എൻഡിആർഎഫ് സംഘത്തെ നയിക്കാൻ നാട്ടുകാരൻ

ശബരിമല

ശബരിമലയിലെ എൻഡിആർഎഫ് സംഘത്തെ നയിക്കുന്നത്‌ പത്തനംതിട്ട സ്വദേശി. വലഞ്ചുഴി സ്വദേശിയും എൻഡിആർഎഫ് ആരക്കോണം നാലാം ബറ്റാലിയൻ ഡെപ്യൂട്ടി കമാൻഡന്റുമായ ഡോ. എ അർജുനാണ് വെള്ളിയാഴ്ച ചുമതലയേറ്റെടുത്തത്‌. നേരത്തെ അതിർത്തിരക്ഷാ സേനയിൽ (ബിഎസ്എഫ്) ആയിരുന്ന അർജുൻ ആദ്യമായാണ് ശബരിമലയിൽ ഔദ്യോഗിക കൃത്യനിർവഹണത്തിനെത്തുന്നത്‌. കോട്ടയം മെഡിക്കൽ കോളേജിൽനിന്നാണ് എംബിബിഎസ് പൂർത്തിയാക്കിയത്.

സന്നിധാനത്ത് 41 പേരും പമ്പയിൽ 40 പേരുമായി ആകെ 81 എൻഡിആർഎഫ് സേനാംഗങ്ങളാണുള്ളത്. ദുരന്തപ്രതിരോധത്തിന്റെ ചുമതലയുള്ള എൻഡിആർഎഫ് സംഘം സന്നിധാനം, പമ്പ എന്നിവിടങ്ങളിൽവെച്ച് ശാരീരിക അസ്വാസ്ഥ്യം അനുഭവപ്പെടുന്ന തീര്‍ഥാടകരെ ഉടൻ സ്ട്രച്ചറിൽ കയറ്റി അടുത്തുള്ള ആശുപത്രിയിലെത്തിക്കുന്ന ജീവൻരക്ഷാ പ്രവർത്തനമാണ് ചെയ്യുന്നത്. പുല്ലുമേട് വഴി വരുന്ന അയ്യപ്പന്മാരുടെ കാര്യത്തിലും ഇത്തരത്തിൽ ജാഗ്രത പുലർത്തുന്നു. ഇതിനകം 60 പേർക്ക്‌ വൈദ്യസഹായം ലഭ്യമാക്കി.