എസ്ഡിപിഐ സ്ഥാനാർഥിക്ക് കോൺഗ്രസ് പിന്തുണ
കരുമാല്ലൂർ (കൊച്ചി)
ആലങ്ങാട് ബ്ലോക്ക് മനയ്‌ക്കപ്പടി ഡിവിഷനിൽ കോൺഗ്രസിന്റെ പിന്തുണ നിരോധിത തീവ്രവാദ സംഘടനയുടെ രാഷ്ട്രീയ പാർടിയായ എസ്ഡിപിഐയ്‌ക്ക്‌. ഇവിടെ യുഡിഎഫ് സ്ഥാനാർഥി ഷെറീന ബഷീറിന്റെ പത്രിക തള്ളിയതിനെ തുടർന്നാണ്‌ പിന്തുണ. എസ്‌ഡിപിഐയെ കൂടാതെ എൽഡിഎഫ്, ബിജെപി സ്ഥാനാർഥികളാണ് മത്സരരംഗത്തുള്ളത്. ഡിവിഷനിൽ എൽഡിഎഫ് വിജയം ഉറപ്പായതോടെയാണ്‌ കോൺഗ്രസ്–എസ്ഡിപിഐ കൂട്ടുകെട്ട്‌.
എസ്ഡിപിഐ സ്ഥാനാർഥിയായി കണ്ണട ചിഹ്നത്തിൽ മത്സരിക്കുന്ന ഹസീന ഷാനവാസിനാണ്‌ കോൺഗ്രസ് പിന്തുണ. പ്രചാരണ ബോർഡുകളിലും പോസ്റ്ററുകളിലും എസ്ഡിപിഐ സ്ഥാനാർഥി എന്നാണുള്ളത്. സ്ഥാനാർഥിയുടെ ഭർത്താവ്‌ സി എസ് ഷാനവാസ് കഴിഞ്ഞദിവസം തന്റെ എഫ്ബി പേജിൽ എസ്ഡിപിഐ എന്നത് മാറ്റി പകരം ജനകീയ സ്ഥാനാർഥി എന്നാണ്‌ ഹസീനയെ വിശേഷിപ്പിച്ചത്‌. ഇപ്പോൾ പരസ്യപ്രചാരണവും ഇപ്രകാരമാണ്‌.
എസ്ഡിപിഐയുടെ പോഷക സംഘടനയായ വിമൻ ഇന്ത്യ മൂവ്മെന്റിന്റെ കളമശേരി മണ്ഡലം സെക്രട്ടറിയായ ഹസീനയെ എങ്ങനെ പിന്തുണയ്‌ക്കാനാകുമെന്നുള്ള ചോദ്യം ഒരുവിഭാഗം കോൺഗ്രസുകാർ ഉയർത്തുന്നു. പ്രതിപക്ഷ നേതാവ് വി ഡി സതീശന്റെ അടുത്ത അനുയായിയായ മാഞ്ഞാലിയിലെ നേതാവാണ് അവിശുദ്ധ കൂട്ടുകെട്ടിനുപിന്നിൽ. ഇദ്ദേഹത്തിന്റെ സഹോദരൻ മനയ്‌ക്കപ്പടി ഡിവിഷനിൽ ഉൾപ്പെട്ട പഞ്ചായത്ത് വാർഡിൽ യുഡിഎഫ് സ്ഥാനാർഥിയാണ്. സഹോദരന്റെ വിജയം ഉറപ്പിക്കാൻകൂടിയാണ് ഇ‍ൗ നീക്കം.
പറവൂർ മണ്ഡലത്തിലാകെ ജമാഅത്തെ ഇസ്ലാമിയുമായി യുഡിഎഫ് രഹസ്യധാരണയുണ്ടാക്കിയതിനുപിന്നാലെയാണ്‌ കരുമാല്ലൂർ പഞ്ചായത്തിൽ ഉൾപ്പെട്ട ബ്ലോക്ക് ഡിവിഷനിലെ എസ്ഡിപിഐ ബന്ധം പുറത്തുവന്നിട്ടുള്ളത്.
0 comments