താൽകാലിക സംവിധാനമെന്ന് ദേശീയപാത അതോറിറ്റി

തിരുവനന്തപുരം

കുമ്പള ആരിക്കാടിയിലെ ടോൾ താൽക്കാലിക സംവിധാനം മാത്രമാണെന്ന് ദേശീയപാത അതോറിറ്റി അറിയിച്ചതായി മന്ത്രി പി എ മുഹമ്മദ് റിയാസ്. എ കെ എം അഷ്റഫ് എംഎല്‍എ അവതരിപ്പിച്ച സബ്മിഷന് നിയമസഭയിൽ നൽകിയ മറുപടിയിലാണ് ഇക്കാര്യം അറിയിച്ചത്. ദേശീയപാത- 66 ല്‍ കാസര്‍കോട് ജില്ലയില്‍ 81 കിലോമീറ്ററില്‍ 70 കിലോമീറ്ററില്‍ ആറുവരി വികസനം പൂര്‍ത്തിയായി. ആദ്യ റീച്ചായ തലപ്പാടി - ചെങ്കള 39 കിലോമീറ്ററില്‍ 99.2 ശതമാനം പ്രവൃത്തി തീർന്നു. ​ദേശീയപാത 66ന്റെ രൂപകൽപ്പന, നിർമാണം എന്നിവ ദേശീയപാത അതോറിറ്റി മുഖേനയാണ്. അടിസ്ഥാന സൗകര്യ വികസനത്തിന് തുടർച്ചയായി നിക്ഷേപം നടത്തുന്നതിന് യൂസർ ഫീ മുഖേന വരുമാനം കണ്ടെത്തുന്നത് രാജ്യമെമ്പാടും പിന്തുടരുന്ന നടപടിക്രമമാണെന്നാണ് ദേശീയപാതാ അതോറിറ്റിയുടെ മറുപടി. ദേശീയപാത സെക്ഷൻ ഒമ്പതിലെ ചട്ടംപ്രകാരം രേ ഭാഗത്തേക്കും ഒരേ ദിശയിലുമായി രണ്ട് ടോൾ പ്ലാസകൾ സാധാരണയായി 60 കിലോമീറ്റർ ദൂരത്തിനുള്ളിൽ പാടില്ല എന്നുണ്ട്. എന്നാൽ സവിശേഷ സാഹചര്യങ്ങളിൽ ടോൾപ്ലാസ നിർവഹണ ഏജൻസിക്ക് അധികാരമുണ്ട് എന്ന് ദേശീയപാത അതോറിറ്റി പറയുന്നു. ചെങ്കള-– നീലേശ്വരം സ്ട്രെച്ച് പൂർത്തിയായിക്കഴിഞ്ഞാൽ ടോൾ പ്ലാസ പിൻവലിച്ച് നിയമപ്രകാരം സ്ഥലം കണ്ടെത്തി സ്ഥിരം പ്ലാസ സ്ഥാപിക്കും. താൽകാലിക ടോൾ പ്ലാസ സ്ഥാപിക്കുന്നതിന് ഹൈക്കോടതിയും അനുമതി നൽകിയിട്ടുണ്ടെന്നും അതോറിറ്റി അറിയിച്ചിട്ടുണ്ട്. ഹൈക്കോടതിയുടെ വിധി നിലനിൽക്കുന്ന സാഹചര്യത്തിൽ പ്രായോഗികമായി എന്തെങ്കിലും ചെയ്യാനാകുമോ എന്ന് പരിശോധിക്കാമെന്നും മന്ത്രി അറിയിച്ചു.