അടി, അഴിമതി : അടിപതറി യുഡിഎഫ്‌, ബിജെപി
കൊച്ചി
കോർപറേഷൻ തെരഞ്ഞെടുപ്പിൽ വിമതശല്യവും അധികാരമുള്ളപ്പോൾ നടത്തിയ അഴിമതിയും പോരും തിരിച്ചടിയാകുമെന്ന ഭയത്തിൽ യുഡിഎഫ്‌. സിറ്റിങ്‌ ക‍ൗൺസിലർമാർ, മുൻ ഡെപ്യൂട്ടിമേയർ, നിയോജകമണ്ഡലം ചെയർമാൻ ഉൾപ്പെടെ വിമതരുടെ നീണ്ടനിരയുണ്ട്‌. ഇതിനുപുറമെയാണ്‌ ഭരണമുള്ളപ്പോൾ നടത്തിയ അഴിമതികളും വോട്ടർമാർക്കിടയിൽ ചർച്ചയാകുന്നത്‌.
ഇ ഗവേണൻസ്‌, തുരുത്തി ഭവന പദ്ധതി, ബ്രഹ്മപുരം ഉൾപ്പെടെ അഴിമതിക്കുള്ള അവസരമാക്കുകയായിരുന്നു നഗരം ഭരിച്ച യുഡിഎഫ്‌. പത്ത്‌ വർഷം ഭരണമുണ്ടായിട്ടും ആസ്ഥാനമന്ദിരം ഉൾപ്പെടെ യാഥാർഥ്യമാക്കാനായില്ല. മേയർ സ്ഥാനത്തിനായുള്ള അടിയും പോരിന്റെ ഭാഗമായുള്ള സ്ഥിരംസമിതി അധ്യക്ഷരുടെ രാജിയുമാണ്‌ അന്ന്‌ നടന്നത്‌. നഗരം മുങ്ങിയപ്പോൾ കോർപറേഷൻ പിരിച്ചിവിട്ടുകൂടെയെന്ന്‌ ഹൈക്കോടതി ചോദിക്കുന്നസ്ഥിതിയുണ്ടായി.
ഇത്തവണ തെരഞ്ഞെടുപ്പിനുമുന്പേ അടിതുടങ്ങി. യുഡിഎഫിന്‌ 13 ഇടങ്ങളിലാണ്‌ വിമതസ്ഥാനാർഥികളുള്ളത്‌. സിറ്റിങ്‌ ക‍ൗൺസിലർമാരായ മാലിനിക്കുറുപ്പ്‌, ബാസ്‌റ്റിൻ ബാബു, മുൻ ഡെപ്യൂട്ടി മേയർ പ്രേമകുമാർ, മുൻ ക‍ൗൺസിലറും യുഡിഎഫ്‌ തൃക്കാക്കര നിയോജകമണ്ഡലം ചെയർമാനുമായ ജോസഫ്‌ അലക്‌സ്‌ ഉൾപ്പെടെയുള്ളവരാണ്‌ വിമതർ. പെട്ടിതാങ്ങികൾക്കാണ്‌ നേതൃത്വം സീറ്റ് നൽകിയതെന്ന്‌ തുറന്നടിച്ചാണ്‌ ബാസ്‌റ്റിൻ പാർടിവിട്ടതും വിമതനായി മത്സരിക്കുന്നതും. പാലാരിവട്ടത്ത്‌ സ്ഥാനാർഥിയാക്കാമെന്ന്‌ പറഞ്ഞ പ്രതിപക്ഷനേതാവ്‌ വി ഡി സതീശൻ വഞ്ചിച്ചെന്ന്‌ വെളിപ്പെടുത്തിയാണ്‌ ജോസഫ്‌ അലക്‌സ്‌ മത്സരിക്കുന്നത്‌. കെ ബാബു ഒതുക്കിയെന്ന്‌ പ്രേമകുമാറും പറഞ്ഞു.
മേയർ കസേര സ്വപ്‌നംകാണുന്ന ദീപ്‌തി മേരി വർഗീസ്‌, വി കെ മിനിമോൾ, ഷൈനി മാത്യു എന്നിവരും ഇവരുടെ അണികളും തമ്മിലുള്ള അടിയും തുടങ്ങിക്കഴിഞ്ഞു. ദീപ്‌തി പിആർ വർക്കും ഫോട്ടോ ഷൂട്ടും നേരത്തേ ആരംഭിച്ചു. ഷൈനി മാത്യു കാശുനൽകിയാണ്‌ ഇക്കുറിയും സീറ്റ് വാങ്ങിയതെന്ന പ്രചാരണവും നടക്കുന്നു. ജനറൽ സീറ്റായിട്ടും ജോസഫ്‌ അലക്‌സിന്‌ സീറ്റ് നൽകാതെ മിനിമോൾ പാലാരിവട്ടം ഡിവിഷൻ പിടിച്ചുവാങ്ങിയതും ചർച്ചയാണ്‌.
യുവാക്കൾക്ക്‌ അവസരം നൽകാത്തതിൽ യൂത്ത്‌ കോൺഗ്രസും പ്രതിഷേധത്തിലാണ്‌. നാലുപേരുടെ പേര്‌ നൽകിയെങ്കിലും ഒന്നുപോലും പരിഗണിച്ചില്ലെന്ന്‌ യൂത്ത്‌ കോൺഗ്രസ്‌ സംസ്ഥാന സെക്രട്ടറി സഞ്‌ജയ്‌ ജയിംസ്‌ പറഞ്ഞിരുന്നു.
ബിജെപിയുടെ സ്ഥിതിയും വ്യത്യസ്‌തല്ല. മുൻ സംസ്ഥാന വൈസ്‌പ്രസിഡന്റും 32 വർഷം ക‍ൗൺസിലറുമായ ശ്യാമള എസ് പ്രഭു പാർടി വിട്ടതും നേതൃത്വത്തിന്‌ എതിരെ ആഞ്ഞടിച്ചതും വിമതയായി രംഗത്തെത്തിയതും ബിജെപിയെ പ്രതിരോധത്തിലാക്കി. സകല വൃത്തികേടും ചെയ്യുന്നവരാണ് ജില്ലാനേതാക്കളെന്നും പാര്‍ടിയില്‍ അഹോരാത്രം പ്രവര്‍ത്തിച്ചവര്‍ക്ക് സീറ്റ് കൊടുക്കാതെ, വിരുദ്ധര്‍ക്കാണ് സീറ്റ് നല്‍കിയതെന്നും ശ്യാമള പറഞ്ഞു. അഞ്ച്‌ ഡിവിഷനുകളിൽ ബിജെപിക്ക്‌ സ്ഥാനാർഥികളില്ല. ഇവിടങ്ങളിൽ ശക്തിയില്ലാത്തതുകൊണ്ടാണ്‌ മത്സരിക്കാത്തതെന്നാണ്‌ നേതൃത്വത്തിന്റെ ന്യായം.
ഘടകക്ഷിയായ ബിഡിജെഎസുമായി സീറ്റ് വിഭജനത്തിലുണ്ടായ തർക്കങ്ങളും അസ്വാരസ്യങ്ങളും ഇനിയും നീങ്ങിയിട്ടില്ല. സ്ഥാനാർഥിപ്രഖ്യാപനം ബഹിഷ്‌കരിക്കുകയും എൻഡിഎ യോഗത്തിൽനിന്ന്‌ ബിഡിജെഎസ്‌ ഇറങ്ങിപ്പോകുന്ന സ്ഥിതിയുമുണ്ടായി.
Related News
Dont Miss it
0 comments