ലഹരിക്കടത്ത്: മുഖ്യകണ്ണി ഡൽഹിയിൽ പിടിയിൽ

കൽപ്പറ്റ

കേരളത്തിലേക്കും ദക്ഷിണ കർണാടകത്തിലേക്കും വൻതോതിൽ ലഹരിമരുന്ന് എത്തിക്കുന്ന സംഘത്തിലെ പ്രധാന കണ്ണിയെ ജില്ലാ പൊലീസ്‌ പിടികൂടി. മുൻ സോഫ്റ്റ്‌വെയർ എൻജിനീയറായ ആലപ്പുഴ കരീലകുളങ്ങര സ്വദേശി ആർ രവീഷ് കുമാർ (28) ആണ് ഡൽഹിയിൽ പിടിയിലായത്. ജില്ലാ ലഹരി വിരുദ്ധ സ്‌ക്വാഡും തിരുനെല്ലി പൊലീസും ഡൽഹി പൊലീസിന്റെ സഹായത്തോടെ നടത്തിയ സാഹസിക നീക്കത്തിനൊടുവിലാണ് ഡ്രോപ്പെഷ്, ഒറ്റന്‍ എന്നി പേരുകളിൽ അറിയപ്പെടുന്ന ഇയാൾ വലയിലായത്.

നേരത്തെ തിരുനെല്ലിയിൽ രജിസ്റ്റർ ചെയ്ത മയക്കുമരുന്ന് കേസിൽ ജാമ്യത്തിലിറങ്ങി മുങ്ങിയ ഇയാൾ ഡൽഹി കാൺപൂരിലെ രഹസ്യകേന്ദ്രത്തിൽ ഒളിവിൽ കഴിയുകയായിരുന്നു. അന്വേഷക സംഘം എത്തിയതിനെതുടർന്ന്‌ കെട്ടിടങ്ങൾക്ക് മുകളിലൂടെ ഓടി രക്ഷപ്പെടാൻ ശ്രമിച്ച പ്രതിയെ ബലപ്രയോഗത്തിലൂടെയാണ് പൊലീസ് കീഴ്പ്പെടുത്തിയത്. 2024-ൽ കാസർഗോഡ് 265 ഗ്രാം എംഡിഎംഎ പിടികൂടിയ കേസിലെ തുടരന്വേഷണമാണ് രവീഷിലേക്ക് എത്തിയത്.

സോഫ്റ്റ്‌വെയര്‍ കമ്പനിയില്‍ ജോലി ചെയ്‌തിരുന്ന രവീഷ് ജോലി ഉപേക്ഷിച്ച് സുഹൃത്തുക്കളുമായി ചേര്‍ന്ന് പണമുണ്ടാക്കുന്നതിനായി ലഹരിക്കടത്ത് തുടങ്ങുകയായിരുന്നു. കര്‍ണാടകയിലും വയനാട്, മലപ്പുറം, കോഴിക്കോട്, കണ്ണൂര്‍, കാസര്‍ഗോഡ് ജില്ലകളിലും വ്യാപകമായി ലഹരിക്കടത്തിലേര്‍പ്പെട്ടിരുന്ന ഇയാള്‍ ഇംഗ്ലീഷ്, ഹിന്ദി, കന്നഡ, തെലുങ്ക്, തമിഴ്, മലയാളം ഭാഷകൾ സംസാരിക്കും. ജില്ലയിൽ ലഹരിവിരുദ്ധ പോരാട്ടം ശക്തമായി തുടരുമെന്ന് ജില്ലാ പൊലീസ് മേധാവി തപോഷ് ബസുമതാരി അറിയിച്ചു.