നാട്ടിലലിഞ്ഞ്‌ ടീച്ചര്‍... ​

തരുവണ ചിലര്‍ക്ക് പ്രസിഡന്റ്... മറ്റുചിലര്‍ക്ക് പ്രിയപ്പെട്ട ടീച്ചർ... പനമരം പഞ്ചായത്ത് പ്രസിഡന്റ് സ്ഥാനമൊഴിഞ്ഞിട്ട്‌ ഒരുവർഷമായെങ്കിലും നാട്ടുകാർക്ക്‌ ഇപ്പോഴും പി എം ആസ്യ പ്രസിഡന്റാണ്. ചിലര്‍ക്കാകട്ടെ തങ്ങള്‍ക്ക് ആദ്യക്ഷരം കുറിച്ച പ്രിയപ്പെട്ട ടീച്ചറും. തരുവണ ജില്ലാ പഞ്ചായത്ത് ഡിവിഷന്‍ സ്ഥാനാര്‍ഥി പി എം ആസ്യ നാട്ടുകാർക്ക്‌ പ്രിയപ്പെട്ടവളാണ്‌. ഓരോ സ്വീകരണ കേന്ദ്രത്തിലും സ്‌ത്രീകളടക്കം നിരവധി പേരാണ്‌ സ്ഥാനാർഥിയോടുള്ള സ്‌നേഹമറിയിക്കാനെത്തുന്നത്‌. വോട്ടുചോദിക്കുന്നതിനപ്പുറം വോട്ടര്‍മാരെ കേള്‍ക്കാനാണ് ടീച്ചര്‍ക്കിഷ്ടം. വോട്ടർമാർക്ക്‌ പറയാനുള്ളത്‌ കേട്ടശേഷം എന്തുകൊണ്ട് എൽഡിഎഫ്‌ സ്ഥാനാര്‍ഥിക്ക് വോട്ട് ചെയ്യണമെന്ന ചെറുപ്രസംഗവും. 33 വര്‍ഷത്തെ അധ്യാപക ജീവിതത്തിന്റെ കരുത്തും ഭരണരംഗത്തെ മികവും പൊതുപ്രവര്‍ത്തന രംഗത്തെ പരിചയവും ഒത്തിണക്കിയാണ് പി എം ആസ്യ തരുവണ ഡിവിഷനിൽ മത്സരത്തിനിറങ്ങിയിരിക്കുന്നത്‌. ലീഗിന്റെ സ്വാധീന മേഖലകളിലും ആസ്യ ടീച്ചറാണ് ഇപ്പോൾ താരം. അത്രമേല്‍ വോട്ടര്‍മാരുടെ മനസ്സിലിടം നേടാൻ എൽഡിഎഫ്‌ സ്ഥാനാർഥിയ്‌ക്കായി. വെള്ളി രാവിലെ ഒമ്പതിന് പഴഞ്ചനയില്‍ ആരംഭിച്ച് 16 കേന്ദ്രങ്ങളിലെ പര്യടനശേഷം രാത്രിയോടെ അഞ്ചുകുന്നിലാണ് പ്രചാരണം സമാപിച്ചത്‌. കടകള്‍, വീടുകള്‍, തൊഴിലുറപ്പ്‌ കേന്ദ്രങ്ങൾ തുടങ്ങിയിടങ്ങളിലെത്തി വോട്ട്‌ അഭ്യർഥിച്ചു. എല്‍ഡിഎഫ് ബ്ലോക്ക്, വാര്‍ഡ് സ്ഥാനാര്‍ഥികളും പ്രവർത്തകരും ഒപ്പമുണ്ടായിരുന്നു. വോട്ടര്‍മാരിൽനിന്ന്‌ മികച്ച പിന്തുണയാണ് ലഭിക്കുന്നതെന്നും എല്‍ഡിഎഫ് വലിയ വിജയം നേടുമെന്നും പി എം ആസ്യ പറഞ്ഞു.