മാവനല്ലയിൽ വയോധികയെ കടുവ കൊന്ന സംഭവം ജനരോഷത്തിനൊടുവിൽ 
കൂട് സ്ഥാപിച്ചു

ഗൂഡല്ലൂർ മസിനഗുഡി മാവനല്ലയിൽ വയോധികയെ കൊന്ന കടുവയെ പിടികൂടുന്നതിനായി വനംവകുപ്പ് കൂട് സ്ഥാപിച്ചു. നാട്ടുകാർ നടത്തിയ പ്രതിഷേധത്തിനൊടുവിലാണ് വ്യാഴാഴ്‌ച വനത്തിനുള്ളിൽ അഞ്ച്‌ കൂട് സ്ഥാപിച്ചത്. കഴിഞ്ഞ തിങ്കൾ പകൽ രണ്ടരയോടെ ആടുമേയിക്കുന്നതിനിടെയാണ് വയോധിക കടുവയുടെ ആക്രമണത്തിൽ കൊല്ലപ്പെട്ടത്. തുടർന്ന് മൃതദേഹം കൊണ്ടുപോകുന്നത് തടഞ്ഞ് ബന്ധുക്കളും നാട്ടുകാരും ശക്തമായി പ്രതിഷേധിച്ചിരുന്നു. വനംവകുപ്പ് ഉന്നത ഉദ്യോഗസ്ഥരുടെ നിർദേശപ്രകാരമാണ് കടുവയെ പിടികൂടാനുള്ള നടപടി ഊർജിതമാക്കിയത്. പ്രദേശത്ത് വനംവകുപ്പ് നിരീക്ഷണം ശക്തമാക്കിയിട്ടുണ്ട്. ഇരുപതോളം സ്ഥലങ്ങളിൽ നിരീക്ഷണ കാമറ സ്ഥാപിച്ചതിനൊപ്പം തെർമൽ ഡ്രോൺ ഉപയോഗിച്ചുള്ള പരിശോധനയുമുണ്ട്‌. നിരവധി വനംവകുപ്പ് ജീവനക്കാരെ വിവിധ ഭാഗങ്ങളിലായി വിന്യസിച്ചു. എന്നാൽ, പ്രദേശത്ത് കടുവയുടെ സാന്നിധ്യം ഇപ്പോഴുമുണ്ടെന്നും കഴിഞ്ഞദിവസവും കന്നുകാലികൾക്കുനേരെ ആക്രമണമുണ്ടായെന്നും നാട്ടുകാർ പറയുന്നു. സുരക്ഷാ മുൻകരുതലുകളുടെ ഭാഗമായി മാവനല്ല ഭാഗത്തുള്ള പതിനാറോളം വിദ്യാർഥികളെ വനംവകുപ്പിന്റെ വാഹനത്തിലാണ് സ്‌കൂളിലേക്ക് കൊണ്ടുപോകുന്നതും കൊണ്ടുവരുന്നതും. പൊതുജനങ്ങൾ രാവിലെയും വൈകിട്ടും ഒറ്റയ്ക്ക് പുറത്തിറങ്ങരുതെന്നും വനത്തിലേക്ക് പോകരുതെന്നും അധികൃതർ കർശന നിർദേശം നൽകിയിട്ടുണ്ട്.