ജനങ്ങൾക്ക് ഇൻഷുറൻസ്‌ പരിരക്ഷ, 100 ഏക്കറിൽ പച്ചക്കറിക്കൃഷി

പെരുമ്പാവൂര്‍

ഉൽപ്പാദനം, വിദ്യാഭ്യാസം, ആരോഗ്യം, ഭവനപദ്ധതി എന്നിവയ്ക്ക്‌ പ്രാധാന്യം നൽകി പെരുമ്പാവൂര്‍ നഗരസഭയിൽ എൽഡിഎഫ് പ്രകടനപത്രിക പ്രകാശിപ്പിച്ചു. എല്ലാ ജനങ്ങൾക്കും ഇൻഷുറൻസ് പരിരക്ഷ ഉറപ്പുവരുത്തും. ഉൽപ്പാദന മേഖലയെ ശക്തിപ്പെടുത്താൻ തരിശ്‌ നെല്‍പ്പാടങ്ങള്‍ കൃഷിയോഗ്യമാക്കും. സ്വയംസഹായ സംഘങ്ങളെയും കുടുംബശ്രീയെയും ഇതിനായി ഉപയോഗപ്പെടുത്തും.

രണ്ടുവർഷത്തിനുള്ളിൽ 100 ഏക്കർ ഭൂമി പച്ചക്കറിക്കൃഷിക്ക് ഉപയുക്തമാക്കിയെടുക്കും. പച്ചക്കറികള്‍ വിൽക്കാൻ സ്ഥിരംകേന്ദ്രം രൂപീകരിക്കും. സ്‌കൂളുകളില്‍ സ്മാര്‍ട്ട് ക്ലാസ്‌മുറികൾ നിര്‍മിക്കും. നഗരസഭാ ലൈബ്രറിയില്‍ ഇ–-റീഡിങ്‌ സംവിധാനം ഒരുക്കി റഫറന്‍സ് ലൈബ്രറിയായി ഉയര്‍ത്തും. താലൂക്ക് ആശുപത്രി അന്താരാഷ്ട്ര നിലവാരത്തില്‍ പുതുക്കിപ്പണിയും. പാലിയേറ്റീവ് കെയറിനുവേണ്ടി 24 മണിക്കൂറും പ്രവര്‍ത്തിക്കുന്ന കേന്ദ്രം രൂപീകരിക്കും.

സമ്പൂര്‍ണ പാര്‍പ്പിടനിര്‍മാണം, നഗരഗതാഗതം സുഗമമാക്കല്‍, വ്യവസായ വികസനത്തിനായി റയോണ്‍സ് ഭൂമിയില്‍ ഇലക്‌ട്രോണിക്‌സ് പാര്‍ക്ക് എന്നിവ നടപ്പാക്കും. ടൂറിസം, ജലസംരക്ഷണം, ശുചിത്വ പെരുമ്പാവൂര്‍, തൊഴിലുറപ്പുപദ്ധതി, പട്ടികജാതിവികസനം, സ്ത്രീശാക്തീകരണം, ഇതരസംസ്ഥാന തൊഴിലാളികള്‍ക്ക് സര്‍ക്കാരുമായി ചേര്‍ന്ന് പ്രത്യേക പദ്ധതികള്‍ രൂപീകരിക്കല്‍ എന്നിവയിലൂടെ പെരുമ്പാവൂരിനെ സുസ്ഥിര വികസന നഗരമാക്കും.

സിപിഐ എം ജില്ലാ കമ്മിറ്റി അംഗം എൻ സി മോഹനൻ പത്രിക പ്രകാശിപ്പിച്ചു. ഏരിയ സെക്രട്ടറി സി എം അബ്ദുള്‍ കരീം, മുനിസിപ്പൽ തെരഞ്ഞെടുപ്പ്‌ കമ്മിറ്റി കൺവീനർ വി പി ഖാദർ, എൽഡിഎഫ്‌ നേതാക്കളായ നിഖിൽ ബാബു, രമേശ് ചന്ദ്, സി കെ അസിം, ഏല്യാസ് മാത്യു, കെ പി റെജിമോന്‍, സി കെ രൂപേഷ് കുമാർ, പി സി ബാബു എന്നിവര്‍ സംസാരിച്ചു.