തുടരും

മലപ്പുറം

രണ്ടാം പിണറായി സർക്കാർ അഞ്ചാം വർഷത്തിലേക്ക്‌ കടക്കുമ്പോൾ മലപ്പുറവും വികസനക്കുതിപ്പിലാണ്‌. ഒമ്പത്‌ വർഷത്തിനിടെ വികസന വസന്തമാണ്‌ ജില്ലയിൽ സംസ്ഥാന സർക്കാർ നടപ്പാക്കിയത്‌. ജില്ലയുടെ മുഖഛായതന്നെ മാറ്റിയ ദേശീയപാത, മലയോര ഹൈവേ, പാലങ്ങൾ, റോഡുകൾ, ഗവ. സ്‌കൂളുകൾ, സർക്കാർ ആശുപത്രികൾ, കളിക്കളങ്ങൾ, സർക്കാർ ഓഫീസുകൾ... അങ്ങനെ മലപ്പുറത്തിന്റെ സർവ മേഖലകളിലും വികസനത്തിന്റെ കാഴ്‌ചകളാണ്‌.

കളിക്കളം നിറയുന്നു

കാൽപ്പന്തിനെ ഹൃദയത്തോടുചേർത്ത മലപ്പുറം ജനതയ്‌ക്ക്‌ സന്തോഷംപകർന്ന നാളുകളായിരുന്നു എൽഡിഎഫ്‌ സർക്കാരിന്റെ ഒമ്പത്‌ വർഷം. കായികരംഗത്ത് വലിയ കുതിച്ചുചാട്ടമുണ്ടായി. മഞ്ചേരി പയ്യനാട് സ്‌പോര്‍ട്‌സ് കോംപ്ലക്‌സ് വികസനത്തിന് 45 കോടി രൂപ അനുവദിച്ചു. നിലമ്പൂര്‍ മാനവേദന്‍ ഹയർ സെക്കൻഡറി സ്‌കൂളിൽ _18.26 കോടി രൂപ ചെലവില്‍ സിന്തറ്റിക്‌ ട്രാക്ക്‌ ഉൾപ്പെടെയുള്ള സ്‌റ്റേഡിയം നിർമിച്ചു. രണ്ടാംഘട്ട നിർമാണത്തിനായി ഫണ്ട്‌ അനുവദിച്ചു. എടപ്പാള്‍ മിനി സ്റ്റേഡിയവും ഇന്‍ഡോര്‍ കോര്‍ട്ടും, താനൂര്‍ മണ്ഡലത്തിലെ ഫിഷറീസ് സ്‌കൂള്‍ സ്റ്റേഡിയം, കാട്ടിലങ്ങാടി സ്റ്റേഡിയം, ഉണ്ണിയാല്‍ ഫിഷറീസ് സ്റ്റേഡിയം ആൻഡ്‌ സ്‌പോര്‍ട്‌സ് കോംപ്ലക്‌സ്, താനാളൂര്‍ ഇ എം എസ് സ്റ്റേഡിയം എന്നിവ പൂർത്തിയാക്കി. കലിക്കറ്റ് സര്‍വകലാശാലയില്‍ രാജ്യാന്തര നിലവാരത്തിലുള്ള നീന്തല്‍ക്കുളവും നിർമിച്ചു.

സന്തോഷപ്പാത

വികസന പാതകൾ കാണണമെങ്കിൽ ജില്ലയിലേക്കുതന്നെ വരണം. ദേശീയപാത വികസനം ഏറ്റവും വേഗത്തിൽ പുരോഗമിക്കുന്നത്‌ ജില്ലയിലാണ്‌. ദേശീയപാത 66നുവേണ്ടി 24 വില്ലേജുകളിലായി 203.41 ഹെക്ടര്‍ ഭൂമി ഏറ്റെടുത്തു. രാമനാട്ടുകരമുതല്‍ വളാഞ്ചേരിവരെയുള്ള ആദ്യ റീച്ച്‌ 94 ശതമാനവും വളാഞ്ചേരിമുതല്‍  കാപ്പിരിക്കാടുവരെയുള്ള റീച്ച്‌ 95 ശതമാനവും പൂര്‍ത്തിയായി. രണ്ടുമാസത്തിനുള്ളില്‍ നിർമാണം പൂർണമാകും. തീരദേശ ഹൈവേയും അതിവേഗം പുരോഗമിക്കുന്നു. കാപ്പിരിക്കാടുനിന്ന് ആരംഭിച്ച് കടലുണ്ടിക്കടവില്‍ അവസാനിക്കുന്ന പാതയ്‌ക്ക്‌ 52.76 കി. മീറ്ററാണ്‌ ദൈര്‍ഘ്യം. മലയോര ഹൈവേ ജില്ലയില്‍ 69.05 കിലോമീറ്ററാണ്‌. കാളികാവുമുതല്‍ കരുവാരക്കുണ്ടുവരെയുള്ള ആദ്യ റീച്ച്‌ പൂര്‍ത്തിയായി. പൂക്കോട്ടുംപാടം–നിലമ്പൂര്‍– മൈലാടി രണ്ടാം റീച്ച്  രണ്ടുമാസത്തിനകം പൂര്‍ത്തിയാകും. പൂക്കോട്ടുംപാടം–-കാളികാവ് മൂന്നാം റീച്ച് 60 ശതമാനം പൂര്‍ത്തിയായി. അവശേഷിക്കുന്ന മൂന്ന് റീച്ചുകൾ ടെന്‍ഡര്‍, എസ്റ്റിമേറ്റ് നടപടികളിലാണ്. ഗ്രീന്‍ഫീല്‍ഡ് ഹൈവേ (ദേശീയപാത 966)യുടെ നിര്‍മാണത്തിനായുള്ള ടെന്‍ഡര്‍ നടപടി പുരോഗമിക്കയാണ്. ജില്ലയില്‍ 15 വില്ലേജുകളില്‍നിന്നായി 233.9016 ഹെക്ടര്‍ ഭൂമി ഏറ്റെടുത്ത് ദേശീയപാത അതോറിറ്റിക്ക് കൈമാറി.

നിർമാണം പൂർത്തിയായ 
പൂക്കോട്ടുംപാടം–- കാറ്റാടികടവ്‌ പാലം റോഡ്‌

എല്ലാവർക്കും സ്വന്തം വീട്‌

‘തലചായ്‌ക്കാൻ എല്ലാവർക്കും സ്വന്തമായി ഒരു കൂര’ എന്നതായിരുന്നു എൽഡിഎഫ്‌ സർക്കാരിന്റെ ആദ്യ പ്രഖ്യാപനം. ലൈഫ്‌ ഭവന പദ്ധതിയിൽ ജില്ലയിൽ 53,510 കുടുംബങ്ങള്‍ക്ക് വീടായി. തീരദേശ മേഖലയിലെ ജനങ്ങൾക്ക്‌ പുനര്‍ഗേഹം പദ്ധതിവഴി താമസ സൗകര്യമൊരുക്കി. 190 കുടുംബങ്ങള്‍ പുതിയ വീടുകളിലേക്ക്‌ മാറി. പൊന്നാനിയിൽ ഒന്നാംഘട്ടത്തിൽ 128 കുടുംബങ്ങളാണ്‌ ഫ്‌ളാറ്റിലേക്ക്‌ മാറിയത്‌. ഇവിടെ രണ്ടാംഘട്ട നിർമാണം പുരോഗമിക്കുന്നു. ഉണ്യാലിലും ഫ്‌ളാറ്റ്‌ നിർമാണം നടക്കുന്നുണ്ട്‌.