ആറൂർ ഗവ. ഹൈസ്കൂള്‍ ; സ്ഥലം വിട്ടുകിട്ടണമെന്ന വ്യക്തിയുടെ ആവശ്യം കോടതി തള്ളി

മൂവാറ്റുപുഴ

ആറൂർ ഗവ. ഹൈസ്കൂളിന്റെ സ്ഥലം വിട്ടുകിട്ടണമെന്ന വ്യക്തിയുടെ ആവശ്യം മൂവാറ്റുപുഴ അഡീഷണൽ ജില്ലാ കോടതി തള്ളി.

പാലക്കുഴ പഞ്ചായത്തിലെ ആറൂർ ഗവ. ഹൈസ്കൂളിന്റെ 69. 500 സെന്റ് വിട്ടുകിട്ടണമെന്ന് ആവശ്യപ്പെട്ട് പാലക്കുഴ വട്ടക്കാവിൽ ബാബു കുര്യാക്കോസ് നൽകിയ പരാതിയാണ് അഡീഷണൽ ജില്ലാ ജഡ്ജി കെ എൻ ഹരികുമാർ തള്ളി ഉത്തരവായത്. സ്ഥലം തന്റേതാണെന്നും വിട്ടുകിട്ടണമെന്നും സ്കൂൾ അധികൃതർ ഈ സ്ഥലത്ത് അതിക്രമിച്ച് കൈയേറരുതെന്നും നിർമാണപ്രവർത്തനങ്ങൾ നടത്തരുതെന്നും ആവശ്യപ്പെട്ട്  2000ൽ ഫയൽ ചെയ്ത കേസ് മൂവാറ്റുപുഴ മുൻസിഫ് കോടതി മുന്പ്‌ തള്ളിയതാണ്. തുടർന്ന്, മൂവാറ്റുപുഴ സബ്‌ കോടതിയിൽ അപ്പീൽ നൽകി. കേസ് പിന്നീട് പെരുമ്പാവൂർ സബ് കോടതിയിലേക്ക് മാറ്റി. പെരുമ്പാവൂർ കോടതി ഈ കേസ് തള്ളി ഉത്തരവായപ്പോൾ വീണ്ടും മൂവാറ്റുപുഴ സബ് കോടതിയിൽ പരാതി നൽകി. കോടതി തെളിവെടുത്ത് കേസ് വീണ്ടും തള്ളി ഉത്തരവായി. ഈ ഉത്തരവിനെതിരെയാണ് മൂവാറ്റുപുഴ അഡീ. ജില്ലാ കോടതിയിൽ അപ്പീൽ നൽകിയത്. വിശദവാദം കേട്ട കോടതി കേസ് തള്ളി. കേസിൽ സർക്കാരിനുവേണ്ടി അഡീ. ഗവ. പ്ലീഡർ കെ എസ് ജ്യോതികുമാർ, സ്കൂൾ പിടിഎയ്ക്കുവേണ്ടി അഡ്വ. എ കെ ജയപ്രകാശ് എന്നിവർ ഹാജരായി.