ദേശീയപാതയിലെ 
കമ്പിക്കള്ളന്മാർ പിടിയിൽ

​പൊയിനാച്ചി

ദേശീയപാത നിർമാണത്തിനായി റോഡരികിൽ സൂക്ഷിച്ച നാലേമുക്കാൽ ലക്ഷം രൂപ വിലവരുന്ന ഇരുമ്പ് കൈവരികൾ കടത്തിക്കൊണ്ടുപോയ യൂത്ത് ലീഗ് നേതാവ് ഉൾപ്പെടെ മൂന്നുപേർ പിടിയിൽ. യൂത്ത് ലീഗ് കുണിയ ശാഖ ട്രഷറർ മുഹമ്മദ് റിഷാദ് (26), കുണിയ കുണ്ടൂർ വീട്ടിൽ അലി അസ്കർ (26), പെരിയ ചെക്കിപ്പള്ളത്തെ എം മൻസൂർ (31) എന്നിവരാണ്‌ പിടിയിലായത്‌. ഇവരെ ഹോസ്‌ദുർഗ്‌ ജെഎഫ്‌സിഎം മജിസ്‌ട്രേറ്റ്‌ കോടതി റിമാൻഡ്‌ ചെയ്‌തു. ചൊവ്വാഴ്ച പൊയിനാച്ചി പെട്രോൾ പമ്പിന് സമീപമെത്തി വീണ്ടും കൈവരികൾ മോഷ്‌ടിക്കുന്നതിനിടെയാണ്‌ സംഘം പിടിയിലായത്‌. ​സൂപ്പർവൈസർ രാജപ്പൻപിള്ള നാട്ടുകാരുടെ സഹായത്തോടെ സംഘത്തെ തടഞ്ഞുവച്ച് പൊലീസിൽ അറിയിക്കുകയായിരുന്നു. ദേശീയപാതയുടെ സർവീസ് റോഡിനോട് അനുബന്ധിച്ചുള്ള നടപ്പാതയിൽ കാൽനടയാത്രക്കാരുടെ സുരക്ഷയ്ക്കായി സ്ഥാപിക്കുന്ന കൈവരികളാണ് മോഷ്ടിച്ചത്. രണ്ട് മീറ്റർ നീളവും ഒന്നര മീറ്റർ ഉയരവുമുള്ള ഒരു ഇരുമ്പ് കമ്പിക്ക് 10,320 രൂപ വിലയുണ്ട്‌. 4.75 ലക്ഷം രൂപയുടെ സാധനങ്ങളാണ് മോഷണം പോയത്‌. പൊയിനാച്ചി മുതൽ മൈലാട്ടി വരെയുള്ള ഭാഗത്ത്‌ സ്ഥാപിക്കാനായി ഇറക്കിവച്ച കമ്പികളാണ് ഞായറാഴ്ച രാത്രി പത്തരയോടെ മോഷണം പോയത്. മൂന്നുപേർ വാഹനത്തിലെത്തി ഇരുമ്പ് കമ്പികൾ കൊണ്ടുപോകുന്നത് സമീപത്തെ കടയിലുള്ളവർ കണ്ടിരുന്നു. ചൊവ്വാഴ്ച വീണ്ടും എത്തിയപ്പോഴാണ്‌ മേൽപ്പറമ്പ് എസ്ഐ എൻ സുരേഷ് കുമാറും സംഘവും അറസ്റ്റുചെയ്തത്.