വിശ്വാസസാ​ഗരം സാക്ഷി, 
പരുമല പെരുന്നാളിന് കൊടിയേറി

മാന്നാര്‍

പരുമല തിരുമേനിയുടെ 123–-ാം ഓർമപ്പെരുന്നാളിന് ഓർത്തഡോക്‌സ്‌ സഭ പരമാധ്യക്ഷന്‍ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ കൊടിയേറ്റി. പള്ളിയിലും പരിശുദ്ധന്റെ കബറിടത്തിലും പ്രത്യേക പ്രാർഥനകൾക്കുശേഷമാണ് പെരുന്നാളിന് കൊടിയേറ്റിയത്. വെറ്റില വിതറി പരമ്പരാ​ഗതരീതിയിൽ കൊടിയേറ്റിന് സാക്ഷ്യം വഹിക്കാൻ ആയിരങ്ങളാണ് പമ്പാനദിയുടെ തീരത്തെ പരുമലമണ്ണിലേക്ക് ഒഴുകിയെത്തിയത്. രാവിലെ ദേവാലയത്തിൽ മൂന്നിൻമേൽ കുർബാനയ്‌ക്ക്‌ ഡോ. യൂഹാനോൻ മാർ ​ദീയസ്‌കോറോസ് മെത്രാപോലീത്ത കാര്‍മികനായി. റവ. ഡോ. എം എസ് യൂഹാനോൻ റമ്പാൻ, റവ. യാക്കോബ് തോമസ് റമ്പാൻ എന്നിവർ സഹകാർമികരായി. 100 സ്വപ്‌നഭവനം 
പ്രഖ്യാപിച്ചു മാന്നാർ തീർഥാടനവാരാഘോഷം ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ ഉദ്ഘാടനംചെയ്‌തു. എപ്പിസ്‌കോപ്പൽ സുന്നഹദോസ് സെക്രട്ടറി ഡോ. യൂഹാനോൻ മാർ ക്രിസോസ്‌റ്റമോസ് മെത്രാപോലീത്താ അധ്യക്ഷനായി. എംജി സർവകലാശാലാ വൈസ്ചാൻസലർ പ്രൊഫ. സി ടി അരവിന്ദ്കുമാർ മുഖ്യസന്ദേശം നൽകി. കാതോലിക്കാ ബാവായുടെ പൗരോഹിത്യ കനകജൂബിലിയുടെ ഭാ​ഗമായി സഹോദരൻ പദ്ധതിയിൽ നിർമിച്ചുനൽകുന്ന സ്വപ്‌നഭവനങ്ങളുടെ പ്രഖ്യാപനവുമുണ്ടായി. 10 ലക്ഷം രൂപ ചെലവുവരുന്ന 100 വീടാണ് നൽകുന്നത്. ലോ​ഗോ എപ്പിസ്‌കോപ്പൽ സുന്നഹദോസ് സെക്രട്ടറി ഡോ. യൂഹാനോൻ മാർ ക്രിസോസ്‌റ്റമോസ് മെത്രാപോലീത്താ അൽമായ ട്രസ്‌റ്റി റോണി വർ​ഗീസ് ഏബ്രഹാമിന് നൽകി പ്രകാശിപ്പിച്ചു. ആന്റോ ആന്റണി എംപി, മാത്യു ടി തോമസ് എംഎൽഎ, അസോസിയേഷൻ സെക്രട്ടറി അഡ്വ. ബിജു ഉമ്മൻ, സെമിനാരി മാനേജർ ഫാ. എൽദോസ് ഏലിയാസ്, ഫാ. എം സി പൗലോസ്, പഞ്ചായത്ത് പ്രസിഡന്റുമാരായ നിഷ അശോകൻ, ടി വി രത്നകുമാരി, പഞ്ചായത്തംഗം വിമല ബെന്നി, മത്തായി ടി വർ​ഗീസ്, മാത്യു ഉമ്മൻ അരികുപുറം, ജോസ് പുത്തൻപുരയിൽ, മനോജ് പി ജോർജ്, എന്നിവർ സംസാരിച്ചു.