സര്‍വീസ് റോഡ് പാതിയിൽ, ഓവുചാലും നടപ്പാതയുമില്ല
പെരിയ ദേശീയപാതയിൽ യാത്ര ദുഷ്‌കരം
പെരിയ
പെരിയ ടൗണില്‍ ദേശീയപാതയിൽ ഗതാഗതം ദുഷ്കരവും അപകടം നിറഞ്ഞതുമാകുന്നു. ദേശീയപാത കരാര്‍ കമ്പനിയായ മേഘയുടെ കെടുകാര്യസ്ഥതയാണ്‌ കാരണം. ദേശീയപാതക്ക് ഇരുവശത്തും സര്‍വീസ് റോഡ് നിര്‍മാണം ഇനിയും പൂര്‍ത്തിയായില്ല. ഓവുചാല്‍ നിര്‍മാണം നടന്നിട്ടില്ല. കാല്‍നടയാത്രക്കുള്ള സൗകര്യംപോലും ഏര്‍പ്പെടുത്തിയിട്ടില്ല. കനത്ത മഴയെ സര്‍വീസ് റോഡുകള്‍ പൊട്ടിപ്പൊളിഞ്ഞു. അടിപ്പാതക്കകത്തും സര്‍വീസ് റോഡിലുമുള്ള കുഴികള്‍ കാരണം ഈ ഭാഗത്ത് അപകടഭീഷണിയാണ്‌. ഗതാഗതക്കുരുക്കും രൂക്ഷം. പെരിയ കല്യോട്ട് റോഡ് ജങ്‌ഷനിലാണ് കൂടുതല്‍ അപകടസാധ്യത. കിഴക്കുഭാഗത്തെ തകര്‍ന്ന സര്‍വീസ് റോഡിലൂടെ രണ്ടുഭാഗത്തുനിന്നും ബസുകള്‍ അടക്കമുള്ള വാഹനങ്ങള്‍ കടന്നുപോകുന്ന സമയത്ത് തന്നെ പടിഞ്ഞാറുവശത്തുനിന്ന് അടിപ്പാതയിലൂടെയും കിഴക്കുവശത്തുനിന്ന് കല്ല്യോട്ട് ഭാഗത്തുനിന്നുള്ള റോഡിലൂടെയും വാഹനങ്ങള്‍ വരുമ്പോള്‍ ഇവ നിയന്ത്രണം വിടാനും കൂട്ടിയിടിക്കാനും സാധ്യതയുണ്ട്. ഈ സമയത്ത് ഇവിടേക്ക് വരുന്ന കാല്‍നടയാത്രക്കാരും ഭീഷണിയിലാണ്. കിഴക്കുവശത്തെ സര്‍വീസ് റോഡില്‍ വടക്കുഭാഗത്ത് ആളുകള്‍ക്ക് നടന്നുപോകാനുള്ള സൗകര്യമില്ല. വാഹനങ്ങള്‍ വരുമ്പോള്‍ ഒഴിഞ്ഞുമാറാന്‍ പോലും സൗകര്യമില്ല. ബസ് സ്‌റ്റോപ്പ്‌ പരിസരത്ത് ആളുകള്‍ക്ക് നില്‍ക്കാന്‍ ഇടമില്ല. സര്‍വീസ് റോഡിന് സമീപത്താണ് യാത്രക്കാര്‍ ബസ് കാത്തുനില്‍ക്കുന്നത്. ഇവിടങ്ങളിലൊന്നും ടാക്സികള്‍ക്കും ടൂറിസ്റ്റ് വാഹനങ്ങള്‍ക്കും നിര്‍ത്തിയിടാനും സ്ഥലസൗകര്യമില്ല. വാഹനങ്ങള്‍ തോന്നുന്നത് പോലെ നിര്‍ത്തിയിടുന്നു. ഓവുചാല്‍ നിര്‍മിക്കാത്തതിനാല്‍ പാതയിലും പരിസരത്തും അഴുക്കുവെള്ളം കെട്ടിക്കിടക്കുന്നു. വെള്ളം മൂടിയതിനാല്‍ കുഴി കാണാനാകാതെ വാഹനങ്ങള്‍ അപകടത്തില്‍പ്പെടുകയാണ്. സര്‍വീസ് റോഡ് പൂര്‍ത്തിയാക്കാതെ ഓവുചാല്‍ നിര്‍മിക്കാനാകില്ല. എന്നാല്‍ ഇവിടെയുള്ള നിര്‍മാണ പ്രവൃത്തി താല്‍ക്കാലികമായി നിര്‍ത്തിവച്ചിരിക്കുകയാണ്.
Related News
Dont Miss it
0 comments