പ്രതീക്ഷയുടെ പച്ചത്തുരുത്തുകള്‍

മലപ്പുറം

പത്ത്‌ വർഷം മുമ്പ്‌ പെരിന്തൽമണ്ണ നഗരസഭയിലെ എരവിമംഗലത്തെ താഴെപ്പറ്റകുന്ന്‌ കണ്ടിട്ടുള്ളവർ ഒരിക്കൽക്കൂടി അവിടെയെത്തണം. കുറ്റിക്കാടുകൾ നിറഞ്ഞ്‌ യാതൊരു ഉപയോഗവുമില്ലാതെ കിടന്നിരുന്ന പ്രദേശം ഇന്നാകെ മാറി. പ്രതീക്ഷയുടെ പച്ചത്തുരുത്തായി താഴെപ്പറ്റകുന്ന്‌ മനം നിറയ്‌ക്കുന്ന കാഴ്‌ചയാണിന്ന്‌. സർക്കാർ ഉടമസ്ഥതയിലുള്ള മുഴുവൻ തരിശുഭൂമികളും കൃഷിയോഗ്യമാക്കാനുള്ള തീരുമാനമാണ്‌ മാറ്റത്തിന്‌ പിന്നിൽ. ഹരിതകേരളം മിഷൻ ആവിഷ്‌കരിച്ച ‘അതിജീവനത്തിന്റെ ആയിരം പച്ചത്തുരുത്തുകൾ’ പദ്ധതിയുടെ ഭാഗമായി താഴെപ്പറ്റകുന്നിൽ കൃഷിയിറക്കി. ഏഴ്‌ ഏക്കർ സ്ഥലത്ത്‌ വൃക്ഷങ്ങൾ, വിവിധതരം കുറ്റിച്ചെടികളും വള്ളിച്ചെടികളും, ഔഷധ സസ്യങ്ങൾ എന്നിവയെല്ലാംകൊണ്ട്‌ നിറഞ്ഞിരിക്കുന്നു. എൽഡിഎഫ്‌ സർക്കാർ ഒമ്പത്‌ വർഷത്തെ ഭരണത്തിനിടയിൽ കൊണ്ടുവന്ന ഏറ്റവും വലിയ മാറ്റങ്ങളായിരുന്നു–- ഹരിതകേരളം, മാലിന്യമുക്തം നവകേരളം.

ഹരിതസ്ഥാപനം

സർക്കാർ ഓഫീസുകളെയും സ്‌കൂളുകളെയും ഹരിത സ്ഥാപനങ്ങളാക്കാനുള്ള ശ്രമങ്ങളും ഈ കാലയളവിൽ നടന്നു. ജില്ലയിൽ 5124 സ്ഥാപനങ്ങളിൽ 4724 എണ്ണത്തിൽ പഠനം നടത്തി. 2011 സ്ഥാപനങ്ങൾക്ക്‌ ഹരിത സർട്ടിഫിക്കറ്റ്‌ നൽകി. ജില്ലയിൽ 145 കലാലയങ്ങളിൽ പഠനം നടത്തിയപ്പോൾ 124 എണ്ണത്തിന്‌ ഹരിത പദവി ലഭിച്ചു. 1606 വിദ്യാലയങ്ങളിൽ 1554 എണ്ണം ഹരിത പദവി കരസ്ഥമാക്കി. 33,412 അയൽക്കൂട്ടങ്ങളിൽ 32,945 അയൽക്കൂട്ടങ്ങളിൽ പഠനം നടന്നു. 29,826 എണ്ണം ഹരിത അയൽക്കൂട്ടങ്ങളാണ്‌.

പച്ചയണിഞ്ഞ്‌ 151 ഇടങ്ങൾ

ഹരിതകേരളം പദ്ധതിയുടെ ഭാഗമായി ജില്ലയിൽ 75.48 ഏക്കർ വിസ്തൃതിയിൽ 151 പച്ചത്തുരുത്തുകളാണ്‌ സ്ഥാപിച്ചത്‌. 60 പഞ്ചായത്തുകളിലായി 124 എണ്ണവും എട്ട്‌ നഗരസഭയിലായി 27 എണ്ണവും ഒരുക്കി. ബ്ലോക്കിലെ ഒരു വിദ്യാലയം കേന്ദ്രീകരിച്ച് മാതൃകാ പച്ചത്തുരുത്ത് ഉണ്ടാക്കുന്ന ‘മരക്കൂട്ടം'പദ്ധതിയും നടന്നുവരുന്നു. 15 ബ്ലോക്കുകളുടെയും കീഴിൽ വിവിധ സ്‌കൂൾ ഇതിനായി തെരഞ്ഞെടുത്ത് പ്രവർത്തനം തുടങ്ങി. ജില്ലയിൽ 2425 ഹരിതകർമസേനാ അംഗങ്ങളാണ് ഉള്ളത്. ആതവനാട് പഞ്ചായത്ത് തരിശ് രഹിത പഞ്ചായത്തായി പ്രഖ്യാപിച്ചിട്ടുണ്ട്. നെറ്റ് സീറോ കാർബൺ കേരളം പദ്ധതിയുടെ ഭാഗമായി ഹരിതകേരളം മിഷന്റെയും തിരൂർ മലയാളം സർവകലാശാലയുടെയും സഹകരണത്തോടെ വിശദമായ പദ്ധതിരേഖ വെട്ടം പഞ്ചായത്ത് തയ്യാറാക്കിയിട്ടുണ്ട്. കീഴുപറമ്പ്, കീഴാറ്റൂർ, വാഴയൂർ, മൂത്തേടം എന്നീ പഞ്ചായത്തുകളിൽ സർവേ പൂർത്തീകരിച്ചു.