നാട്‌ നിശ്‌ചലം

ആലപ്പുഴ

കേന്ദ്രസർക്കാരിന്റെ തൊഴിലാളിദ്രോഹ, കർഷകവിരുദ്ധ നയങ്ങൾക്കെതിരെ കേന്ദ്ര ട്രേഡ്‌ യൂണിയനുകളും ജീവനക്കാരുടെ ഫെഡറേഷനുകളും സംഘടിപ്പിച്ച അഖിലേന്ത്യാ പണിമുടക്ക്‌ പൂർണം. ജില്ലയിൽ കട–-കമ്പോളങ്ങൾ അടഞ്ഞുകിടന്നു. സർക്കാർ ഓഫീസുകളും പൊതുമേഖലാ സ്ഥാപനങ്ങളും സ്വകാര്യസ്ഥാപനങ്ങളുംബുധനാഴ്‌ച പ്രവർത്തിച്ചില്ല. വിദ്യാലയങ്ങൾക്ക് അധികൃതർ അവധി നൽകിയിരുന്നു. ഇരുചക്രവാഹനങ്ങൾ മാത്രമാണ്‌ നിരത്തിലിറങ്ങിയത്‌. കെഎസ്‌ആർടിസിയും ജലഗതാഗതവകുപ്പും സർവീസ്‌ നടത്തിയില്ല. അനിഷ്‌ടസംഭവങ്ങൾ ഒന്നുമുണ്ടായില്ല. ആലപ്പുഴ മുല്ലയ്‌ക്കൽ തെരുവും ഡാറാസ്‌ മാർക്കറ്റും വിജനമായി മാധ്യമപ്രവർത്തകരും ജീവനക്കാരും പൊതുപണിമുടക്കിന്‌ ഐക്യദാർഢ്യം പ്രകടിപ്പിച്ചു. പണിമുടക്കിയ തൊഴിലാളികൾ വിവിധ കേന്ദ്രങ്ങളിൽ പ്രകടനം നടത്തി. ആലപ്പുഴ പട്ടണത്തിൽ നൂറുകണക്കിന്‌ തൊഴിലാളികൾ അണിചേർന്ന പ്രകടനം അമ്പലപ്പുഴ താലൂക്ക്‌ ചെത്തുതൊഴിലാളി യൂണിയൻ ഓഫീസിന്‌ മുന്നിൽനിന്ന്‌ ആരംഭിച്ചു. ബിഎസ്‌എൻഎൽ ഓഫീസിന്‌ മുന്നിൽ യോഗം സിഐടിയു ജനറൽ കൗൺസിൽ അംഗം ആർ നാസർ ഉദ്‌ഘാടനംചെയ്‌തു. പി വി സത്യനേശൻ അധ്യക്ഷനായി. എംഎൽഎമാരായ പി പി ചിത്തരഞ്‌ജൻ, എച്ച് സലാം, മുൻ എംപി എ എം ആരിഫ്, ഡി പി മധു, അജയ സുധീന്ദ്രൻ, വി ബി അശോകൻ, എ എം ഷിറാസ്, വി ടി രാജേഷ്, ആർ അനിൽകുമാർ തുടങ്ങിയവർ സംസാരിച്ചു. പി പി പവനൻ സ്വാഗതവും കെ ജെ പ്രവീൺ നന്ദിയും പറഞ്ഞു. ചാരുംമൂട്ടിൽ സിപിഐ എം കേന്ദ്രകമ്മിറ്റിയംഗം സി എസ്‌ സുജാത, അരൂരിൽ സിഐടിയു സംസ്ഥാന സെക്രട്ടറി സി ബി ചന്ദ്രബാബു, മാവേലിക്കരയിൽ കർഷകസംഘം ജില്ലാ പ്രസിഡന്റ്‌ ജി ഹരിശങ്കർ, കലവൂരിൽ സിപിഐ എം ജില്ലാ സെക്രട്ടറിയറ്റ്‌ അംഗം കെ ആർ ഭഗീരഥൻ, അമ്പലപ്പുഴയിൽ സി ഷാംജി, ചേർത്തലയിൽ എഐടിയുസി സംസ്ഥാന പ്രസിഡന്റ്‌ ടി ജെ ആഞ്ചലോസ്‌, രാമങ്കരിയിൽ സി പി ബ്രീവൻ തുടങ്ങിയവർ ഉദ്‌ഘാടനംചെയ്‌തു.