ലേബർ കോഡ്‌: പ്രതിഷേധ ചൂടിൽ ജില്ല

കൽപ്പറ്റ തൊഴിലാളികളുടെ അവകാശങ്ങളെ വെല്ലുവിളിക്കുന്ന നാല്‌ ലേബർ കോഡുകൾ പിൻവലിക്കണമെന്നും ഐതിഹാസിക കർഷകസമരം ഒത്തുതീർപ്പായപ്പോൾ കേന്ദ്രസർക്കാർ നൽകിയ ഉറപ്പുകൾ പാലിക്കണമെന്നും ആവശ്യപ്പെട്ട്‌ ജില്ലയിലാകെ പ്രതിഷേധം. ട്രേഡ്‌ യൂണിയനുകളും കർഷക–കർഷകത്തൊഴിലാളി സംഘടനകളും വിവിധ കേന്ദ്രങ്ങളിൽ പ്രതിഷേധിച്ചു. തൊഴിലാളിവിരുദ്ധ ലേബർ കോഡ്‌ തുലയട്ടെയെന്ന മുദ്രാവാക്യം ഉയർത്തി പ്രധാനമന്ത്രി നരേന്ദ്രമോദിയുടെ കോലം കത്തിച്ചായിരുന്നു പ്രകടനവും പൊതുയോഗങ്ങളും. വിവിധ കേന്ദ്രങ്ങളിൽ തൊഴിൽ കോഡുകളുടെ പകർപ്പും കത്തിച്ചു. കർഷകസമരത്തിന്റെ അഞ്ചാം വാർഷികംകൂടി മുൻനിർത്തിയുള്ള രാജ്യവ്യാപക പ്രക്ഷോഭത്തിന്റെ ഭാഗമായിരുന്നു ജില്ലയിലെ പ്രക്ഷോഭവും. കൽപ്പറ്റയിൽ സിഐടിയു ഓഫീസിൽനിന്ന്‌ ആരംഭിച്ച പ്രകടനം നഗരംചുറ്റി ഹെഡ്‌പോസ്റ്റ്‌ ഓഫീസ്‌ പരിസരത്ത്‌ സമാപിച്ചു. സിഐടിയു ജില്ലാ സെക്രട്ടറി കെ സുഗതൻ ഉദ്‌ഘാടനം ചെയ്‌തു. സി കെ ശിവരാമൻ അധ്യക്ഷനായി. പി കെ അബു, ഇ എ രാജപ്പൻ, വി എം റഷീദ്‌, എൻ ആർ മഹേഷ് തുടങ്ങിയവർ സംസാരിച്ചു. ​