ആരിക്കാടി ടോൾ പ്ലാസ നിർമാണത്തിനെതിരെ ബഹുജന മാർച്ച്‌

കുമ്പള

ദേശീയപാതയിൽ ആരിക്കാടിയിൽ ടോൾ പ്ലാസ നിർമിക്കുന്നതിനെതിരെ ജനകീയ ആക്‌ഷൻ കമ്മിറ്റി നേതൃത്വത്തിൽ ബഹുജന മാർച്ച്‌ നടത്തി. വിവിധ രാഷ്ട്രീയപാർടികളുടെയും വ്യാപാരി സംഘടനയുടെയും പൊതുജനങ്ങളുടെയും സഹകരണത്തോടെയായിരുന്നു മാർച്ച്. ബദിയഡുക്ക റോഡിൽ നിന്നാരംഭിച്ച മാർച്ചിൽ നൂറുകണക്കിനാളുകൾ പങ്കെടുത്തു. പഞ്ചായത്ത് പ്രസിഡന്റ്‌ യു പി താഹിറ ഉദ്ഘാടനംചെയ്തു. പി രഘുദേവൻ, പുത്തിഗെ പഞ്ചായത്ത് പ്രസിഡന്റ്‌ ഡി സുബ്ബണ്ണ ആൾവ, കുമ്പള പഞ്ചായത്ത് വൈസ് പ്രസിഡന്റ് നാസർ മൊഗ്രാൽ, സി എ സുബൈർ, എ കെ ആരിഫ്, അഷ്റഫ് കാർള, അൻവർ, ലക്ഷ്മണപ്രഭു എന്നിവർ സംസാരിച്ചു. ദേശീയപാതയിലെ ഗതാഗതം തടസപ്പെടുത്തിയതിന് സമരസമിതി നേതാക്കളും വിവിധ രാഷ്ട്രീയപാർടി ഭാരവാഹികളുമടക്കം 10 പേർക്കെതിരെ കുമ്പള പൊലീസ് കേസെടുത്തു. വിവിധ ആവശ്യങ്ങൾക്കായി മംഗളൂരുവിനെ ആശ്രയിക്കുന്നവരാണ്‌ ജില്ലയിലെ ഭൂരിപക്ഷം ജനങ്ങളും. നിലവിൽ തലപ്പാടിയിൽ വലിയ തുക ടോൾ നൽകിയാണ്‌ വാഹനങ്ങൾ കടന്നുപോകുന്നത്‌. കേവലം 20 കിലോമീറ്ററിനുള്ളിൽ വീണ്ടും ടോൾ പ്ലാസ നിർമിക്കുന്നത്‌ ജനങ്ങളിൽ ഇരട്ടിഭാരം അടിച്ചേൽപിക്കലാണ്‌. ദേശീയപാത അതോറിറ്റിയുടെ കണക്കുപ്രകാരം തലപ്പാടി കഴിഞ്ഞാൽ കേരളത്തിലെ ആദ്യ ടോൾ പ്ലാസ വരുന്നത്‌ ചാലിങ്കാലിലാണ്‌. ചെർക്കള മുതൽ ജില്ലാ അതിർത്തിവരെ ദേശീയപാത നിർമാണം പാതിപോലും പൂർത്തിയായിട്ടില്ല. ചെങ്കള– തലപ്പാടി റീച്ച്‌ നിർമാണം പൂർത്തിയായതോടെ ഇതുവഴിയാണ്‌ മിക്ക വാഹനങ്ങളും സർവീസ്‌ നടത്തുന്നത്‌. ചാലിങ്കാൽ വരെ പണി പൂർത്തിയാകാൻ ഇനിയും മാസങ്ങൾ നീളുമെന്നിരിക്കെ അതുവരെ ചെങ്കള– തലപ്പാടി വഴി റീച്ചിലൂടെ വാഹനങ്ങൾ ടോൾ നൽകാതെ സർവീസ്‌ നടത്തുന്നത്‌ ടോൾ പിരിക്കുന്ന കമ്പനിക്ക്‌ നഷ്ടമുണ്ടാക്കുമെന്നതിനാലാണ്‌ മാനദണ്ഡം കാറ്റിൽപറത്തി ആരിക്കാടിയിൽ ടോൾ പ്ലാസ സ്ഥാപിക്കുന്നത്‌.