വന്യമൃഗങ്ങളുടെ ആക്രമണം; കരുതലായി കൂടെയുണ്ട്‌

ശബരിമല

ശബരിമല തീർഥാടകരെ വന്യമൃഗങ്ങളുടെ ആക്രമണങ്ങളിൽനിന്ന്‌ സംരക്ഷിക്കാൻ വനംവകുപ്പിന്റെ കരുതൽ. പാമ്പ്‌ കടിയേൽക്കുന്നത്‌ ഉൾപ്പെടെയുള്ളവ തടയാനായി ശക്തമായ പ്രതിരോധ പ്രവർത്തനങ്ങളാണ്‌ വനംവകുപ്പിന്റെ നേതൃത്വത്തിൽ നടക്കുന്നത്‌. 12 അംഗീകൃത പാമ്പ് പിടിത്തക്കാരും 60 ഓളം ആദിവാസി വിഭാഗത്തിലുൾപ്പെടുന്ന എക്കോ ഗാർഡുകളും പാമ്പുകളെ പിടികൂടാനുണ്ട്‌. തീർഥാടനം തുടങ്ങിയ ശേഷം ശബരിമല, പമ്പ പരിസരത്ത് നിന്ന് 65 പാമ്പുകളെ പിടികൂടി ഉൾവനത്തിൽ വിട്ടു. സന്നിധാന പരിസരത്തുനിന്ന്‌ മാത്രം 65 പന്നികളെയും പിടികൂടി. 30 എലിഫന്റ്‌ സ്ക്വാഡിനെയും റാപ്പിഡ് റെസ്പോണ്‍സ് ടീമിനെയും നിയോഗിച്ചിട്ടുണ്ട്. രാത്രിയിൽ അയ്യപ്പന്മാർ തങ്ങുന്ന സ്ഥലങ്ങളിൽ സോളാർ ഫെൻസിങ്ങുകൾ സ്ഥാപിച്ച് സുരക്ഷയുറപ്പാക്കി.

കൂടാതെ തീർഥാടകരെ സഹായിക്കാൻ വിപുലമായ സൗകര്യങ്ങളും വനംവകുപ്പ്‌ ഒരുക്കിയിട്ടുണ്ട്‌. പരമ്പരാഗതപാതകളിൽ നാല് എമർജൻസി മെഡിക്കൽ സെന്ററുകളും ഒരു ആശുപത്രി സൗകര്യവും ഏർപ്പെടുത്തി. കാനനപാത ചവിട്ടുന്ന തീർഥാടകർക്ക്‌ അഴുതക്കടവ് മുതൽ പമ്പവരെ സൗജന്യമായി കുടിവെള്ളം, ശൗചാലയം, വിരി വെക്കാനുള്ള സൗകര്യം എന്നിവയൊരുക്കി. മാലിന്യം തള്ളാൻ പ്രത്യേക ബിന്നുകളുണ്ട്‌. പ്രകൃതിസൗഹൃദ ബാഗുകള്‍ വിതരണം ചെയ്യുന്നുമുണ്ട്. പമ്പയിലെ അസിസ്റ്റന്റ് ഫോറസ്റ്റ് കൺസർവേറ്ററുടെ നേതൃത്വത്തിലുള്ള സ്പെഷൽ കൺട്രോൾ റൂമാണ് പ്രവർത്തനങ്ങൾ ഏകോപിപ്പിക്കുന്നത്.

ചിത്രം: ശബരിമല പരിസരത്തുനിന്ന്‌ പാമ്പിനെ പിടികൂടുന്ന വനംവകുപ്പ് ജീവനക്കാരൻ