മാവനല്ലയിൽ നിരീക്ഷണം ശക്തം 
20 കാമറകൾ സ്ഥാപിച്ചു

ഗൂഡല്ലൂർ മസിനഗുഡി മാവനല്ലയിൽ വയോധികയെ കടുവ ആക്രമിച്ച് കൊലപ്പെടുത്തിയ സംഭവത്തെത്തുടർന്ന് പ്രദേശത്ത് വനംവകുപ്പ് നിരീക്ഷണം ശക്തമാക്കി. കടുവയുടെ സാന്നിധ്യം കണ്ടെത്താനായി മാവനല്ലയിലും പരിസരപ്രദേശങ്ങളിലുമായി 20 സിസിടിവി കാമറകൾ സ്ഥാപിച്ചു. തിങ്കൾ വൈകിട്ട്‌ മുതൽ തെർമൽ ഡ്രോൺ ഉപയോഗിച്ചുള്ള പരിശോധനയും ആരംഭിച്ചിട്ടുണ്ട്. തിങ്കൾ പകൽ രണ്ടരയോടെയാണ് മസിനഗുഡി മാവനല്ല സ്വദേശി നാഗമ്മ (60) ദാരുണമായി കൊല്ലപ്പെട്ടത്. ആടുമേയ്ക്കുന്നതിനിടെ ചാടിവീണ കടുവ നാഗമ്മയെ വനത്തിനുള്ളിലേക്ക് വലിച്ചുകൊണ്ടുപോവുകയായിരുന്നു. കൂടെയുണ്ടായിരുന്നവർ ബഹളം വച്ചെങ്കിലും കടുവ പിന്മാറിയില്ല. തുടർന്ന് നടത്തിയ തിരച്ചിലിൽ മുളങ്കൂട്ടത്തിനുള്ളിലെ വെള്ളം കെട്ടിക്കിടക്കുന്ന സ്ഥലത്തുനിന്നാണ് മൃതദേഹം കണ്ടെത്തിയത്. തലയും ഉടലും വേർപെട്ട നിലയിലായിരുന്നു മൃതദേഹം. ​സംഭവമറിഞ്ഞ് എത്തിയ നാട്ടുകാർ മൃതദേഹം ആശുപത്രിയിലേക്ക് മാറ്റാൻ സമ്മതിക്കാതെ ആംബുലൻസ് തടഞ്ഞ് പ്രതിഷേധിച്ചിരുന്നു. പ്രദേശത്ത് കടുവാശല്യം രൂക്ഷമാണെന്നും പലതവണ പരാതി നൽകിയിട്ടും വനംവകുപ്പ് നടപടിയെടുത്തില്ലെന്നും നാട്ടുകാർ ആരോപിച്ചു. മാസങ്ങളായി വളർത്തുമൃഗങ്ങളെ കടുവ പിടികൂടുന്നത് പതിവായിരുന്നു. അന്നുതന്നെ ജാഗ്രത പാലിച്ചിരുന്നെങ്കിൽ ഒരു ജീവൻ പൊലിയുമായിരുന്നില്ലെന്ന് നാട്ടുകാർ പറയുന്നു. ഗൂഡല്ലൂർ ഡിവൈഎസ്‌പി വസന്തകുമാർ, ഡിഡി ഗണേഷ് തുടങ്ങിയവർ സ്ഥലത്തെത്തി നടത്തിയ ചർച്ചയ്ക്കൊടുവിലാണ് മൃതദേഹം മാറ്റാൻ നാട്ടുകാർ സമ്മതിച്ചത്. മരിച്ച നാഗമ്മയുടെ കുടുംബത്തിനുള്ള അടിയന്തര ധനസഹായം വനംവകുപ്പ് കൈമാറി.