വീരമലക്കുന്ന്​ കാക്കാൻ മനുഷ്യമതിൽ

ചെറുവത്തൂർ

ഒരു കുന്നിടിയുമ്പോൾ സമീപത്തെ ജീവിത സാഹചര്യമാണ്​ അടരുന്നതെന്ന് വിളിച്ചുപറഞ്ഞ് വീരമലക്കുന്ന് സംരക്ഷിക്കാൻ സംഘടിപ്പിച്ച ‘വീരമലക്കൊരു ധീരമതിലി’ലിൽ നാടൊന്നാകെ അണിനിരന്നു. മലയുടെ സമീപപ്രദേശങ്ങളായ മയിച്ച, വെങ്ങാട്ട‍്, കൊവ്വൽ എന്നിവിടങ്ങളിൽ നിന്നുപുറമെ നൂറുകണക്കിനാളുകൾ കുന്നുസംരക്ഷണ പ്രതിരോധ മതിലിനെത്തി. ദേശീയപാത വികസനത്തിന്റെ ഭാഗമായി നിർമാണകമ്പനി അശാസ്ത്രീയമായി കുന്നിടിച്ചതിനെ തുടർന്നുള്ള അപകടാവസ്ഥ പരിഹരിക്കണമെന്നാവശ്യപ്പെട്ട് ജനകീയ സമിതി നേതൃത്വത്തിലാണ് പ്രതിരോധ മതിൽ തീർത്തത്. അനധികൃതമായി കുന്നിടിച്ചതിനെ തുടർന്ന്​ മയിച്ചയിലും, വെങ്ങാട്ടും സമീപപ്രദേശങ്ങളിലുമുണ്ടായ ആശങ്കകൾക്ക്​​ പരിഹാരം കാണണമെന്ന്​ ആവശ്യപ്പെട്ട്​ നാട്ടുകാർ കുന്നുസംരക്ഷണ പ്രതിജ്ഞയെടുത്തു. സർവീസ്​ റോഡ്​ നിർമിക്കുക, കുടിവെള്ളത്തിനായി ഉപയോഗിച്ചിരുന്ന കിണർ പുനസ്ഥാപിക്കുക, പഞ്ചായത്ത്​ കുളം സംരക്ഷിക്കുക, ശ്​മശാനം പുനർനിർമിക്കുക, ഇരുവശത്തും ഓവുചാൽ സ്ഥാപിക്കുക, പാലം നിർമാണത്തിനായി പുഴക്ക്​ കുറുകെ നിർമിച്ച ബണ്ട്​ പൊളിച്ച്​ മാറ്റുക തുടങ്ങിയ ആവശ്യങ്ങളാണ്​ സമരത്തിൽ ഉന്നയിച്ചത്​​. പഞ്ചായത്ത്​ പ്രസിഡന്റ്​ സി വി പ്രമീള ഉദ്​ഘാടനം ചെയ്​തു. എം രാമകൃഷ്​ണൻ അധ്യക്ഷനായി.ഗ്രാമപഞ്ചായത്തംഗം മഞ്​ജുഷ, സിപിഐ എം ചെറുവത്തൂർ ഏരിയാ സെക്രട്ടറി കെ ബാലകൃഷ്​ണൻ, കെ കെ രാജേന്ദ്രൻ, മുകേഷ്​ ബാലകൃഷ്​ണൻ, രാജീവൻ ചീമേനി, എം രാമകൃഷ്​ണൻ, എം പി കുഞ്ഞിരാമൻ, കരിമ്പിൽ കൃഷ്​ണൻ, രവീന്ദ്രൻ മാണിയാട്ട്​, വി വി കൃഷ്ണൻ,​ എ വി ദാമോദരൻ, സിന്ധു, എം ശിശുപാലൻ, എന്നിവർ സംസാരിച്ചു. വി വി കൃഷ്​ണൻ സ്വാഗതവും എം പി കുഞ്ഞിരാമൻ നന്ദിയും പറഞ്ഞു.