മാലിന്യസംസ്കരണത്തിന് വികേന്ദ്രീകൃത സംവിധാനം ​

കളമശേരി

കളമശേരി നഗരസഭയിൽ വലിയ അഴിമതി ആരോപണത്തിന് വിധേയമായ മാലിന്യസംസ്കരണത്തിന് വികേന്ദ്രീകൃത സംവിധാനമൊരുക്കുമെന്ന വാഗ്ദാനവുമായി എൽഡിഎഫ് തെരഞ്ഞെടുപ്പ് പ്രകടനപത്രിക ‘വികസനരേഖ' പ്രകാശിപ്പിച്ചു. ജിസിഡിഎ ചെയർമാൻ കെ ചന്ദ്രൻപിള്ള പ്രകാശിപ്പിച്ചു.

സിപിഐ മണ്ഡലം എക്സിക്യൂട്ടീവ് അംഗം എസ് രമേശൻ അധ്യക്ഷനായി. ​കളമശേരിയിലെ വ്യവസായ പ്രമുഖർ, റസിഡന്റ്‌സ്‌ അസോസിയേഷൻ ഭാരവാഹികൾ, വിദ്യാഭ്യാസ വിചക്ഷണർ, സാങ്കേതിക വിദഗ്‌ധർ, സാമൂഹ്യ സാംസ്കാരിക രംഗത്തെ പ്രഗത്ഭർ എന്നിവ പങ്കെടുത്ത യോഗമാണ് വികസനരേഖയ്‌ക്ക് രൂപംനൽകിയത്.

​30 വർഷത്തെ യുഡിഎഫ് ഭരണംകൊണ്ട് നഗരസഭയിൽ നേതാക്കൾ ഉൾപ്പെട്ട അഴിമതിയും വികസനമുരടിപ്പും കെടുകാര്യസ്ഥതയുമാണ് നിലനിൽക്കുന്നതെന്ന് വികസനരേഖ വിലയിരുത്തി.

കർശനനടപടികളിലൂടെ സ്വൈര്യജീവിതം തിരിച്ചുപിടിക്കുന്നതിനാണ് വികസനരേഖ മുൻഗണന നൽകുന്നത്.

വിദഗ്ധരുടെ സഹായത്തോടെ മാസ്റ്റർ പ്ലാൻ തയ്യാറാക്കി സമഗ്ര വികസനത്തിന് തുടക്കമിടും. വാർഡുകൾ കേന്ദ്രീകരിച്ച് ജനസേവനകേന്ദ്രങ്ങൾ സ്ഥാപിക്കും. ലൈഫ് പദ്ധതിയിൽ ഭൂരഹിതർക്കായി ഒരുവീടുപോലും അനുവദിക്കാത്ത നഗരസഭയിൽ എൽഡിഎഫ് വികസനരേഖ ലൈഫിന് മുഖ്യപരിഗണന നൽകുന്നു.

ചടങ്ങിൽ ഒളിമ്പ്യൻ മേഴ്സി കുട്ടൻ, സിപിഐ എം കളമശേരി ഏരിയ സെക്രട്ടറി കെ ബി വർഗീസ്, എൽഡിഎഫ് മുനിസിപ്പൽ കമ്മിറ്റി സെക്രട്ടറി വി എ സക്കീർ ഹുസൈൻ, കുസാറ്റ് മുൻ വിസി ഡോ. ആർ ശശിധരൻ, ഡോ. സി എ ബാബു, ഡോ. കെ അജിത, എ എം യൂസഫ്, കോൺഗ്രസ് എസ് ജില്ലാ സെക്രട്ടറി ടി എസ് ജോൺ, നഗരസഭാ എൽഡിഎഫ് കൺവീനർ എ എം ജമാൽ തുടങ്ങിയവർ സംസാരിച്ചു.