ബത്തേരിയിൽ എൽഡിഎഫ്‌ പ്രകടന പത്രിക അരനൂറ്റാണ്ടിന്റെ 
വികസന ലക്ഷ്യം

ബത്തേരി അരനൂറ്റാണ്ടിന്റെ വികസന കാഴ്‌ചപ്പാടുമായി ബത്തേരി നഗരസഭയിൽ എൽഡിഎഫ്‌ പ്രകടന പത്രിക. ബംഗളൂരു അടക്കമുള്ള മഹാനഗരങ്ങളുടെ സാമീപ്യത്തെ ഉപയോഗപ്പെടുത്തിയുള്ള ഐടി, ടൂറിസം മേഖലകളുടെ പ്രധാന കേന്ദ്രമാക്കി ബത്തേരിയെ മാറ്റുകയെന്ന ലക്ഷ്യത്തോടെയുള്ള പ്രകടന പത്രിക "നാടിന്റെ മുന്നേറ്റം നമ്മുടെ ശബ്ദം’– ജനസമക്ഷംവച്ചു. 52 പ്രധാന പദ്ധതികൾക്കാണ്‌ പ്രാമുഖ്യം. റിങ് റോഡ്‌, ഹൈടെക്‌ റോഡ്‌, സ്മാർട്ട്‌ കേന്ദ്രങ്ങൾ, ഡിസൈൻ പോളിസി, സ്റ്റേഡിയം, ബസ്‌ ടെർമിനൽ, ഷോപ്പിങ്‌ കോംപ്ലക്സ്‌, 5000 തൊഴിലവസരം, ആംഫി തിയേറ്റർ എന്നിവയെല്ലാം പ്രകടന പത്രിക മുന്നോട്ടുവയ്‌ക്കുന്നു. നഗരത്തിലെ ഗതാഗതക്കുരുക്കിന്‌ പരിഹാരമായി പ്രദേശങ്ങളെ കോർത്തിണക്കി റിങ്‌ റോഡ്‌ നിർമിക്കും. ഓരോ ഡിവിഷനുകളിലും സ്‌മാർട്ട്‌ സെന്ററുകൾ സ്ഥാപിക്കും. നഗരത്തിന്റെ സ്വത്വം, പാരന്പര്യം, പ്രകൃതിസ‍ൗന്ദര്യം എന്നിവ സംരക്ഷിക്കുന്നതിനൊപ്പം ആധുനിക സ‍ൗകര്യങ്ങളും വികസനവും ഉറപ്പാക്കി ഡിസൈൻ പോളിസി കൊണ്ടുവരും. 30 വർഷത്തെ ഡിബിഒടി അടിസ്ഥാനത്തിൽ നിർമാണം തുടങ്ങിയ 37 കോടി മുടക്കിയുള്ള ബസ്‌ ടെർമിനലിന്റെയും 7.6 കോടി മുടക്കിയുള്ള ഷോപ്പിങ്‌ കോംപ്ലക്സും വേഗത്തിൽ പൂർത്തീകരിക്കും. കടമാൻചിറയിൽ അന്താരാഷ്‌ട്ര നിലവാരമുള്ള സ്‌റ്റേഡിയം നിർമിക്കും. വിജ്ഞാന കേരളം പദ്ധതിയിലൂടെ കുറഞ്ഞത്‌ 5000 പേർക്കെങ്കിലും തൊഴിൽ ഉറപ്പാക്കും. പഴയ ബസ്‌ സ്റ്റാൻഡിനെ ആംഫി തിയേറ്ററും ആർട്ട്‌ ഗാലറിയുമാക്കും. നിറസമൃദ്ധി ജനകീയ ഭക്ഷണശാല സ്ഥാപിക്കും. ക്ഷീരകർഷകർ, മത്സ്യകർഷകർ, നെൽകർഷകർ, തൊഴിലുറപ്പ്‌ തൊഴിലാളികൾ, പാടശേഖര സമിതികൾ എന്നിവയ്‌ക്ക്‌ പ്രത്യേകം പരിഗണനയുണ്ട്‌. ടൂറിസം പ്രോത്സാഹിപ്പിക്കും. ഡിവിഷനുകളിൽ മത്സരിക്കുന്ന സ്ഥാനാർഥികളും വിവിധ മേഖലകളെ പ്രതിനിധീകരിക്കുന്ന അമ്മിണിയമ്മ, കുങ്കൻ, റജീന, നിധീഷ്‌ സോമൻ, കെ ബാലഗോപാലൻ, എം വി മത്തായി, അയ്യപ്പൻ തുടങ്ങിയവരുമാണ്‌ എൽഡിഎഫ്‌ നേതാക്കൾക്കൊപ്പം പ്രകടന പത്രിക പ്രകാശിപ്പിച്ചത്‌. തെരഞ്ഞെടുപ്പ്‌ കമ്മിറ്റി ചെയർമാൻ കെ ജെ ദേവസ്യ അധ്യക്ഷനായി. നഗരസഭാ ചെയർമാൻ ടി കെ രമേശ്‌, കെ കെ ഹംസ എന്നിവർ സംസാരിച്ചു. ലിജോ ജോണി സ്വാഗതം പറഞ്ഞു.