തവിഞ്ഞാലിന്റെ 
കണ്ണായി റഹീമ

​തവിഞ്ഞാൽ ‘കന്നിനെ കണ്ണ് പോലെ നോക്കി പെരുപ്പിച്ച് വേവിലും നീറ്റിലും നിന്ന് കൂമ്പൊടിച്ച്, കുത്ത് ചാരി, ചേര്‍ത്ത് കെട്ടി, നോക്കി നീട്ടിയെടുക്കുന്നു ബായക്ക...’ റഹീമയുടെ ‘നാലഞ്ച് ബായക്കാ പാഠങ്ങള്‍' എന്ന കവിതയില്‍ ഇങ്ങനെ കുറിച്ചിരിക്കുന്നു. കര്‍ഷക ജനതയ്ക്ക് ചുറ്റുപാട്, എങ്ങനെ പാഠവും ജീവിതവുമാകുന്നു, അധ്വാനം എത്ര സങ്കീര്‍ണമാകുന്നു എന്നൊക്കെ കാണിക്കുന്ന കവിതയിലെ ഹൃദയസ്പര്‍ശിയായ വരികളാണിത്. ഇത് തന്നെയാണ് ജില്ലാ പഞ്ചായത്ത് തവിഞ്ഞാല്‍ ഡിവിഷന്‍ സ്ഥാനാര്‍ഥി റഹീമ വാളാട് ഇപ്പോള്‍ വോട്ടര്‍മാരോട് പറയുന്നതും. ‘തവിഞ്ഞാലിനെ കണ്ണ് പോലെ നോക്കി വളര്‍ത്തും.' സ്ഥാനാര്‍ഥിയായ കഴിഞ്ഞ 14 മുതല്‍ റഹീമ പ്രചാരണത്തിലാണ്‌. ഓരോ ദിവസവും രാവിലെമുതല്‍ രാത്രി വൈകുവോളവും വോട്ടർമാരെ കാണുകയാണ്‌. യുവസ്ഥാനാർഥിയെ കാണാനും കേൾക്കാനും ഓരോ കേന്ദ്രങ്ങളിലും ആളുകൾ തടിച്ചുകൂടുകയാണ്‌. അത്രമേല്‍ ഈ എഴുത്തുകാരിയെ നാട്‌ ചേര്‍ത്ത് നിര്‍ത്തുകയാണ്. വയനാട്ടുകാര്‍ റഹീമയെന്ന പേര് ആദ്യമായല്ല കേള്‍ക്കുന്നത്. റഹീമയുടെ കുട്ടിക്കാലം മുതലേ കവിതയുടെ രൂപത്തില്‍ നാട്ടുകാര്‍ വായിച്ചറിഞ്ഞതാണ്. നാടിനെ തൊട്ടറിഞ്ഞ കവയിത്രി. കര്‍ഷകന്റെ നൊമ്പരം തൊട്ടറിഞ്ഞവള്‍. തവിഞ്ഞാല്‍ പഞ്ചായത്തില്‍ ഭൂരിഭാഗം മനുഷ്യരും കാര്‍ഷിക മേഖലയുമായി ഇഴയടുപ്പമുള്ളവരാണ്. ഇ‍ൗ ജനതയാണ്‌ ഓരോ കേന്ദ്രത്തിലും ഇരുപത്തിയെട്ടുകാരിയെ സ്വീകരിക്കാനെത്തുന്നത്. പ്രതീക്ഷയോടെയാണ് എല്ലാവും നോക്കുന്നത്‌. പ്രസംഗങ്ങളെല്ലാം സമൂഹമാധ്യമങ്ങൾ ഏറ്റെടുക്കുകയാണ്‌. കാലടി ശ്രീശങ്കരാചാര്യ സംസ്‌കൃത സർവകലാശാലയിലെ ഗവഷേക വിദ്യാർഥിയായ റഹീമ എസ്‌എഫ്‌ഐയുടെ പോരാട്ടവീര്യം കരുത്താക്കിയാണ്‌ പോരാട്ടത്തിനിറങ്ങിയിട്ടുള്ളത്‌. രാഷ്‌ട്രീയത്തിലും വികസനത്തിലും വ്യക്തമായ കഴ്‌ചപ്പാട്‌. ആഴമേറിയ ചരിത്രാവബോധവും. തവിഞ്ഞാലിൽ വികസനമെത്തിക്കാന്‍ റഹീമയ്ക്ക് കഴിയുമെന്ന് ഓരോ വോട്ടറും വിശ്വസിക്കുന്നു. കഴിഞ്ഞ ദിവസംവരെ വോട്ടർമാരെ നേരിൽ കാണുകയായിരുന്നു. വ്യാഴാഴ്‌ച പൊതുപര്യടനം ആരംഭിച്ചു. വെള്ളിയാഴ്‌ചയും തുടർന്നു. ഓരോ സ്വീകരണ കേന്ദ്രത്തിലും ഹൃദ്യമായ അനുഭവമാണെന്നും എല്‍ഡിഎഫ് സുനിശ്ചിതമായി വിജയിക്കുമെന്നും റഹീമ വാളാട് പറഞ്ഞു.