തെരഞ്ഞെടുപ്പിന്‌ പിന്നാലെ പി കെ ഫൈസൽ തെറിക്കും

കാസർകോട്‌

സീറ്റിന്‌ കോഴ വാങ്ങിയെന്ന ആരോപണമുയർന്ന ഡിസിസി പ്രസിഡന്റ്‌ പി കെ ഫൈസലിനെ തദ്ദേശ തെരഞ്ഞെടുപ്പിനുശേഷം ചുമതലയിൽനിന്ന്‌ നീക്കും. ഗുരുതര സാന്പത്തിക ക്രമക്കേടുകൾ ഉൾപ്പെടെ അടിക്കടി ആരോപണം ഉയർന്ന സാഹചര്യത്തിൽ തെരഞ്ഞെടുപ്പ്‌ കഴിഞ്ഞയുടൻ മാറ്റുമെന്നാണ്‌ ഉന്നത നേതൃത്വം നൽകുന്ന സൂചന. കെ സി വേണുപോപാൽ പക്ഷക്കാരനായി പ്രസിഡന്റ്‌ പദവിയിലെത്തിയ ഫൈസൽ പരാജയമാണെന്ന വിലയിരുത്തലാണ്‌ നേതൃത്വത്തിന്‌. രാജ്‌മോഹൻ ഉണ്ണിത്താൻ എംപി ഉൾപ്പെടെയുള്ളവർ പ്രസിഡന്റുമായി അടുപ്പത്തിലല്ല. കഴിഞ്ഞ ദിവസം ജയിംസ്‌ പന്തമാക്കൽ ഡിസിസി വൈസ്‌ പ്രസിഡന്റ്‌ പദവി രാജിവെക്കുന്നതിൽ വരെയെത്തിയ സംഭവപരന്പരകളിൽ ഡിസിസി പ്രസിഡന്റിനും പങ്കുണ്ടെന്ന വിലയിരുത്തലിലാണ്‌ നേതൃത്വം. ഡിസിസി ഓഫീസിൽ വ്യാഴാഴ്‌ച വൈസ്‌ പ്രസിഡന്റ്‌ ജയിംസ്‌ പന്തമാക്കലും ഡിസിസി അംഗം വാസുദേവനും ഏറ്റുമുട്ടിയ ദൃശ്യങ്ങൾ ദൃശ്യമാധ്യമങ്ങളിലൂടെ പുറത്തായിരുന്നു. തെരഞ്ഞെടുപ്പ്‌ കാലത്ത്‌ യുഡിഎഫിന്‌ മാനക്കേടുണ്ടാക്കിയ സംഭവം തന്നെ പുറത്താക്കുന്നതിന്‌ ഡിസിസി പ്രസിഡന്റ്‌ ഒരുക്കിയ കെണിയാണെന്നാണ്‌ ജയിംസ്‌ വാർത്താസമ്മേളനത്തിൽ വെളിപ്പെടുത്തിയത്‌. വീഡിയോ പുറത്തുവിട്ടതിന്‌ ഡിസിസി നേതൃത്വം സസ്‌പെൻഡ്‌ ചെയ്‌ത ബ്ലോക്ക്‌ ജനറൽ സെക്രട്ടറി കെ എം സഫ്‌വാൻ കുന്നിൽ വ്യാഴാഴ്‌ച വാർത്താസമ്മേളനത്തിൽ ഉന്നയിച്ചതും സമാന ആരോപണമാണ്‌. സംഘട്ടനവും വീഡിയോ ചിത്രീകരണവും സംഘടനാനടപടിയും ആസൂത്രിതമാണെന്ന്‌ സഫ്‌വാൻ പറഞ്ഞത്‌. താൻ വീഡിയോ പുറത്തുവിട്ടുവെങ്കിൽ ഡിസിസി പ്രസിഡന്റ്‌ തെളിയിക്കണമെന്നും സഫ്‌വാൻ വെല്ലുവിളിച്ചു. വിജയസാധ്യതയുള്ള സീറ്റിൽ സ്ഥാനാർഥികളാവാൻ മോഹമുള്ളവരിൽനിന്ന്‌ ഫൈസൽ പരക്കെ പണം വാങ്ങിയെന്നാണ്‌ പന്തമാക്കൽ വെളിപ്പെടുത്തിയത്‌. കെ എം മാണിയുടെ മരുമകനും കഴിഞ്ഞ നിയമസഭ തെരഞ്ഞെടുപ്പിൽ തൃക്കരിപ്പൂരിൽ യുഡിഎഫ്‌ സ്ഥാനാർഥിയുമായിരുന്ന എം പി ജോസഫിന്‌ വണ്ടിച്ചെക്ക്‌ നൽകി കബളിപ്പിച്ച സംഭവം തീർപ്പാക്കാൻ ഇ‍ൗസ്‌റ്റ്‌ എളേരിയിലെ സ്ഥാനാർഥി പട്ടികയിൽ ഉൾപ്പെട്ടവരിൽ നിന്ന്‌ പലവട്ടം പണം വാങ്ങിയെന്ന വിവരവും പന്തമാക്കൽ പുറത്തുവിട്ടു. പി കെ ഫൈസൽ അഞ്ചുലക്ഷം രൂപ തട്ടിയെന്ന്‌ കാണിച്ചാണ്‌ ജോസഫ്‌ കോടതിയെ സമീപിച്ചിരുന്നു. നിയമസഭാ തെരഞ്ഞെടുപ്പിന്‌ ശേഷം 2022 നവംബർ 28ന് രണ്ടുതവണകളായി ബാങ്ക് അക്കൗണ്ട് വഴിയാണ് 10 ലക്ഷം രൂപ കടം വാങ്ങിയത്. കെപിസിസി നേതാക്കൾക്ക് പരാതി നൽകിയതിന്‌ പിന്നാലെ അഞ്ചുലക്ഷം രൂപ തിരിച്ചുകൊടുത്തെങ്കിലും ബാക്കി നൽകിയില്ല. ജില്ലയുടെ പലഭാഗങ്ങളിലും സ്ഥാനാർഥി പട്ടികയിൽ പലരും ഇടംപിടിച്ചത്‌ സീറ്റ്‌ വിൽപനയുടെ ഭാഗമാണെന്ന ആരോപണം പല മണ്ഡലം കമ്മറ്റികളും ഉയർത്തി. ജില്ലയിൽ 58 വിമതർ യുഡിഎഫിനെതിരെ രംഗത്തുണ്ട്‌. സീറ്റ്‌ വിൽപന ആരോപണമുയർത്തിയാണ്‌ പലരും വിമതരായി രംഗത്തിറങ്ങിയത്‌. പി കെ ഫൈസലിന്റെ നേതൃത്വം സംഘടനയെ ദുർബലമാക്കിയെന്ന്‌ നേതൃത്വം വിലയിരുത്തുന്നു. ഡിസിസി യോഗം ചേർന്ന്‌ തീരുമാനമെടുക്കുന്നതിൽ വീഴ്‌ചയുണ്ടായി. ഫൈസലും ഒപ്പമുള്ള ചിലരും ചേർന്ന്‌ തീരുമാനങ്ങൾ ഹൈജാക്ക്‌ ചെയ്യുകയാണെന്നാണ്‌ അണികളുടെ വികാരം.

ഓഫീസിലെ സംഘർഷം; ഡിസിസിപ്രസിഡന്റ്‌ തന്നെ ഇരയാക്കുന്നു– സഫ്‌വാൻ കുന്നിൽ

കാസർകോട്‌

ഡിസിസി ഓഫീസിൽ കഴിഞ്ഞ ദിവസമുണ്ടായ സംഘർഷവും വീഡിയോ ദൃശ്യങ്ങൾ പ്രചരിച്ചതും ആസൂത്രിതമാണെന്ന്‌ സംഭവത്തിന്റെ പേരിൽ സസ്പെൻഡ്‌ ചെയ്യപ്പെട്ട കോൺഗ്രസ്‌ ബ്ലോക്ക്‌ ജനറൽ സെക്രട്ടറി സഫ്‌വാൻ കുന്നിൽ വാർത്താസമ്മേളനത്തിൽ പറഞ്ഞു. താനാണ്‌ വീഡിയോ പ്രചരിപ്പിച്ചതെന്ന്‌ ആരോപിച്ചാണ്‌ നോട്ടീസ്‌ പോലും തരാതെ നടപടിയെടുത്തത്‌. സൈബർപൊലീസിൽ പരാതിപ്പെട്ടാൽ ശാസ്‌ത്രീയമായി തെളിയുന്ന കാര്യത്തിന്‌ എന്നെ ഇരയാക്കുകയാണ്‌. താൻ വീഡിയോ പുറത്തുവിട്ടുവെങ്കിൽ ഡിസിസി പ്രസിഡന്റ്‌ തെളിയിക്കണമെന്നും സഫ്‌വാൻ വെല്ലുവിളിച്ചു. നടപടിക്ക്‌ മുന്പ്‌ സംഭവിച്ചത്‌ എന്താണെന്ന വിശദീകരണം പോലും ചോദിച്ചില്ല. കയ്യേറ്റവും വീഡിയോ ചിത്രീകരിച്ചതും അത്‌ പുറത്തുവിട്ടതും ആസൂത്രിതമായാണ്‌. സംഭവം അന്വേഷിക്കാൻ രണ്ടംഗസമിതിയെ നിയോഗിച്ചുവെന്ന്‌ കേട്ടെങ്കിലും അവർ തന്റെ മൊഴിയെടുത്തില്ലെന്നും സഫ്‌വാൻ വെളിപ്പെടുത്തി. കെപിസിസിക്ക്‌ പരാതി നൽകിയതായും സഫ്‌വാൻ പറഞ്ഞു.