം മന്ത്രി കെ രാജൻ ഉദ്ഘാടനംചെയ്യും. കലാപരിപാടികൾ അരങ്ങേറും. തിങ്കള്‍ രാവിലെ ഒമ്പതിന് കെ കോയക്കുഞ്ഞി നഹ സ്‌മൃതിമണ്ഡപത്തിൽനിന്ന് ആരംഭിക്കുന്ന ദീപശിഖാപ്രയാണം സംസ്ഥാന എക്സിക്യൂട്ടീവ് അംഗം രാജാജി മാത്യു തോമസ് ഫ്ലാഗ്ഓഫ് ചെയ്യും. പ്രതിനിധി സമ്മേളനവേദിയായ കെ പ്രഭാകരൻ നഗറിൽ (പരപ്പനങ്ങാടി ജാസ് ഓഡിറ്റോറിയം) ഇ പി മുഹമ്മദാലി പതാക ഉയർത്തും. പ്രതിനിധി സമ്മേളനം സിപിഐ ദേശീയ എക്സിക്യൂട്ടീവ് അംഗം കെ പി രാജേന്ദ്രൻ ഉദ്ഘാടനംചെയ്യും. ജില്ലയിലെ സിപിഐ മെമ്പര്‍ഷിപ്പില്‍ സമ്മേളന കാലയളവില്‍ വര്‍ധനയുണ്ടായെന്ന് ജില്ലാ സെക്രട്ടറി പി കെ കൃഷ്ണദാസ് വാര്‍ത്താസമ്മേളനത്തില്‍ പറഞ്ഞു. പുതിയ കമ്മിറ്റിയില്‍ യുവാക്കള്‍ക്ക് 20 ശതമാനവും സ്ത്രീകള്‍ക്ക് 15 ശതമാനവും പ്രാതിനിധ്യം നല്‍കും. അസി. സെക്രട്ടറിമാരായ അഡ്വ. പി പി ബാലകൃഷ്ണന്‍, ഇ സെയ്തലവി, സ്വാഗതസംഘം ചെയര്‍മാന്‍ നിയാസ് പുളിക്കലകത്ത് എന്നിവര്‍ പങ്കെടുത്തു.