മുതുകുളത്ത്‌ വീണ്ടും മുന്നേറാൻ

ജി അനിൽ

കാർത്തികപ്പള്ളി

നാടിന്റെ പൾസറിഞ്ഞ്‌ നടത്തിയ ജനോപകാരപ്രദമായ പദ്ധതികളുടെ തുടർച്ചയ്‌ക്ക്‌ മുതുകുളത്തെ വോട്ടർമാർ തുടർഭരണത്തിൽ കുറഞ്ഞതൊന്നും ആഗ്രഹിക്കുന്നില്ല. വോട്ടഭ്യർഥിച്ച്‌ വീടുകളിലെത്തുന്ന എൽഡിഎഫ്‌ സ്ഥാനാർഥികളേയും പ്രവർത്തകരേയും സ്‌നേഹത്തോടെ സ്വീകരിക്കുന്നു. കഴിഞ്ഞ വർഷങ്ങളിൽ നടപ്പാക്കിയ വികസനത്തിന്റെ ആത്‌മവിശ്വാസത്തിലാണ്‌ സ്ഥാനാർഥികളും. കഴിഞ്ഞ തവണ 14ൽ 12 സീറ്റ് ഭൂരിപക്ഷത്തിലാണ് എൽഡിഎഫ് അധികാരത്തിലെത്തിയത്. രണ്ട്‌ സീറ്റാണ്‌ യുഡിഎഫിന്‌ ലഭിച്ചത്‌. പുതിയതായി രൂപീകരിച്ച എരുവ ഡിവിഷനടക്കം 15ലും ഇത്തവണ വിജയിക്കുമെന്ന ആത്മവിശ്വാസത്തിലാണ്‌ എൽഡിഎഫ്‌. മുതുകുളം, ആറാട്ടുപുഴ, ചിങ്ങോലി, ചേപ്പാട്, പത്തിയൂർ, കണ്ടല്ലൂർ, ദേവികുളങ്ങര, കൃഷ്ണപുരം പഞ്ചായത്തുകൾ ചേര്‍ന്നതാണ് മുതുകുളം ബ്ലോക്ക്. പഞ്ചായത്ത് കൺവൻഷനുകൾ പൂർത്തിയാക്കിയ എൽഡിഎഫ് വാർഡ് കൺവൻഷനുകളിലേക്ക് കടന്നു. ബ്ലോക്കിലെ 15 ഡിവിഷനുകളിലും ജനകീയരായ സ്ഥാനാർഥികൾ അണിനിരന്നതോടെ പ്രചാരണത്തിൽ മറ്റ്‌ മുന്നണികളേക്കാൾ എൽഡിഎഫ്‌-്‌ ബഹുദൂരം മുന്നിലെത്തി. കഴിഞ്ഞ വർഷങ്ങളിൽ കാർഷിക, ക്ഷീര, മൃഗസംരക്ഷണ, വ്യവസായ മേഖലകളുടെ ഉന്നമനത്തിയായി ഒട്ടനവധി പദ്ധതികൾ നടപ്പാക്കി. ബ്ലോക്ക് പരിധിയിൽ വരുന്ന പഞ്ചായത്തുകളെ തരിശുരഹിതമാക്കുന്നതിന് എല്ലാ പഞ്ചായത്തുകളിലും അത്യുൽപ്പാദന ശേഷിയുള്ള വിത്തിനങ്ങളുടെ കൃഷിവ്യാപനം സാധ്യമാക്കി. ക്ഷീര ഫാം ആധുനികവൽക്കരണം, വനിതകൾക്ക് ഇരുചക്രവാഹനവും കറവ യന്ത്രവും വാങ്ങി മൊബൈൽ മിൽക്ക് യൂണിറ്റ് തുടങ്ങിയ ഒട്ടനവധി പദ്ധതികൾ നടപ്പാക്കി. സ്വകാര്യ വ്യവസായ യൂണിറ്റുകൾക്കായി വ്യവസായ കോംപ്ലക്സ് സ്ഥാപിച്ചു. 3362 വ്യവസായ സംരംഭങ്ങൾ മുതുകുളം ബ്ലോക്ക് പരിധിയിൽ ആരംഭിച്ചു. 151 വനിതാ കയർപിരി യൂണിറ്റുകൾക്ക് 46 ലക്ഷം രൂപയും 31 വനിതാ സംരംഭക യൂണിറ്റുകൾക്ക് 63.1 ലക്ഷം രൂപയും അനുവദിച്ചു. ഇതുവഴി 750 ൽ പരം വനിതകൾക്ക് തൊഴിൽ ഉറപ്പാക്കി.