14 ഹരിതകർമ സേനക്കാർ

കാസർകോട്‌

വൃത്തിയുടെ രാഷ്‌ട്രീയം കൂടി വോട്ടർമാരോട്‌ പറയുന്നുണ്ട്‌ ഹരിതകർമസേനാംഗങ്ങളുടെ പോരാട്ടം. ജില്ലയിൽ 14 ഹരിതകർമസേനാംഗങ്ങളാണ്‌ ഇക്കുറി തദ്ദേശ തെരഞ്ഞെടുപ്പിൽ ജനവിധിതേടുന്നത്‌. നഗരസഭയിലേക്ക്‌ ഒരാളും ബ്ലോക്ക്‌ പഞ്ചായത്തിലേക്ക്‌ രണ്ടുപേരും ഗ്രാമപഞ്ചായത്ത്‌ വാർഡുകളിലേക്ക്‌ 12 പേരുമാണ്‌ പോരിനിറങ്ങുക. പടന്നയിലും ചെമ്മനാടും രണ്ടുപേർ ഹരിതസേനാംഗങ്ങളാണ്‌. കേരളം സന്പൂർണ ശുചിത്വ സംസ്ഥാനമായി മാറാനൊരുങ്ങുന്പോൾ ഹരിതകർമസേനാംഗങ്ങൾ തെരഞ്ഞെടുക്കപ്പെടുന്നത്‌ മാലിന്യസംസ്‌കരണ രംഗത്ത്‌ പ്രദേശിക സർക്കാരുകളുടെ ഇടപെടൽ ശക്തമാക്കാൻ സഹായിക്കും. നീലേശ്വരം നഗരസഭയിലെ ഇരുപതാം വാർഡായ പള്ളിക്കര സെക്കന്റിലാണ്‌ കെ വി ലീല എൽഡിഎഫിനായി രംഗത്തുള്ളത്‌. കാറഡുക്ക ബ്ലോക്ക്‌ പഞ്ചായത്തിൽ ആദൂർ ഡിവിഷനിലാണ്‌ ഹരിതകർമസേനാംഗമായ മാധവി എൽഡിഎഫിനായി മത്സരിക്കുന്നത്‌. ഇവിടെ യുഡിഎഫിലെ ബേബി ദാമോദരനാണ്‌ മുഖ്യഎതിരാളി. കാറഡുക്ക ബ്ലോക്കിലെ തന്നെ കള്ളാർ ഡിവിഷനിൽ എൽഡിഎഫ്‌ സഥാനാർഥിയായി ബിന്ദു സുനിൽ പൈനാപ്പിൾ ചിഹ്‌നത്തിൽ മത്സരത്തനുണ്ട്‌. പടന്ന പഞ്ചായത്തിലെ 11ാം വാർഡായ തെക്കുപുറം- മുള്ളോട്ടുകടവിൽ ഹരിത കർമസേനാംഗമായ പി കെ പുഷ്പ എൽഡിഎഫിനായി അരിവാൾ ചുറ്റിക നക്ഷത്രം അടയാളത്തിൽ മത്സരിക്കുന്നു. പടന്ന ഒന്പതാംവാർഡായ നടക്കാവ് പോട്ടച്ചാലിൽ ഹരിതകർമസേനാംഗമായ ക‍ൗസല്യയും സ്ഥാനാർഥിയാണ്. എൽഡിഎഫിലെ ഇ വി ചിത്രയാണ്‌ മുഖ്യഎതിരാളി. ചെമ്മനാട്‌ ഒന്നാം വാർഡിൽ എൽഡിഎഫ്‌ സ്വതന്ത്രയായാണ്‌ ഉഷയുടെ മത്സരം. ഒന്പതാം വാർഡിൽ സുനിത വിജയനും എൽഡിഎഫിനായി രംഗത്തുണ്ട്‌. ദേലന്പാടി അഞ്ചാം വാർഡ്‌ പുതിയന്പലത്ത്‌ ബിന്ദു(സിപിഐ എം), വോർക്കാടി 11ാം വാർഡ്‌ ബോർക്കളയിൽ ജാനറ്റ്‌ ക്രസ്‌റ്റ(സിപിഐ എം), ഇ‍ൗസ്‌റ്റ്‌ എളേരി 16ാം വാർഡ്‌ കന്പല്ലൂർ വാർഡിൽ സ‍ൗമ്യ ജോമോൻ (കോൺഗ്രസ്‌), മുളിയാർ ഒന്പതാം വാർഡിൽ ശ്യാമള (സിപിഐ എം), പുല്ലൂർ പെരിയ നാലാം വാർഡിൽ രാജലക്ഷ്‌മി(ബിജെപി), മൊഗ്രാൽ പുത്തൂർ വാർഡ്‌ 15 പുഷ്‌പ നീർച്ചാൽ(സിപിഐ എം) കള്ളാർ 14ാം വാർഡിൽ ബിന്ദു(കോൺഗ്രസ്‌) എന്നിവരും വിവിധ മുന്നണികൾക്കായി മത്സരിക്കുന്നു.