കുടിവെള്ളക്ഷാമം: സൂപ്രണ്ടിങ്  എൻജിനിയറുടെ ഓഫീസ് ഉപരോധിച്ചു

പൊന്നുരുന്നി, തൈക്കൂടം, പൂണിത്തുറ പ്രദേശങ്ങളിലെ രൂക്ഷമായ കുടിവെള്ളക്ഷാമത്തിന് പരിഹാരം കാണണമെന്നാവശ്യപ്പെട്ട് സിപിഐ എം വൈറ്റില ലോക്കൽ കമ്മിറ്റിയുടെ നേതൃത്വത്തിൽ നാട്ടുകാർ എറണാകുളം സൂപ്രണ്ടിങ് എൻജിനീയറുടെ ഓഫീസ് ഉപരോധിക്കുന്നു

വെബ് ഡെസ്ക്

Published on Aug 10, 2025, 02:41 AM | 1 min read

കൊച്ചി

പൊന്നുരുന്നി, തൈക്കൂടം, പൂണിത്തുറ പ്രദേശങ്ങളിലെ രൂക്ഷമായ കുടിവെള്ളക്ഷാമം പരിഹരിക്കണമെന്ന്‌ ആവശ്യപ്പെട്ട്‌ സിപിഐ എം വൈറ്റില ലോക്കൽ കമ്മിറ്റിയുടെ നേതൃത്വത്തിൽ നാട്ടുകാർ ജല അതോറിറ്റി എറണാകുളം സൂപ്രണ്ടിങ് എൻജിനിയറുടെ ഓഫീസ് ഉപരോധിച്ചു. കൗൺസിലർ അഡ്വ. ദിപിൻ ദിലീപ് ഉദ്ഘാടനംചെയ്തു.

കോർപറേഷൻ 17 ലക്ഷം രൂപ മുടക്കി പുതുതായി പൈപ്പുകൾ മാറ്റിസ്ഥാപിച്ചിട്ടും പ്രശ്നപരിഹാരമായില്ല. ജല അതോറിറ്റിയിലെ ചില ഉദ്യോഗസ്ഥരുടെ അനാസ്ഥയാണ്‌ പ്രതിസന്ധിക്ക്‌ കാരണമെന്നും നേതാക്കൾ ആരോപിച്ചു. കുടിവെള്ളക്ഷാമം ഉടൻ പരിഹരിക്കുമെന്ന്‌ സൂപ്രണ്ടിങ് എൻജിനിയർ ഉറപ്പുനൽകിയതോടെയാണ്‌ ഉപരോധം അവസാനിപ്പിച്ചത്‌. തൃക്കാക്കര ഏരിയ കമ്മിറ്റി അംഗം പി ആർ സത്യൻ, ലോക്കൽ സെക്രട്ടറി പി ബി സുധീർ, എം ടി മഹേഷ്, ടി പി രമേഷ്, എ ജി സിജോ എന്നിവർ സംസാരിച്ചു.