രാവിലെയും ഉച്ചയ്ക്കും രാത്രിയും തണുത്ത്‌ വിറയ്‌ക്കുന്നേ...

പത്തനംതിട്ട

ഇ‍ൗ നാടിനിത്‌ എന്തുപറ്റി? രാവിലെയും ഉച്ചയ്ക്കും രാത്രിയും തണുപ്പ്‌ തന്നെ. ഇതെന്താ മൂന്നാറോ ഉ‍ൗട്ടിയോ എന്ന്‌ നാട്ടുകാരും ചോദിക്കുന്നു. ശ്രീലങ്കയിൽ ആഞ്ഞടിച്ച ഡിറ്റ്‌ വാ ചുഴലിക്കാറ്റിന്റെ പ്രഭാവമാണ്‌ പത്തനംതിട്ടയടക്കം സംസ്ഥാനത്തെ വിവിധ ജില്ലകളിൽ അന്തരീക്ഷം തണുക്കാൻ കാരണമെന്നാണ്‌ കാലാവസ്ഥാ വിദഗ്ധർ പറയുന്നത്‌.

ഞായറാഴ്ചയും ഇതേ കാലാവസ്ഥ തുടരാനാണ്‌ സാധ്യത. ജില്ലയിൽ പുലർച്ചെ 18 ഡിഗ്രി സെൽഷ്യസ്‌ വരെ താപനില താഴ്‌ന്നതായാണ്‌ കണക്കുകൾ. കൂടിയ താപനില 26 ഡിഗ്രി കടന്നതുമില്ല.

ഡിറ്റ്‌ വാ ചുഴലിക്കാറ്റ്‌ പ്രഭാവം കൂടുതലായി അനുഭവപ്പെടുന്നത്‌ കേരളത്തിന്റെയും തമിഴ്‌നാടിന്റെയും കിഴക്കൻ മേഖലകളിലാണ്‌. ഞായർ രാവിലെയോടെ വടക്കൻ തമിഴ്നാട്–പുതുച്ചേരി, തെക്കൻ ആന്ധ്രാപ്രദേശ് തീരത്തിന്സമീപമുള്ള തെക്കുപടിഞ്ഞാറൻ ബംഗാൾ ഉൾക്കടലിൽ എത്തിച്ചേരാൻ സാധ്യതയെന്ന്‌ കേന്ദ്രകാലാവസ്ഥാവകുപ്പ്‌ അറിയിച്ചു. ഇത്‌ ചെന്നൈ ഭാഗത്ത്‌ എത്തുന്നതോടെ കേരളത്തിലെ മൂടിക്കെട്ടിയ അന്തരീക്ഷത്തിന്‌ മാറ്റമുണ്ടാകും. അടുത്ത അഞ്ചുദിവസം നേരിയ/ ഇടത്തരം മഴയ്ക്കും സാധ്യതയുണ്ട്‌.