വളരും മാനന്തവാടി
മാനന്തവാടി നഗരസഭയുടെ സമഗ്ര വികസനത്തിനായി എല്‍ഡിഎഫ് മാനന്തവാടി മുനിസിപ്പല്‍ കമ്മിറ്റി നേതൃത്വത്തിലുള്ള "കേരളത്തോടൊപ്പം വളരും മാനന്തവാടി' നഗരസഭാ പ്രകടന പത്രിക പുറത്തിറക്കി. നഗരസഭയുടെ സമഗ്ര വികസനത്തിനുള്ള വിവിധ പദ്ധതികൾ പ്രകടന പത്രികയിലുണ്ട്‌. പൊതുവിഭാഗം, കൃഷി, മാനന്തവാടി ടൗണ്‍, ആരോഗ്യം, ഭിന്നശേഷി സൗഹൃദം, റോഡുകള്‍, കര്‍ഷകര്‍ക്ക് കൈത്താങ്ങ്, പട്ടിക വിഭാഗം, വയോജന സംരക്ഷണം തുടങ്ങിയവയിലായി വിവിധ പദ്ധതികളുണ്ട്‌. മാനന്തവാടിയെ കേരളത്തിലെ ആദ്യ കാര്‍ബണ്‍ ന്യൂട്രല്‍ നഗരസഭയാക്കും. ആധുനിക ബസ് ടെര്‍മിനല്‍ കോംപ്ലക്‌സ് നിർമിക്കും. മള്‍ട്ടി പര്‍പ്പസ് കമ്യൂണിറ്റി ഹാള്‍, ഓപ്പണ്‍ തിയേറ്റര്‍ എന്നിവ നിർമിക്കും. പട്ടിജാതി–പട്ടികവര്‍ഗ വിഭാഗത്തില്‍പ്പെട്ട എല്ലാവര്‍ക്കും ഭൂമിയും വീടും, എല്ലാവര്‍ക്കും ശുദ്ധമായ കുടിവെള്ളസൗകര്യം എന്നിവ ഒരുക്കും. കളിസ്ഥലങ്ങളും കമ്യൂണിറ്റി ഹാളുകളും സ്ഥാപിക്കും. മുന്‍സിപ്പല്‍ ലേബര്‍ ബാങ്ക്, കാര്‍ഷിക മേഖലയില്‍ 300 പേര്‍ക്ക് തൊഴില്‍ നല്‍കും തുടങ്ങിയ വാഗ്‌ദാനങ്ങളാണ്‌ പ്രകടന പത്രികയിലുള്ളത്. വിവിധ മേഖലയെ പ്രതിനിധീകരിച്ച് പങ്കെടുത്ത ഡോ. ടി വി സുരേന്ദ്രന്‍, മാവറ വര്‍ക്കി, അഖില, മുഹമ്മദ് അജ്‌നാസ്, ഫ. വർഗീസ് മറ്റമന, പി ശശി, വെള്ള മുദ്രമൂല, അന്‍വര്‍, ഡോ. ഉസ്മാന്‍, എം ആര്‍ സുരേഷ്, ഡോ. എ ഗോകുല്‍ ദേവ് എന്നിവർ ചേർന്നാണ്‌ പത്രിക പുറത്തിറക്കിയത്‌. യോഗത്തില്‍ വി കെ ശശിധരന്‍ അധ്യക്ഷനായി. ടി കെ പുഷ്‌പൻ, പി ടി ബിജു, എം റെജീഷ്, നിഖില്‍ പത്മനാഭന്‍, അസീസ് കൊടക്കാട്, അനില്‍ വള്ളുവക്കണ്ടി എന്നിവര്‍ സംസാരിച്ചു. പി സുരേഷ് ബാബു പ്രകടന പത്രികാവതരണം നടത്തി. തുടര്‍ന്ന് ഗാനമേളയും സംഘടിപ്പിച്ചു.
Tags
Related News
Dont Miss it
0 comments