കുഴിയൊഴിയാ വഴിയിൽ 
കുരുക്കൊഴിയുന്നില്ല

നീലേശ്വരം

ദേശീയപാത രണ്ടാം റീച്ചിൽ സർവീസ്‌ റോഡ്‌ മുഴുവൻ തകർന്നത്‌ ശരിയാക്കണമെന്ന്‌ കലക്ടറടക്കം ജില്ലാ ഭരണസംവിധാനവും ജനപ്രതിനിധികളും ആവശ്യപ്പെട്ടിട്ടും കൂസലില്ലാതെ കരാറുകാർ. ദിവസങ്ങളായി തുടരുന്ന മഴയിൽ ദേശീയപാത നിർമാണത്തിനിടെ സർവീസ് റോഡുകളിൽ നിറയെ കുഴികൾ രൂപപ്പെട്ടെങ്കിലും അറ്റകുറ്റപ്പണി നടത്താൻ കരാറുകാർ തയ്യാറാകാത്തതിനെത്തുടർന്ന്‌ നീലേശ്വരം കരുവാച്ചേരി മുതൽ കാഞ്ഞങ്ങാട്‌ സ‍ൗത്ത്‌ വരെ രാവിലെയും വൈകിട്ടും രൂക്ഷമായ കുരുക്കാണ്‌. പള്ളിക്കര മേൽപ്പാലമിറങ്ങിയാൽ തുടങ്ങും വാഹനങ്ങൾ നീങ്ങാനുള്ള കാത്തിരിപ്പ്‌. നീലേശ്വരം പൊലീസ് സ്‌റ്റേഷൻ പരിസരം മുതൽ പടന്നക്കാട് മേൽപ്പാലം വരെ അതിരൂക്ഷമായ കുരുക്കാണ്‌. രാവിലെ 9.30നും 10.30നും ഇടയിൽ ഇ‍ൗഭാഗത്ത്‌ വാഹനമെത്തിയാൽ പെട്ടതുതന്നെ. അരമണിക്കൂറെടുക്കും വണ്ടിയൊന്ന്‌ നീങ്ങിക്കിട്ടാൻ. ദേശീയപാതയിൽ തെരുറോഡ് ജങ്‌ഷൻ വഴി വൺവേ ആയിവരാനാണ് നിർദേശമെങ്കിലും പയ്യന്നൂർ ഭാഗത്തുനിന്നുള്ള ബസുകളും വാഹനങ്ങളുമെല്ലാം യഥേഷ്ടം കയറി വരുന്നതിനാൽ കുരുക്ക് കൂടുതൽ മുറുകി. നിർദേശം ലംഘിച്ച് ഇതുവഴി വാഹനങ്ങൾ കയറിയാൽ കർശന നടപടി സ്വീകരിക്കുമെന്ന്‌ നീലേശ്വരം പോലീസ് അറിയിച്ചു. നിലവിൽ വൺവേ ആയി ഉപയോഗിക്കുന്ന തെരു റോഡിലെ അനധികൃത പാർക്കിങ്ങിനെതിരെയും നടപടിയുണ്ടാകും. ദിവസങ്ങളോളം തെളിഞ്ഞ കാലാവസ്ഥ ലഭിച്ചിട്ടും ദേശീയപാത നിർമാണ കരാറുകാർ റോഡിൽ കാര്യമായ പണിയൊന്നും നടത്തിയില്ലെന്ന് യാത്രക്കാരും മോട്ടോർ തൊഴിലാളികളും പറയുന്നു. മാർക്കറ്റ് ജങ്‌ഷനും പൊലീസ് സ്‌റ്റേഷനുമിടയിലെ റോഡരികിലെ ഓവുചാലിൽ കഴിഞ്ഞദിവസം വീണ ഇരുചക്ര വാഹനയാത്രക്കാരൻ ഭാഗ്യംകൊണ്ടാണ് രക്ഷപ്പെട്ടത്. ഗതാഗതക്കുരുക്ക് മുറുകുന്നതോടെ റോഡിൽ വാക്കേറ്റവും മറ്റും ഉണ്ടാകുന്നതും പൊലീസിന് തലവേദനയായി.