നീലേശ്വരത്ത്‌ നാലാം 
നഗരഭരണത്തിന്‌ എൽഡിഎഫ്‌

നീലേശ്വരം

നാലാംവട്ടവും നഗരഭരണം ഉറപ്പിക്കാൻ ചിട്ടയായ പ്രവർത്തനങ്ങളുമായി നീലേശ്വരം നഗരസഭയിൽ എൽഡിഎഫ്. നഗരസഭ രൂപീകരിച്ചതുമുതൽ എൽഡിഎഫാണ്‌ ഇവിടെ ഭരണം നടത്തുന്നത്‌. യുവാക്കളെയും ദീർഘകാലത്തെ പ്രവർത്തന പരിചയമുള്ളവരെയും കളത്തിലിറക്കി എൽഡിഎഫ്‌ പ്രചാരണത്തിൽ ഏറെ മുന്നിലാണ്‌. സ്ഥാനാർഥി പ്രഖ്യാപനം വന്നത്‌ മുതൽ എൽഡിഎഫ്‌ സ്ഥാനാർഥികൾ പ്രചാരണത്തിൽ സജീവമാണ്‌. വീടുകൾ കയറിയും സ്ഥാപനങ്ങൾ സന്ദർശിച്ചും വോട്ടുറപ്പിക്കാനുള്ള പ്രവർത്തനം തുടരുന്നു. നഗരസഭ കൺവൻഷന്‌ പിന്നാലെ സമയബന്ധിതമായി വാർഡ് കൺവൻഷനുകളും പൂർത്തിയാക്കി. കുടുംബയോഗങ്ങളും ഗൃഹസന്ദർശനവും പുരോഗമിക്കുന്നു. അഞ്ചുവർഷത്തെ വികസനനേട്ടങ്ങൾ നിരത്തിയാണ് എൽഡിഎഫ്‌ പ്രചാരണം. എന്നാൽ സ്ഥാനാർഥി നിർണയത്തിൽ തുടങ്ങിയ യുഡിഎഫിലെ പ്രശ്നങ്ങൾ ഇപ്പോഴും പരിഹരിക്കപ്പെട്ടിട്ടില്ല. മുസ്ലിംലീഗ് ആവശ്യപ്പെട്ട അധിക സീറ്റ് നൽകാത്തതിൽ പാർടിയിലെ ഒരു വിഭാഗത്തിന്‌ അമർഷമുണ്ട്. കോൺഗ്രസിൽ കാലങ്ങളായി നിലനിൽക്കുന്ന ഗ്രൂപ്പ് പോര്‌ ഇപ്പോഴും തുടരുന്നുണ്ട്‌. 34 -ാം വാർഡിലെ വിമതശല്യം കോൺഗ്രസ് സ്ഥാനാർഥിയ്ക്ക് വെല്ലുവിളിയാണ്‌. വാർഡിലെ ജനങ്ങളുടെ പിന്തുണ തനിക്കാണെന്നാണ് വിമത സ്ഥാനാർഥി ഉഷ അവകാശപ്പെടുന്നത്. ബിജെപി പല വാർഡുകളിലും സ്ഥാനാർഥികളെ നിർത്തിയിട്ടുണ്ടെങ്കിലും പ്രചാരണത്തിൽ സജീവമല്ല. 2020 ലെ തെരഞ്ഞെടുപ്പിൽ ആകെയുള്ള 32 വാർഡിൽ 21 ഇടത്ത്‌ എൽഡിഎഫും 9 ഇടത്ത്‌ യുഡിഎഫും ഒരു വാർഡിൽ കോൺഗ്രസ്‌ വിമതയും ഒന്നിൽ എസ്ഡിപിഐയും വിജയിച്ചു. ഇത്തവണ രണ്ട് വാർഡുകൾകൂടി വർധിച്ച് 34 വാർഡായി. ഇത്തവണ എൽഡിഎഫിൽ സ്വതന്ത്രരുൾപ്പെടെ സിപിഐ എം 31 വാർഡിലും സിപിഐ ഒരിടത്തും ഐഎൻഎൽ രണ്ടിടത്തും മത്സരിക്കുന്നു.