കാസർകോട് ബ്ലോക്ക്‌ പഞ്ചായത്ത്‌ നാടിന്റെ മാറ്റം കൊതിച്ച്‌
കാസർകോട്
ജനക്ഷേമ പ്രവർത്തനങ്ങളോ വികസന പദ്ധതികളോ നടപ്പാക്കാത്ത ബ്ലോക്ക്‌ പഞ്ചായത്തിലൊന്നാണ്‌ കാസർകോട്. പതിറ്റാണ്ടുകളായി യുഡിഎഫ്‌ ഭരിക്കുന്ന ഇവിടെ ഓരോ തെരഞ്ഞെടുപ്പിലും നിരവധി വാഗ്‌ദാനങ്ങളുമായാണ്‌ യുഡിഎഫ്‌ വോട്ടർമാർക്ക്‌ മുന്നിലെത്തുക. ഇ‍ൗതട്ടിപ്പ്‌ ജനങ്ങൾ തിരിച്ചറിഞ്ഞതിനാൽ അധികകാലം ഇത്തരം ഗിമ്മിക്കുകൾകൊണ്ട്‌ മുന്നോട്ടുപോകാനാവില്ലെന്നുറപ്പ്‌. സംസ്ഥാന സർക്കാർ തദ്ദേശ സ്ഥാപനങ്ങൾവഴി നടപ്പാക്കുന്ന പദ്ധതികൾപോലും യഥാസമയം ഏറ്റെടുക്കാൻ മടിക്കുകയാണ്‌. എല്ലാ മേഖലയിലും മുരടിപ്പ്‌ മാത്രം. വികസനകാര്യത്തിൽ സംസ്ഥാനത്ത്‌ ഏറ്റവും പിന്നാക്കമാണ്‌ കാസർകോട് ബ്ലോക്ക്‌. പദ്ധതികൾ ഏറ്റെടുത്ത്‌ മികച്ച നിലയിൽ നടപ്പാക്കാൻ കഴിയുമെന്ന്‌ സമീപ ബ്ലോക്കുകളായ എൽഡിഎഫ്‌ ഭരിക്കുന്ന കാറഡുക്കയും കാഞ്ഞങ്ങാടും നീലേശ്വരവും തെളിയിച്ചു. സ്വജനപക്ഷപാതവും അഴിമതിയും മാത്രമാണ്‌ യുഡിഎഫ്‌ ഭരണസമിതിയുടെ മുഖമുദ്ര. സംസ്ഥാന സർക്കാരിന്റെ ലൈഫ്‌ മിഷനോടുപോലും നിഷേധാത്മക നിലപാടാണ്‌ ഭരണസമിതിക്കുള്ളത്‌. നിരവധി പുഴകളും തോടുകളുമുണ്ടെങ്കിലും ഇവയെ സംരക്ഷിക്കാനോ ബ്ലോക്ക്‌ പരിധിയിലെ കുടിവെള്ളക്ഷാമം പരിഹരിക്കാനോ കാർഷിക വിളകൾക്ക്‌ ജലസേചന സൗകര്യമൊരുക്കാനോ ഭരണസമിതി മുൻകൈയെടുത്തിട്ടില്ല. കുമ്പള, മൊഗ്രാൽപുത്തൂർ, മധൂർ, ബദിയടുക്ക, ചെങ്കള, ചെമ്മനാട്‌ പഞ്ചായത്തുകളിലായുള്ള 18 ഡിവിഷനുകളാണ്‌ ബ്ലോക്ക്‌ പഞ്ചായത്തിലുള്ളത്‌. സർക്കാരിന്റെയും ജില്ലാപഞ്ചായത്തിന്റെയും ജനപക്ഷ നിലപാടുകളും പ്രവർത്തനങ്ങളും വിശദീകരിച്ചാണ്‌ എൽഡിഎഫ്‌ ഇത്തവണ വോട്ടർമാർക്ക്‌ മുന്നിലെത്തുന്നത്‌.
Tags
Related News
Dont Miss it
0 comments