കൽപ്പറ്റ കുതിക്കും

കൽപ്പറ്റ നഗരത്തെ വികസനക്കുതിപ്പിലേക്ക്‌ നയിക്കാനുള്ള വിവിധ പദ്ധതികളുമായി കൽപ്പറ്റ നഗരസഭാ എൽഡിഎഫ് പ്രകടന പത്രിക പുറത്തിറക്കി. സംസ്ഥാന സർക്കാർ സഹായത്തോടെ കൽപ്പറ്റ ഗവ. ജനറൽ ആശുപത്രി സൂപ്പർ സ്പെഷ്യാലിറ്റി ആശുപത്രിയായി മുണ്ടക്കൈ ടൗൺഷിപ്പിൽ സ്ഥാപിക്കും, നിലവിലെ ജനറൽ ആശുപത്രി സ്ത്രീകളുടെയും കുട്ടികളുടെയും ആശുപത്രിയാക്കും, സമ്പൂർണ പാർപ്പിട നഗരം, ആധുനിക നഗരമായി കൽപ്പറ്റയെ മാറ്റാൻ മാസ്റ്റർ പ്ലാൻ, ഗതാഗതക്കുരുക്കില്ലാത്ത നഗരപാതകൾ, സ്ത്രീസൗഹൃദ നഗരം, സ്‌ത്രീകൾക്ക് 1000 തൊഴിലവസരം, പൊതു മൈതാനം, പ്രാദേശിക കളിക്കളങ്ങൾ, ഓപ്പൺ തിയേറ്ററും ജിമ്മും, എല്ലാവർക്കും കുടിവെള്ളം, ശുചിത്വ ഹരിത നഗരം തുടങ്ങിയ പദ്ധതികളടങ്ങിയതാണ്‌ പ്രകടന പത്രിക. ഭവനരഹിതമില്ലാത്ത നഗരമായി കൽപ്പറ്റയെ മാറ്റും, വാസയോഗ്യമല്ലാത്ത വീടുകൾക്ക് പുനരുദ്ധാരണ പദ്ധതി, വീടും സ്ഥലവുമില്ലാത്തവർക്ക് ഫ്ളാറ്റുകൾ, ടൗൺ സൗന്ദര്യവൽക്കരണം, റോഡുകൾ നവീകരിച്ച് ലിങ്ക് റോഡുകൾ നിർമിക്കൽ, നഗരത്തിലെ തിരക്കേറിയ ഇടങ്ങളിൽ ഫ്ളൈ ഓവർ നിർമിക്കൽ, കൈനാട്ടിമുതൽ വെള്ളാരംകുന്നുവരെ ബൈപാസ്, പഴയ ബസ്‌ സ്റ്റാൻഡ്‌ പുതുക്കി പണിയൽ, മുണ്ടേരിയിലെ പാർക്ക്‌ നവീകരണം, നഗരത്തിൽ ടർഫ്, മൾടി പ്ലക്‌സ്‌ തിയേറ്റർ എന്നിവ സ്ഥാപിക്കും. എൽഡിഎഫ് ജില്ലാ കൺവീനർ സി കെ ശശീന്ദ്രൻ കൽപ്പറ്റ നഗരസഭാ മുൻ ചെയർമാൻ അഡ്വ. പി ചാത്തുക്കുട്ടിക്ക് നൽകി പ്രകടന പത്രിക പ്രകാശിപ്പിച്ചു. വി ഹാരിസ്, വി ബാവ, പി കെ ബാബുരാജ്, പി എം ഷംസുദ്ദീൻ, സി കെ ശിവരാമൻ, ടി മണി, സി കെ നൗഷാദ്,നാസർ കുരുണിയൻ എന്നിവർ സംസാരിച്ചു. 30 ഡിവിഷനിലെ സ്ഥാനാർഥികളും പങ്കെടുത്തു.