എൽഡിഎഫ്‌ വൻ മുന്നേറ്റമുണ്ടാക്കും: കെ പി സതീഷ്‌ചന്ദ്രൻ

കാഞ്ഞങ്ങാട്‌

തദ്ദേശ തെരഞ്ഞെടുപ്പിൽ എൽഡിഎഫ്‌ ജില്ലയിൽ വൻ മുന്നേറ്റമുണ്ടാക്കുമെന്ന്‌ ജില്ലാ കൺവീനർ കെ പി സതീഷ്‌ ചന്ദ്രൻ. കാഞ്ഞങ്ങാട്‌ പ്രസ്‌ഫോറത്തിന്റെ ‘തദ്ദേശപ്പോര്‌ 2025 ’ മുഖാമുഖത്തിൽ സംസാരിക്കുകയായിരുന്നു അദ്ദേഹം. കേരളത്തിലെ എൽഡിഎഫ്‌ സർക്കാറിന്റെ വികസനനേട്ടങ്ങളും ക്ഷേമപദ്ധതികളും എൽഡിഎഫിന്റെ മതേതര നിലപാടും തെരഞ്ഞെടുപ്പിൽ സ്വാധീനം ചെലുത്തും. ഇതുകൂടാതെ തദ്ദേശ തെരഞ്ഞെടുപ്പിൽ സ്ഥാനാർഥികളുടെ ജനകീയതയും വ്യക്തിബന്ധങ്ങളും വോട്ടർമാരെ സ്വാധീനിക്കും. ഇത്‌ പരിഗണിച്ചാണ്‌ എൽഡിഎഫ്‌ സ്ഥാനാർഥികളെ നിശ്‌ചയിച്ചത്‌. മുന്നണി ഒറ്റക്കെട്ടായാണ്‌ തെരഞ്ഞെടുപ്പിനെ നേരിടുന്നത്‌. നിലവിൽ ജില്ലാപഞ്ചായത്തും ആറുബ്ലോക്കുപഞ്ചായത്തിൽ നാലിലും 39 ഗ്രാമപഞ്ചായത്തുകളിൽ 19ലും ഒന്നിൽ എൽഡിഎഫ്‌ പിന്തുണയിലും മൂന്നുനഗരസഭകളിൽ രണ്ടും എൽഡിഎഫിനായിരുന്നു ഭരണം. ഇത്‌ നിലനിർത്തുന്നതിനുപുറമെ കഴിഞ്ഞതവണ നേരിയ വോട്ടിനുനഷ്ടപ്പെട്ട പുല്ലൂർപെരിയ, വെസ്‌റ്റ്‌ എളേരി പഞ്ചായത്തുകൾ തിരിച്ചുപിടിക്കും. ചില പഞ്ചായത്തുകളിൽ എൽഡിഎഫ്‌ അട്ടിമറിവിജയം നേടും. ജില്ലയിലെ അഞ്ചുമണ്ഡലങ്ങളിലും ഭരണ പ്രതിപക്ഷഭേദമില്ലാതെ നടപ്പാക്കിയ വികസനപ്രവർത്തനങ്ങൾ നാടിനുണ്ടാക്കിയ മുന്നേറ്റം നേരിട്ടനുഭവിച്ചുക്കുന്നവരാണ്‌ ജനം. കേന്ദ്രസർക്കാർ കേരളത്തിനർഹമായതൊന്നും നൽകാതിരിക്കുന്പോൾ കേരളത്തിനുവേണ്ടി ശബ്ദിക്കാൻ് യുഡിഎഫ്‌ എംപിമാർ തയ്യാറാകുന്നുമില്ല. ഇതെല്ലാം മലയാളികൾ തിരിച്ചറിയുന്നുണ്ട്‌. എൽഡിഎഫിന്‌ എറ്റവും അന‍ുകൂല രാഷ്ട്രീയ സാഹചര്യമാണ്‌ ജില്ലയിലുള്ളതെന്നും കുടുംബയോഗങ്ങളിൽ വൻ പങ്കാളിത്തമാണെന്നും അദ്ദേഹം പറഞ്ഞു. ഫസൽ റഹ്‌മാൻ അധ്യക്ഷനായി.