ഹൃദയപക്ഷം ചേർന്ന്‌ ഹരിപ്പാടും

ബിമൽറോയ്‌

ഹരിപ്പാട്

വീയപുരം, ചെറുതന, പള്ളിപ്പാട്, കരുവാറ്റ, കുമാരപുരം, കാർത്തികപ്പള്ളി, തൃക്കുന്നപ്പുഴ പഞ്ചായത്തുകൾ ഉൾപ്പെടുന്നതാണ്‌ ഹരിപ്പാട് ബ്ലോക്ക്‌ പഞ്ചായത്ത്. രൂപീകരിക്കപ്പെട്ടശേഷം ഒരിക്കലൊഴികെ മറ്റെല്ലാ തവണയും ഇടതോരം ചേർന്നുനിന്ന ഹരിപ്പാട് വികസനവിസ്‌മയം തീർത്ത എൽഡിഎഫ്‌ തന്നെ വീണ്ടും നയിക്കട്ടെ എന്ന ഉറച്ച നിലപാടിൽത്തന്നെയാണ്‌. ഭരണത്തുടർച്ചയ-്‌ക്കായി അടിയുറച്ച പ്രചാരണവുമായി മുന്നേറുകയാണ്‌ എൽഡിഎഫ് സ്ഥാനാർഥികൾ. പൊതുപ്രവർത്തനത്തിൽ സജീവസാന്നിധ്യമായ, വിദ്യാസമ്പന്നരായ സ്ഥാനാർഥികളാണ്‌ എൽഡിഎഫിനെ പ്രതിനിധീകരിക്കുന്നത്‌. സ്ഥാനാർഥികളെ നേരത്തെ നിശ്ചയിച്ച്‌ ചിട്ടയായ പ്രവർത്തനങ്ങളിലൂടെ പ്രചാരണമേറ്റെടുക്കാൻ സാധിച്ച എൽഡിഎഫ്‌, വോട്ടർമാരെ പലതവണ കണ്ട്‌ വോട്ടുറപ്പിച്ചുകഴിഞ്ഞു. അതേസമയം ഗ്രൂപ്പുകളികളിൽ വലഞ്ഞ യുഡിഎഫും കടമെടുത്ത സ്ഥാനാർഥികളുമായി മത്സരിക്കുന്ന എൻഡിഎയുമാണ്‌ എതിർപക്ഷത്ത്‌. എൽഡിഎഫ്‌ – 10 യുഡിഎഫ്‌ – മൂന്ന് എന്നതാണ് നിലവിലെ കക്ഷിനില. പുതുതായി വന്ന പല്ലന ഡിവിഷനും ചേർത്ത്‌ ആകെ 14 ഡിവിഷനുകളാണ്‌ ബ്ലോക്കിൽ. കഴിഞ്ഞവർഷങ്ങളിൽ സമസ്‌തമേഖലയിലും വികസനമെത്തിക്കാൻ കഴിഞ്ഞ ആത്മവിശ്വാസത്തിലാണ്‌ എൽഡിഎഫ്‌ വീണ്ടും ജനവിധിക്കൊരുങ്ങുന്നത്‌. ലൈഫ് മിഷനിൽ 3.46 കോടിയും പിഎംഎവൈ പദ്ധതിയിലൂടെ 175 ഗുണഭോക്താക്കൾക്ക് 1.96 കോടിയും നൽകി. ശുദ്ധജലം ജനാവകാശമാക്കി പ്രവർത്തനങ്ങൾ ഏറ്റെടുത്തു. തൃക്കുന്നപ്പുഴ സിഎച്ച്സി, വിവിധ ഹയർ സെക്കൻഡറി സ-്‌കൂളുകൾ, നന്ദകേരി ഉന്നതി എന്നിവിടങ്ങളിൽ ആർഒ പ്ലാന്റുകളും മിനി കുടിവെള്ള പദ്ധതിയും, 110 റോഡുകൾ, നൂറിലധികം നടപ്പാതകൾ, ആറ് മിനി എംസിഎഫുകൾ എന്നിവ സ്ഥാപിച്ചു. 3500 ഹെക-്ടർ നെൽകൃഷിക്ക് സബ്‌സിഡി നൽകി. കേരഹരിതം, മൃഗസംരക്ഷണം, കുടുംബശ്രീ, ജെഎൽജി സഹായം, 22 കുളത്തിന്റെ നവീകരണം എന്നീ പദ്ധതികളും നടപ്പാക്കി. പ്രകൃതിദുരന്തങ്ങൾ നേരിടാൻ ബ്ലോക്കുതലത്തിൽ ദുരന്തസേനകൾ രൂപീകരിച്ചു. തൃക്കുന്നപ്പുഴ സിഎച്ച്സി-യിൽ 20 ലക്ഷം രൂപ ചെലവിൽ അനുബന്ധ സൗകര്യങ്ങളും ഒരുക്കി.