തോട്ടപ്പള്ളി ഫെസ്‌റ്റിന്‌ ഉജ്വല തുടക്കം

അമ്പലപ്പുഴ

നിർത്താതെ പെയ്‌ത കനത്ത മഴയെയും അടങ്ങാതെനിന്ന കാറ്റിനെയും മറികടന്ന്‌ ഒഴുകിയെത്തിയ നൂറുകണക്കിന്‌ പേരെ സാക്ഷിയാക്കി തോട്ടപ്പള്ളി ബീച്ചിൽ അമ്പലപ്പുഴ മണ്ഡലം സാംസ്‌കാരികോത്സവം ‘തോട്ടപ്പള്ളി ഫെസ്‌റ്റി’ന് പ്ര‍ൗഢോജ്വല തുടക്കം. ഇനിയുള്ള രാപ്പകലുകൾ തോട്ടപ്പള്ളിയുടെ മണൽപ്പരപ്പ്‌ കലയുടെയും സംസ്‌കാരത്തിന്റെയും സംഗമഭൂമിയാകും. വ്യാഴം വൈകിട്ട്‌ എച്ച്‌ സലാം എംഎൽഎ തോട്ടപ്പള്ളിയിലെ പ്രധാനവേദിയിൽ തിരിതെളിച്ചു. പുറക്കാട്‌ പഞ്ചായത്ത്‌ പ്രസിഡന്റ്‌ എ എസ്‌ സുദർശനൻ അധ്യക്ഷനായി. കുഞ്ചൻ നമ്പ്യാർ സ്‌മാരകം സെക്രട്ടറി പ്രദീപ്‌ സ്വാഗതംപറഞ്ഞു. ജില്ലാ പഞ്ചായത്ത്‌ അംഗം ഗീത ഗോപി, നഗരസഭ സ്ഥിരംസമിതി അധ്യക്ഷ എ എസ്‌ കവിത, ജനപ്രതിനിധികളായ ഷീബാ രാകേഷ്‌, ശോഭ ബാലൻ, എസ്‌ ഹാരിസ്‌, പി ജി സൈറസ്‌, ആർ രാജി, കുഞ്ചൻ നമ്പ്യാർ സ്‌മാരക സമിതി ചെയർമാൻ പ്രഫ. ഗോപിനാഥപിള്ള, വൈസ്‌ ചെയർമാൻ എ ഓമനക്കുട്ടൻ, ലൈബ്രറി ക‍ൗൺസിൽ ജില്ലാ പ്രസിഡന്റ്‌ അലിയാർ എം മാക്കിയിൽ എന്നിവർ പങ്കെടുത്തു. പ്രധാനവേദിയിൽ രാവിലെ അഗ്നിച്ചിറകുകൾ എന്ന പേരിൽ ഭിന്നശേഷിക്കുട്ടികളുടെ സംഗമം ഉണ്ടായി. രാത്രിയിൽ അതുൽ നറുകരയുടെ മ്യൂസിക് ബാൻഡ്‌ അരങ്ങേറി.​