ചുവപ്പാണ്‌ കഞ്ഞിക്കുഴിയുടെ കാതൽ

സുജിത്‌ദാസ്‌

കഞ്ഞിക്കുഴി

ബ്ലോക്ക്‌ രൂപീകരണം മുതൽ എൽഡിഎഫിനെ നെഞ്ചേറ്റിയ ജനത പിന്നീടൊരിക്കലും കൈവിട്ടില്ല. വികസന സ്വപ്‌നങ്ങൾ സാക്ഷാൽക്കരിച്ചവരെയും കൂടെ നിന്നവരെയുമല്ലാതെ മറ്റൊരു മുന്നണിയെ കഞ്ഞിക്കുഴിയിൽ സങ്കൽപ്പിക്കാൻ പോലുമാവില്ല വോട്ടർമാർക്ക്‌. ആ വികസനങ്ങളുടെ തുടർച്ചയാണ് ആലപ്പുഴയുടെ കാർഷിക ഗ്രാമം ആഗ്രഹിക്കുന്നത്‌. ബ്ലോക്ക്‌ പഞ്ചായത്ത്‌ സ്ഥാനാർഥികൾക്ക്‌ ലഭിക്കുന്ന പ്രതികരണങ്ങളും അത്തരത്തിലാണ്‌. മാരാരിക്കുളം വടക്ക്, ചേർത്തല തെക്ക്, തണ്ണീർമുക്കം, കഞ്ഞിക്കുഴി, കടക്കരപ്പള്ളി പഞ്ചായത്തുകൾ ചേർന്നതാണ് കഞ്ഞിക്കുഴി ബ്ലോക്ക്. 13 ഡിവിഷനുകളിൽ എൽഡിഎഫ്– 12, യുഡിഎഫ് –ഒന്ന്‌ എന്നിങ്ങനെയാണ് കക്ഷിനില. ഇത്തവണ 14 ഡിവിഷനായി. ഓരോ വോട്ടറെയും നേരിൽകണ്ടാണ് വോട്ടഭ്യർഥന. ബ്ലോക്കിന്റെയും എൽഡിഎഫ്‌ സർക്കാരിന്റെയും നേട്ടങ്ങൾ എണ്ണിപ്പറഞ്ഞാണ്‌ വോട്ട് തേടുന്നത്. ബ്ലോക്ക് പഞ്ചായത്ത് പദ്ധതിയിൽ ഉൾപ്പെടുത്തി നിർമിച്ച കായാമ്പൂ വയോജനസൗഹൃദ റേഡിയോ പാർക്ക് പ്രധാന പദ്ധതികളിലൊന്നാണ്‌. 20 സ്കൂളുകൾക്ക് വാട്ടർ പ്യൂരിഫയർ വിതരണംചെയ്തു. പരിസ്ഥിതി സംരക്ഷണത്തിനും ആരോഗ്യ സംരക്ഷണത്തിനും വിവിധ പദ്ധതികൾ ചെയ്ത്‌ നടപ്പാക്കി. ആരോഗ്യമേഖലയിൽ അടിസ്ഥാന സൗകര്യങ്ങൾ ഒരുക്കി. ആർദ്രം പദ്ധതിയിൽ കെട്ടിടങ്ങൾ നിർമിച്ചു. മില്ലറ്റ് കൃഷി വ്യാപിപ്പിച്ചു. കരപ്പുറം ഓണവിസ്മയം ഘോഷയാത്രയും സംസ്കാരിക സമ്മേളനവും സ്റ്റാളുകളും ശ്രദ്ധേയമായവയാണ്‌. പച്ചക്കറിക്കൃഷി വ്യാപിപ്പിക്കാൻ കുട്ടികൾക്കും വീട്ടമ്മമാർക്കും പരിശീലനം നൽകി. കൃഷിയും ആരംഭിച്ചു. ഭിന്നശേഷിക്കാർക്ക്‌ വാഹനം വിതരണംചെയ്‌തു. സേഫ് പദ്ധതി പ്രകാരം വീടുകൾ പുനരുദ്ധരിച്ച്‌ താക്കോൽ കൈമാറി.