വർണാഭമായി ശിശുദിനറാലി

കാസർകോട്‌

ശിശുദിനാഘോഷങ്ങളുടെ ഭാഗമായി ജില്ലാ ശിശുക്ഷേമ സമിതി നേതൃത്വത്തിൽ ശിശുദിന റാലിയും വിദ്യാർഥി പൊതുസഭയും സംഘടിപ്പിച്ചു.ജില്ലാ ഭരണകൂടത്തിന്റെയും വനിതാ ശിശുവികസന വകുപ്പിന്റെയും സഹകരണത്തോടെ വിദ്യാനഗറിൽ അസാപ്പ് കാര്യാലയ പരിസരത്തുനിന്ന് സൺറൈസ് പാർക്കിലേക്ക് നടന്ന റാലി കാസർകോട് എഎസ്‌പി ഡോ. എം നന്ദഗോപൻ ഫ്ലാഗ് ഓഫ് ചെയ്തു. 24 സ്കൂളുകളാണ് റാലിയിൽ പങ്കെടുത്തത്. കുട്ടികളുടെ പ്രധാനമന്ത്രിയും പ്രസിഡന്റും സ്പീക്കറും പ്രതിപക്ഷ നേതാവും തുറന്ന വാഹനത്തിൽ റാലിയിൽ സഞ്ചരിച്ചു. ഇന്ത്യയുടെ പ്രഥമ പ്രധാനമന്ത്രി ജവഹർലാൽ നെഹ്റുവിനെ സ്മരിച്ചു വർണാഭമായിരുന്നു ശിശുദിന റാലി. എസ്‌പിസി, സ്കൗട്ട് ആൻഡ് ഗൈഡ്സ് എന്നിവരും കോൽക്കളി, ബാൻഡ് വാദ്യം, ഒപ്പന തുടങ്ങി വിവിധ കലാരൂപങ്ങളും അണിനിരന്നു. റാലിയിൽ മികച്ച രീതിയിൽ അവതരിപ്പിച്ച വിദ്യാലയങ്ങൾക്ക് പുരസ്കാരങ്ങൾ നൽകി. റാലിയിൽ പിടിഎംഎ യുപി സ്കൂൾ ബെദിര ഒന്നാംസ്ഥാനവും, ടിഐഎച്ച്എച്ച്എസ് നായന്മാർമൂല രണ്ടാം സ്ഥാനവും നേടി. മഡോണ സ്കൂൾ കാസർകോട്, ജിഎംയുപിഎസ് മുളിയാർ എന്നിവർ മൂന്നാം സ്ഥാനം പങ്കിട്ടു. ​വിദ്യാർത്ഥി പൊതുസഭ കുട്ടികളുടെ പ്രധാനമന്ത്രി ബി എ ഖദീജത്ത് ഹസ്‌വ ഉദ്ഘാടനം ചെയ്തു. കുട്ടികളുടെ പ്രസിഡന്റ് കെ എസ് പ്രണമ്യ അധ്യക്ഷയായി. കുട്ടികളുടെ പ്രതിപക്ഷ നേതാവ് പി വേദ നായർ മുഖ്യപ്രഭാഷണം നടത്തി. സ്പീക്കർ കെ ശ്രീനന്ദ സ്വാഗതവും പി ദിൽഷ നന്ദിയും പറഞ്ഞു . എൻഡോസൾഫാൻ സെൽ ഡെപ്യൂട്ടി കളക്ടർ ലിപു എസ് ലോറൻസ് ശിശുദിന സന്ദേശം നൽകി.ശിശുദിന സ്റ്റാമ്പ് ജില്ലാ ഇൻഫർമേഷൻ ഓഫീസർ എം മധുസൂദനൻ പ്രകാശിപ്പിച്ചു. മൃദുലഭായ് മണ്ണൂർ വിശിഷ്ടാതിഥിയായി.ജില്ലാ ശിശുക്ഷേമ സമിതി സെക്രട്ടറി ടി എം എ കരീം, കാസർകോട് എഇഒ അഗസ്റ്റിൻ ബെർണാഡ്, ജില്ലാ വനിതാ ശിശുവികസന ഓഫീസർ ടി ഹഫ്സത്ത് എന്നിവർ സമ്മാനങ്ങൾനൽകി.