ശുഭാംശുവുമായി സംവാദം; സസന്തോഷം നിള

ചാരുംമൂട്

അന്താരാഷ്‌ട്ര ബഹിരാകാശ നിലയത്തിൽ എത്തിയ ഇന്ത്യയുടെ ബഹിരാകാശ യാത്രികൻ ശുഭാംശു ശുക്ലയുമായി സംവദിക്കാൻ അവസരം ലഭിച്ചതിന്റെ സന്തോഷത്തിലാണ് ചത്തിയറ വിഎച്ച്എസ്എസ് എട്ട-ാം ക്ലാസ് വിദ്യാർഥിനി നിള. തിരുവനന്തപുരം വിക്രം സാരാഭായ് സ്‌പേസ് സെന്ററിൽ സംഘടിപ്പിച്ച പരിപാടിയിൽ സംസ്ഥാനത്തെ വിവിധ സ്‌കൂളുകളിൽനിന്ന്‌ തെരഞ്ഞെടുത്ത വിദ്യാർഥികൾക്കൊപ്പമാണ് നിളയും പങ്കെടുത്തത്. ബഹിരാകാശ നിലയത്തിൽനിന്ന്‌ ഹാം റേഡിയോ വഴിയാണ് ശുഭാംശു കുട്ടികളുമായി സംസാരിച്ചത്. പൊതുവിദ്യാലയങ്ങൾ, കേന്ദ്രീയ വിദ്യാലയങ്ങൾ, നവോദയ വിദ്യാലയങ്ങൾ എന്നിവിടങ്ങളിലെ കുട്ടികളാണ്‌ സംഘത്തിലുണ്ടായിരുന്നത്‌. താമരക്കുളം നെടിയത്ത് കംപ്യൂട്ടർ ഗ്രാഫിക്‌സ്‌ ഡിസൈനറായ ദിലീപിന്റെയും സീമയുടെയും മകളാണ് നിള.