മുനന്പം സമരം ഇന്ന്‌ അവസാനിപ്പിക്കും

കൊച്ചി

മുനന്പം ഭൂമി പ്രശ്‌നം ഉന്നയിച്ച്‌ തീരജനത 413 ദിവസമായി നടത്തുന്ന സമരം ഞായറാഴ്‌ച അവസാനിപ്പിക്കും. തീരജനത നടത്തുന്ന പോരാട്ടത്തിനൊപ്പം സംസ്ഥാന സർക്കാരുണ്ടെന്ന അനുഭവത്തിന്റെ അടിസ്ഥാനത്തിലാണ്‌ സമരം അവസാനിപ്പിക്കാൻ മുനന്പം ഭൂസംരക്ഷണസമിതി തീരുമാനിച്ചത്‌. പകൽ 2.30ന്‌ മന്ത്രി പി രാജീവ്‌, കെ എൻ ഉണ്ണിക്കൃഷ്‌ണൻ എംഎൽഎ എന്നിവരുടെയടക്കം സാന്നിധ്യത്തിലാണ്‌ സമരം അവസാനിപ്പിക്കുന്നത്‌.

​2024 സെപ്‌തംബർ 27നാണ്‌ നിരാഹാരം ഉൾപ്പെടെയുള്ള പ്രത്യക്ഷസമരങ്ങൾ ആരംഭിച്ചത്‌.

വഖഫ്‌ തർക്കത്തിന്റെ പേരിൽ മുനന്പത്തുനിന്ന്‌ ആരെയും കുടിയിറക്കില്ലെന്ന നിലപാടാണ്‌ സർക്കാറിന്റേത്‌. ഇക്കാര്യം മുഖ്യമന്ത്രി പിണറായി വിജയൻതന്നെ സമരസമിതിയെ അറിയിച്ചതിന്‌ പിന്നാലെയാണ്‌ റിട്ട. ജസ്‌റ്റിസ്‌ സി എൻ രാമചന്ദ്രൻനായരെ ജുഡീഷ്യൽ കമീഷനായി നിയമിച്ചത്‌.

മുനന്പം നിവാസികൾ താമസിക്കുന്ന ഭൂമിയിൽ അവർക്കുള്ള അവകാശങ്ങൾ കമീഷൻ റിപ്പോർട്ടിലൂടെ ആവർത്തിച്ചുറപ്പിച്ചു. എന്നാൽ, കമീഷന്റെ ആധികാരികത ഹൈക്കോടതി സിംഗിൾ ബെഞ്ച്‌ ചോദ്യംചെയ്‌തു. സർക്കാർ സമർപ്പിച്ച അപ്പീലിൽ മുനന്പത്തേത്‌ വഖഫ്‌ ഭൂമിയല്ലെന്ന സുപ്രധാന വിധി കഴിഞ്ഞ ഒക്‌ടോബർ 10ന്‌ ഡിവിഷൻ ബെഞ്ചിൽനിന്നുണ്ടായി.

ഹൈക്കോടതിയുടെ ഇ‍ൗ തീർപ്പ്‌ തന്നെയാണ്‌ മുനന്പത്തെ ജനങ്ങൾക്ക്‌ കരമടക്കാമെന്ന നവംബർ 26ലെ ഇടക്കാല ഉത്തരവിലേക്കും നയിച്ചത്‌. 2022ൽ വഖഫ്‌ സംരക്ഷണസമിതിയുടെ ഹർജിയിലൂടെ തടസ്സപ്പെട്ട റവന്യു അവകാശങ്ങൾ പുനഃസ്ഥാപിച്ചുള്ള വിധി അത്യാഹ്ലാദത്തോടെയാണ്‌ തീരജനത വരവേറ്റത്‌.

ഭൂസംരക്ഷണസമിതിയുടെ ആവശ്യങ്ങൾ അനുവദിക്കണമെന്നാവശ്യപ്പെട്ട്‌ അഡ്വക്കറ്റ്‌ ജനറൽതന്നെ കോടതിമുന്പാകെ ഹാജരായി. രണ്ട്‌ വിധികളുടെയും വെളിച്ചത്തിൽ മുനന്പം കമീഷൻ റിപ്പോർട്ടിലെ തുടർനടപടികൾ വേഗത്തിലാക്കുമെന്ന മന്ത്രി പി രാജീവിന്റെ ഉറപ്പും തീരജനതയ്‌ക്കുണ്ട്‌.​

മുതലെടുപ്പുകാരുടെ 
കാപട്യം വെളിപ്പെട്ടു

​

സമരത്തിന്റെ ആരംഭകാലത്ത്‌ മുനന്പംജനതയുടെ സംരക്ഷകരായി വന്ന പലരുടെയും യഥാർഥമുഖം പിന്നീട്‌ വെളിവാക്കപ്പെട്ടു. കേന്ദ്രമന്ത്രിമാർമുതൽ ബിജെപിയുടെയും കോൺഗ്രസിന്റെയും ദേശീയ, സംസ്ഥാന നേതാക്കൾവരെയുള്ളവർ ഒരുഘട്ടത്തിൽ സമരപ്പന്തലിലേക്ക്‌ ഒഴുകി.

എന്നാൽ, വഖഫ്‌ ഭേദഗതി ബിൽ പാസായതിന്‌ പിന്നാലെ കേന്ദ്രമന്ത്രി കിരൺ റിജിജു കൊച്ചിയിൽ നടത്തിയ വെളിപ്പെടുത്തൽ ബിജെപിയുടെ കാപട്യം തുറന്നുകാട്ടി. നിയമഭേദഗതി മുനന്പം വിഷയത്തിന്‌ പരിഹാരമല്ലെന്നായിരുന്നു കേന്ദ്രമന്ത്രിയുടെ ഏറ്റുപറച്ചിൽ.

മുനന്പം ഭൂമി വഖഫ് ബോർഡിന്റേതാണെന്ന് പ്രഖ്യാപിച്ചത് പാണക്കാട് റഷീദലി തങ്ങൾ ബോർഡ്‌ ചെയർമാനായിരിക്കെയാണെന്നത്‌ യുഡിഎഫിനെ പ്രതിരോധത്തിലാക്കി. നിയമവിരുദ്ധ കരാറുണ്ടാക്കി ഈ ഭൂമി വിറ്റത് കെപിസിസി സെക്രട്ടറിയായിരുന്ന എം വി പോളാണെന്നും വെളിപ്പെട്ടു. കരമടയ്‌ക്കാൻ അനുമതി നൽകിയതിനെതിരെ നിയമസഭയിൽ സബ്‌മിഷൻ കൊണ്ടുവന്നത്‌ ലീഗ്‌ നേതാവ്‌ കെ പി എ മജീദാണെന്നതും യുഡിഎഫ്‌ നിലപാടിലെ ഇരട്ടത്താപ്പ്‌ തുറന്നുകാട്ടി.